កាលពីថ្ងៃទី១៦ ខែតុលា ឆ្នាំ២០២០ ព្រះសង្ឃមកពីបណ្តាវត្តក្នុងស្រុកបន្ទាយស្រី ខេត្តសៀមរាប រួមនិងក្រុមអ្នកស្ម័គ្រចិត្ដ ដើម្បីមនុស្សធម៌ បាននាំយកអំណោយមនុស្សធម៌ រួមនិងថវិកាពីសប្បុរសជនក្នុង និងក្រៅប្រទេសជាង១០លានរៀល ដើម្បីសាងសង់ផ្ទះជូនប្រជាពលរដ្ឋក្រីក្រចំនួន២គ្រួសារ ស្ថិតក្នុងភូមិត្នោត ឃុំអំពិល ស្រុកប្រាសាទបាគង ខេត្ដសៀមរាប។
ព្រះតេជគុណ ស៊ិន គឹមសាន តំណាង ក្រុមអ្នកស្ម័គ្រចិត្ដ ដើម្បីមនុស្សធម៌ មានសង្ឃដីកាថា បន្ទាប់ពីចុះពិនិត្យមើលឃើញថា ប្រជាពលរដ្ឋ២គ្រួសារនេះ មានការលំបាកជាក់ស្ដែង ក្រុមការងារមនុស្សធម៌ទាំងអស់នេះ បានខិតខំជួយអស់ពីលទ្ធភាព ដើម្បីសម្រួលដល់ការរស់នៅរបស់ពួកគាត់ ជាពិសេសទុក្ខលំបាកនៅក្នុងវិបត្តិនៃជំងឺកូវីដ១៩នាពេលបច្ចុប្បន្ននេះ។ ព្រះតេជគុណ បញ្ជាក់ថា ក្រុមអ្នកស្ម័គ្រចិត្ដ ដើម្បីមនុស្សធម៌ ដែលមានក្រុមព្រះសង្ឃធ្វើសកម្មភាពនេះ បានចាប់ផ្ដើមតាំងពីឆ្នាំ២០១៧មកម្ល៉េះ សម្រាប់ជួយដល់ប្រជាពលរដ្ឋទីទ័លក្រ។
លោក ព្រៀន ប្រម មេឃុំអំពិល ស្រុកប្រាសាទបាគង បង្ហាញថា ប្រជាពលរដ្ឋ ពីរគ្រួសារនេះ មានមួយគ្រួសារអតីតពលទាហាន ហើយពួកគាត់ជាប្រជាពលរដ្ឋក្រីក្រ មានបណ្ណក្រីក្រ និងជីវភាពលំបាកពិតប្រាកដ។ នាពេលកន្លងមក ប្រជាពលរដ្ឋទាំងពីរគ្រួសារនេះ ពួកគាត់ក៏ធ្លាប់បានទទួល ថវិកាឧបត្ថម្ភពីរាជរដ្ឋាភិបាល សម្រាប់ប្រជាពលរដ្ឋដែលរងគ្រោះដោយសារវិបត្តិជំងឺកូវីដ១៩ ជុំទី៤ ផងដែរ។
លោកមេឃុំអំពិល បញ្ជាក់បន្ថែមថា នៅក្នុងឃុំអំពិល មានប្រជាពលរដ្ឋក្រ មួយ និង ក្រពីរ ជាងបីរយគ្រួសារ និងទទួលបានថវិកាឧបត្ថម្ភពីរាជរដ្ឋាភិបាល អំឡុងវិបត្តិកូវីដ១៩រួចរាល់ហើយ។ ប៉ុន្ដែ ១២គ្រួសារទៀត នៅពុំមិនទាន់បានទទួលថវិកាឧបត្ថម្ភ មូលហេតុដោយសារបាត់លេខសម្ងាត់ សម្រាប់បើកថវិកា។
អត្ថបទ និង រូបភាព ៖ លោក បូ សាវី
កែសម្រួលអត្ថបទ៖ លោក សេង ផល្លី
