នៅព្រឹកថ្ងៃទី១៦ ខែតុលា ឆ្នាំ២០២០នេះ មន្ទីរព័ត៌មានខេត្តសៀមរាប បានរៀបចំបើកកិច្ចប្រជុំបូកសរុបលទ្ធផលការងារ ៩ខែដើមឆ្នាំ២០២០ និង លើកទិសដៅការងារអនុវត្តបន្ត ក្រោមអធិបតីភាពឯកឧត្ដម អ៊ាន ឃុន សមាជិកក្រុមប្រឹក្សាខេត្ត និង ជាប្រធានក្រុមការងាររបស់ក្រុមប្រឹក្សាខេត្ត ដើម្បីទទួលបានព័ត៌មានអំពីស្ថានភាព បញ្ហាប្រឈម និង តម្រូវការនានានៅមន្ទីរ និងរដ្ឋបាលស្រុកមួយចំនួន , ឯកឧត្ដម ធា ស៊ីវត្ថា សមាជិកក្រុមប្រឹក្សាខេត្ត និងជាសមាជិកក្រុមការងាររបស់ក្រុមប្រឹក្សាខេត្ត និង ឯកឧត្ដម លីវ សុខុន ទីប្រឹក្សាក្រសួងព័ត៌មាន និង ជាប្រធានមន្ទីរព័ត៌មានខេត្តសៀមរាប ដោយមានការចូលរួមពីសំណាក់លោក លោកស្រី ជាអនុប្រធានមន្ទីរ និង មន្ត្រីនៃមន្ទីរព័ត៌មានខេត្តសៀមរាប ជាច្រើនរូប ។
ឯកឧត្ដម លីវ សុខុន ទីប្រឹក្សាក្រសួងព័ត៌មាន និង ជាប្រធានមន្ទីរព័ត៌មានខេត្តសៀមរាប មានប្រសាសន៍ថា គោលបំណងសំខាន់នៃកិច្ចប្រជុំនេះ គឺដើម្បីស្វែងយល់អំពីបទពិសោធន៍ ចំណុចខ្លាំង ចំណុចខ្សោយ បញ្ហាប្រឈម និងទិសដៅការងារសម្រាប់អនុវត្តបន្ត ធ្វើយ៉ាងណាឲ្យកិច្ចដំណើការ វិស័យព័ត៌មាននៅខេត្តសៀមរាប ប្រពឹត្តទៅបានដោយជោគជ័យប្រកបដោយគុណភាព ប្រសិទ្ធភាព តម្លាភាព សមធម៌ និងមានផលប្រយោជន៍ ដល់អាជ្ញាធរគ្រប់លំដាប់ថ្នាក់ ប្រជាពលរដ្ឋ និងសង្គមជាតិ ។
ឯកឧត្ដម លីវ សុខុន មានប្រសាសន៍បន្ថែមថា ដោយមានការគាំទ្រពីឯកឧត្តមរដ្ឋមន្ត្រីក្រសួងព័ត៌មាន និង ឯកឧត្តមអភិបាលខេត្តសៀមរាប ព្រមទាំងមានការចូលរួមយ៉ាងសកម្មពីសំណាក់ថ្នាក់ដឹកនាំនៃមន្ទីរ អង្គភាពទាំងអស់ក្នុងខេត្ត អភិបាលក្រុងស្រុក ប្រធានក្រុមប្រឹក្សាឃុំ សង្កាត់ និង អង្គការក្រៅរដ្ឋាភិបាល រួមជាមួយនឹងការខិតខំប្រឹងប្រែង អនុវត្តនូវភារកិច្ចស្នូលរបស់មន្ត្រីនៃមន្ទីរព័ត៌មានខេត្តជាប់ជាប្រចាំផងនោះ បានធ្វើឲ្យវិស័យព័ត៌មានក្នុងខេត្តសៀមរាប មានការរីកចម្រើន និង ទទួលបានជោគជ័យជាបន្តបន្ទាប់ ស្របតាមកម្មវិធីនយោបាយរបស់រាជរដ្ឋាភិបាលកម្ពុជា និងយុទ្ធសាស្ត្រចតុកោណដំណាក់កាលទី៤ នៃរដ្ឋសភាអាណត្តិទី៦ ក្រោមកិច្ចដឹកនាំដ៏ឈ្លាសវៃ ប្រកប ដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ពោរពេញដោយបញ្ញាញាណភ្លឺស្វាងដ៏ឧត្តុង្គឧត្តម ដែលដឹកនាំប្រទេសជាតិ មានការរីកចម្រើលើគ្រប់វិស័យ ក្នុងនោះវិស័យព័ត៌មានផងដែរ ពិសេសជាងនេះទៀតនោះ ភាពសុខសាន្តរបស់ប្រទេសជាតិទាំងស្រុងរយៈពេលជាងម្ភៃឆ្នាំកន្លមកនេះ «សូមអរគុណ សន្តិភាព» ។
