ក្មេងស្រីម្នាក់ក្នុងខេត្តសៀមរាប សម្រេចក្ដីស្រមៃ ចង់ក្លាយជាអភិបាលស្រុក ក្នុងទិវា ”ក្មេងស្រីអន្តរជាតិ”
ក្ដីស្រមៃ ចង់ក្លាយជាអភិបាលស្រុក របស់ក្មេងស្រីសារាន រៀនថ្នាក់ទី១២ ក្នុងស្រុកបន្ទាយស្រី ខេត្តសៀមរាប បានទទួលជោគជ័យ បន្ទាប់ពី លោក ឃឹម ហ្វីណង់ អភិបាលស្រុកបន្ទាយស្រី បានសម្រេចផ្ទេរតំណែងជានិមិត្តរូបរយៈពេលមួយថ្ងៃ ជូនក្មេងស្រីរូបនេះ ក្នុងឱកាសអបអរសាទរទិវា ”ក្មេងស្រីអន្តរជាតិ” រៀបចំដោយអង្គការភ្លែនអន្តរជាតិកម្ពុជា នៅថ្ងៃទី១៦ ខែតុលា ឆ្នាំ២០២០។
លោក ហង្ស ប៊ុនណា ប្រធានប្រតិបត្តិអង្គការភ្លែនអន្តរជាតិកម្ពុជាប្រចាំខេត្តសៀមរាប បង្ហាញថា កម្មវិធីនាពេលនេះ ជាកិច្ចសហការជាមួយអង្គការភ្លែន និងរដ្ឋបាលស្រុកបន្ទាយស្រី ដើម្បីផ្តល់ឱកាសដល់ក្មេងស្រីម្នាក់អាចទទួលបានបទពិសោធន៍ដោយផ្ទាល់ ពីក្តីស្រមៃរបស់ខ្លួន ជាពិសេស ក្នុងបំណងលើកកម្ពស់ភាពជាអ្នកដឹកនាំ ក្នុងចំណោមក្មេងស្រី មិនមែនជាការផ្ទេរតំណែងពិតប្រាកដ ឬធ្វើឡើងក្នុងគោលបំណងណាផ្សេងឡើយ។
លោក ហង្ស ប៊ុនណា បញ្ជាក់ថា សារាន ជាក្មេងស្រីម្នាក់ ដែលត្រូវបានជ្រើសរើស ក្នុងចំណោមក្មេងស្រី នៅតាមសាលារៀនជាច្រើន ក្នុងស្រុកបន្ទាយស្រី ដើម្បីបង្ហាញនូវក្ដីស្រមៃរបស់ខ្លួន។ ក្នុងនោះ ចំពោះអត្តសញ្ញាណ ទីកន្លែងពេញលេញ អង្គការសុំរក្សាមិនបញ្ចេញ ក្នុងគោលបំណងរក្សាសិទ្ធ គុណតម្លៃស្ត្រី និងចូលរួមលើកកម្ពស់សមភាពយេនដ័រ។
លោកអភិបាលស្រុក បានសម្តែងនូវក្តីរំភើបជាខ្លាំង ដែលបានឃើញយុវវ័យជំនាន់ក្រោយកាន់តែច្រើន មានឆន្ទៈចង់ចូលរួមបម្រើការងាររដ្ឋ បម្រើប្រជាពលរដ្ឋ និងចង់ចាប់យកអាជីពនៅក្នុងវិស័យសាធារណៈ។ យើងសង្ឃឹមថា ថ្ងៃនេះ នឹងក្លាយទៅជាថ្ងៃដែលគួរឱ្យចង់ចាំមួយសម្រាប់ប្អូនស្រី សារាន ដើម្បីឈានទៅសម្រេច ក្តីស្រមៃរបស់ខ្លួននៅថ្ងៃខាងមុខជាក់ជាមិនខាន។
លោកអភិបាលស្រុក ក៏បានបញ្ជាក់ផងដែរថា ក្នុងនាមថ្នាក់ដឹកនាំស្រុក គឺទាមទាឲ្យយើងមានចំណេះដឹង សមត្ថភាព រួមនិងឆ្លងកាត់បទពិសោធន៏ការងារជាច្រើន។ សម្រាប់ សិស្សនិស្សិត ដែលបានបញ្ចប់ការសិក្សានៅមហាវិទ្យាល័យ និងចង់ក្លាយទៅជាមន្ត្រីរាជការ ឬក៏អភិបាលស្រុក ពួកគេអាចដាក់ពាក្យស្នើសុំចូលរៀននៅសាលាភូមិន្ទរដ្ឋបាល នៅរាជធានីភ្នំពេញ។
គួរជម្រាបថា ក្នុងតំណែងជាអភិបាលស្រុកបន្ទាយស្រី និមិត្តរូប រយៈពេលមួយថ្ងៃ របស់ក្មេងស្រីសារាន រូបនាង បានបង្ហាញនូវក្ដីរំភើបចំពោះតំណែងនេះ ហើយនាងបានចុះទៅតាមសាលារៀន ជួបសំណេះសំណាលជាមួយមន្ត្រីរាជការ រួមនិងពិភាក្សាជាមួយលោក ឃឹម ហ្វីណង់ ដើម្បីស្វែងយល់ពីបទពិសោធន៍ការងារ ក្នុងនាមជាថ្នាក់ដឹកនាំគម្រូ របស់ស្រុកបន្ទាយស្រី។
អត្ថបទ និង រូបភាព ៖ លោក ស៊ាន សុផាត
កែសម្រួលអត្ថបទ៖ លោក សេង
ផល្លី
