បច្ចុប្បន្ន វិស័យកសិកម្មក្នុងខេត្តសៀមរាប មានការរីកចម្រើនគួរឲ្យកត់សម្គាល់ ទោះជាយ៉ាងណាក៏ដោយ បម្រែបម្រួលអាកាសធាតុ បានធ្វើឲ្យប្រព័ន្ធស្រោចស្រពមានការរាំងស្ទះ រីឯបច្ចេកទេសដាំដុះ ក៏នៅមានកម្រិត ដែលសុទ្ធតែជាកត្តា នាំឲ្យពិបាកក្នុងការប្រកួតប្រជែងក្នុងទីផ្សារ នេះបើតាមប្រសាសន៍ ឯកឧត្តម ទៀ សីហា អភិបាលខេត្តសៀមរាប ក្នុងខួបលើកទី៤០ នៃទិវាស្បៀងអាហារពិភពលោកក្រោមប្រធានបទ “រួមគ្នាផលិតស្បៀងសម្រាប់មនុស្ស និងនិរន្តរភាពភពផែនដី” ក្រោមអធិបតីភាព ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ រួមនិងវត្តមានចូលរួមពី ឯកឧត្តម អ៊ឹង ហឿន ប្រធានក្រុមប្រឹក្សាខេត្ត តំណាងអង្គការស្បៀងនិងកសិកម្ម នៃអង្គការសហប្រជាជាតិ និងតំណាងកម្មវិធីស្បៀងអាហារពិភពលោក។
ឯកឧត្តមអភិបាលខេត្ត បន្ថែមថា គុណភាពផលិតផលកសិកម្ម គឺជាបញ្ហាប្រឈមរបស់កសិករ ក្នុងការរកទីផ្សារ ដែលទាមទារឲ្យអាជ្ញាធរគ្រប់លំដាប់ថ្នាក់ ភាគីជំនាញពាក់ព័ន្ធ រួមនិងកសិករខ្លួនឯងផ្ទាល់ ខិតខំជំរុញ ការប្រើប្រាស់វិធីសាស្រ្ត អប់រំបច្ចេកទេស ទេព្យកោសល្យនានា ដើម្បីលើកកម្ពស់ការផលិត និងផ្គត់ផ្គង់នូវស្បៀងអាហាររូបត្ថម្ភ ឲ្យបានកើនឡើងជាលំដាប់ និងគុណភាពកាន់តែល្អប្រសើរនាពេលខាងមុខ។
លោកស្រី ឃ្លែ ខឹន ណិន (Claire Conan) តំណាងកម្មវិធីស្បៀងអាហារពិភពលោក បង្ហាញថា ទិវាស្បៀងអាហារពិភពលោក ជាព្រឹត្តិការណ៍សាកលរបស់អង្គការសហប្រជាជាតិ ហើយនេះគឺជាខួបលើកទី៤០ផងដែរ។ ទិវានេះ រៀបចំឡើង ដើម្បីបំផុសស្មារតីយល់ដឹង និងទទួលស្គាល់អំពីតួនាទីសំខាន់នៃវិស័យកសិកម្ម ក្នុងការផលិតស្បៀង ធានាសន្តិសុខស្បៀង សុវត្ថិភាពចំណីអាហារ អាហារូបត្ថម្ភ និងនិរន្តរភាពភពផែនដី ដែលគ្រប់តួអង្គពាក់ព័ន្ធត្រូវមានឆន្ទៈចូលរួមឲ្យបានសកម្មក្នុងស្មារតីទទួលខុសត្រូវ សំដៅធានាឲ្យបានសន្តិសុខស្បៀងក្នុងកាល:ទេស:ដែលពិភពលោកបាននិងកំពុងប្រឈមបញ្ហាជំងឺឆ្លងសកលកូវីដ- ១៩។
លើកឡើងក្នុងឱកាសនោះ ឯកឧត្តមរដ្ឋមន្ត្រី បញ្ជាក់ថា៖ តាមអនុសាសន៍ របស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា កាលពីថ្ងៃទី១៨ ខែកុម្ភ: និងថ្ងៃទី១៤ ខែកក្កដាកន្លងទៅនេះ ប្រជាពលរដ្ឋ ជាពិសេសក្រសួងកសិកម្ម រុក្ខា ប្រមាញ់ និងនេសាទ ត្រូវខិតខំជំរុញសកម្មភាពផលិតកម្មស្បៀងគ្រប់រូបភាព ដូចជា ចិញ្ចឹមមាន់ ត្រី កង្កែប ដាំបន្លែ និងឈើហូបផ្លែជាដើម ក្នុងឆន្ទ:ចូលរួមបង្កើនផលិតភាពផលិតកម្មស្បៀង បង្កើនប្រាក់ ចំណូល ធានាសន្តិសុខស្បៀង និងអាហារូបត្ថម្ភ ស្របពេលដែលវិស័យមួយចំនួនកំពុងប្រឈមបញ្ហាជំងឺឆ្លងកូវីដ-១៩។
ឯកឧត្តមរដ្ឋមន្ត្រី បញ្ជាក់បន្ថែមថា ដើម្បីអនុវត្តន៍ ប្រធានបទខាងលើឲ្យទទួលបានជោគជ័យ គឺយើងទាំងអស់គ្នា ត្រូវចូលរួមសហការគ្នា តាមរយ:ការប្រើប្រាស់បច្ចេកវិទ្យាទំនើបសមស្រប ធន់នឹងការប្រែប្រួលអាកាសធាតុ បរិយាប័ន្ន និងនវានុវត្តន៍។ ក្នុងនោះ ការផ្សព្វផ្សាយបច្ចេកទេស នៃការប្រើប្រាស់ធាតុចូលកសិកម្មគ្រប់បែបយ៉ាង ទប់ស្កាត់ការកាប់បំផ្លាញព្រៃឈើ និងព្រៃលិចទឹក គឺនឹងរក្សាបាននូវបរិស្ថាន ធនធានធម្មជាតិ រួមមាន ទឹក ដី ព្រៃ សត្វ និងដំណាំ ដើម្បី ឆ្ពោះទៅសម្រេចគោលនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាន និងគោលនយោបាយអភិវឌ្ឍវិស័យកសិកម្ម ឆ្នាំ២០១៩-២០២៣។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ៖ លោក សេង ផល្លី