គួររំលឹកថា ផ្អែកតាមរបាយការណ៍បូកសរុបលទ្ធផលការងារ៩ខែដើមឆ្នាំ២០២០ និង លើកទិសដៅការងារអនុវត្តបន្តរបស់មន្ទីរព័ត៌មានខេត្តសៀមរាប បានឲ្យដឹងថា ក្នុងរយៈពេល៩ខែកន្លងមកនេះ មន្ទីរសម្រេចបាន ៖ ចុះយកព័ត៌មាន បានចំនួន៤.៨៤០លើក ផលិតអត្ថបទព័ត៌មានបានចំនួន៤.៨៤០ អត្ថបទ , ផ្សាយតាមស្ថានីយវិទ្យុFMជាតិនគរភ្នំខេត្ត បានចំនួន ៦.៧០២ អត្ថបទព័ត៌មាន , ផ្សាយតាមស្ថានីយទូរទស្សន៍ជាតិខេត្ត និងស្ថានីយទូរទស្សន៍ខ្សែកាបអង្គរខេត្តសៀមរាប ប៉ុស្ដិ៍លេខ៩៥ បានចំនួន ៨.១១៤ អត្ថបទព័ត៌មាន , បញ្ជូនអត្ថបទព័ត៌មាន ទៅផ្សព្វផ្សាយនៅស្ថានីយទូរទស្សន៍ជាតិកម្ពុជា និងស្ថានីយទូរទស្សន៍ឯកជន មួយចំនួនទៀតនៅរាជធានីភ្នំពេញ សរុបចំនួន ២.២៨៣ អត្ថបទព័ត៌មាន , ធ្វើការផ្សាយផ្ទាល់ខាងក្រៅស្ទូឌីយោបាន ចំនួន៣លើក មានរយៈពេល៥ថ្ងៃ , ដកស្រង់នូវខ្លឹមសារសំខាន់ៗ នៃប្រសាសន៍របស់សម្ដេចតេជោ ហ៊ុន សែន ដើម្បីយកមកផលិតជាព័ត៌មានបន្ថែម ហើយធ្វើការផ្សព្វផ្សាយ បានចំនួន ៨៦០ អត្ថបទព័ត៌មាន និង ធ្វើការផ្សាយ សេចក្ដីជូនដំណឹងផ្សេងៗ និង ស្ពតអប់រំផ្សេងៗ បានចំនួន១.៤៧៤ លើក ។ របាយការណ៍បានបញ្ជាក់ទៀតថា ក្រោមកិច្ចសហការគ្នារវាងមន្ត្រីការិយាល័យវិទ្យុនិងមន្ត្រីការិយាល័យទូរទស្សន៍ បានធ្វើការរួមគ្នាផលិតកម្មវិធីផ្សាយផ្ទាល់ក្នុងស្ទូឌីយោតាមប្រព័ន្ធផ្សព្វផ្សាយចំនួនពីរ គឺវិទ្យុផង និងទូរទស្សន៍ផងក្នុងពេលតែមួយ រួមមាន ៖ កម្មវិធីសន្ទនាមតិ ចំនួន ១៧០ ប្រធានបទ , កម្មវិធីយើងធ្វើបាន ចំនួន ៣៥ ប្រធានបទ , កម្មវិធីសំឡេងយុវវ័យ បានចំនួន ៣៤ ប្រធានបទ , កម្មវិធីរួមគ្នាដើម្បីសង្គម បានចំនួន ១៧១ ប្រធានបទ និង កម្មវិធី បច្ចុប្បន្នភាព សៀមរាប-អង្គរ ពាក់ព័ន្ធនឹងជំងឺកូវីដ១៩ បានចំនួន ៧៩ ប្រធានបទ ។
មានប្រសាសន៍ក្នុងឱកាសនោះដែរ ឯកឧត្ដម អ៊ាន ឃុន សមាជិកក្រុមប្រឹក្សាខេត្ត បានសម្ដែងនូវការកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំ និង មន្ត្រីរាជការនៃមន្ទីរព័ត៌មានខេត្តសៀមរាប ដែលបានយកចិត្តទុកបំពេញភារកិច្ច តាមតួនាទីរបស់ខ្លួនដោយស្មារតីទទួលខុសត្រូវខ្ពស់ រហូតទទួលបានការគាំទ្រពីសំណាក់ថ្នាក់ដឹកនាំក្រសួងព័ត៌មាន ក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត អភិបាលក្រុងស្រុក និង ប្រធានក្រុមប្រឹក្សាឃុំ សង្កាត់ ។
ឯកឧត្ដម អ៊ាន ឃុន មានប្រសាសន៍ទៀតថា ផ្អែកតាមរបាយការណ៍បូកសរុបលទ្ធផលការងារ៩ខែដើមឆ្នាំ២០២០ របស់មន្ទីរព័ត៌មានខេត្តសៀមរាប ឃើញថា ទាំងថ្នាក់ដឹកនាំនិងមន្ត្រីរាជការ បានសហការសាមគ្គីគ្នា អនុវត្តតាមភារកិច្ច របស់ខ្លួនបានយ៉ាងខ្ជាប់ខ្ជូន រហូតសម្រេចបានលទ្ធផលគួរជាទីមោទនៈ បើទោះបីជាមន្ទីរព័ត៌មានខេត្តសៀមរាប ជួបប្រទះនូវការលំបាកមួយចំនួន ដូចជាកង្វះខាតមន្ត្រីក្របខណ្ឌ និង ថវិកាគាំទ្រសកម្មភាពការងារក៏ដោយ ។
ឯកឧត្ដម អ៊ាន ឃុន មានប្រសាសន៍ទៀតថា ទោះជាយ៉ាងនេះក្ដី ក្នុងឱកាសនេះសូមលើកទឹកចិត្តដល់ថ្នាក់ដឹកនាំនិងមន្ត្រីទាំងអស់ ត្រូវខិតខំប្រឹងប្រែងបន្តទៀត ដើម្បីសម្រេចបាននូវលទ្ធផលថ្មីៗបន្ថែមទៀត ស្របតាមការអភិវឌ្ឍន៍របស់ខេត្តយើងផង និង ប្រទេសជាតិយើងផង ហើយចំពោះបញ្ហាប្រឈមទាំងអស់ដែលលើកឡើងនាពេលនេះ ឯកឧត្ដមនឹងយកទៅរាយការណ៍ជូនឯកឧត្ដមប្រធានក្រុមប្រឹក្សាខេត្ត និង ឯកឧត្ដមអភិបាលខេត្ត ៕
