ដើមត្នោតជារុក្ខជាតិមួយប្រភេទ ត្រូវបានចាត់បញ្ចូលជា រុក្ខជាតិនិមិត្តរូបជាតិមួយ របស់ព្រះរាជាណាចក្រកម្ពុជា តាំងពីឆ្នាំ២០០៥។ រយៈ ៤ឆ្នាំកន្លងមកនេះ អាជ្ញាធរជាតិអប្សរា បានដាំដើមត្នោតជាង៦,០០០ពាន់ដើម ក្នុងបរិវេណឧទ្យានអង្គរ ខណៈរុក្ខជាតិប្រភេទនេះ កំពុងរងការកាប់បំផ្លាញស្ទើរតែចង់បាត់បង់ទៅហើយ។
ឯកឧត្តម ហង់ ពៅ អគ្គនាយកអាជ្ញាធរជាតិអប្សរា មានប្រសាសន៍នៅថ្ងៃទី១៦ ខែតុលា ឆ្នាំ២០២០ នេះថា ចក្ខុវិស័យវែងឆ្ងាយរបស់អាជ្ញាធរជាតិអប្សរា បានគិតគូយ៉ាងហ្មត់ចត់ ពីការដាំដើមឈើ ដែលអាចផ្តល់សារៈប្រយោជន៍ទៅកាន់ប្រជាពលរដ្ឋ ជាក់ស្តែងដើមត្នោតអាចយកទៅកែច្នៃសំរាប់ធ្វើជាសម្ភារៈ ប្រើប្រាស់ផ្សេងៗ និងថែមទាំងអាចយកទៅធ្វើជាអាហារបានទៀតផង។
ឯកឧត្តមអគ្គនាយក បញ្ជាក់ថា ក្រៅពីដាំដើមត្នោត ៦,០០០ពាន់ដើមនេះ ក្រុមមន្ត្រីជំនាញ នៃអាជ្ញាធរជាតិអប្សរា ក៏បានបណ្ដុះកូនត្នោតជាច្រើនទៀត ដើម្បីបន្តដាំបន្ថែមទៀត ក្នុងរមណីយដ្ឋានអង្គរ និងសម្រាប់ចែកជូន ប្រជាពលរដ្ឋក្នុងគោលបំណង រក្សាអត្តសញ្ញាណនៃទេសភាពទឹកដីជាតិខ្មែរ។
គួរជម្រាបថា ដើមត្នោតត្រូវបានចាត់បញ្ចូល ជាប្រភេទរុក្ខជាតិនិមិត្តរូបជាតិ នៃព្រះរាជាណាចក្រកម្ពុជា ដោយព្រះរាជក្រឹត្យ លេខ នស/រកត/០៣០៥/១៤៩ ចុះថ្ងៃទី ២១ ខែមីនា ឆ្នាំ២០០៥ ស្តីពីការកំណត់ប្រភេទសត្វនិងរុក្ខជាតិសម្រាប់និមិត្តរូបនៃព្រះរាជាណាចក្រកម្ពុជា៕
អត្ថបទ និង រូបភាព ៖ លោក បូ សាវី
កែសម្រួលអត្ថបទ៖ លោក សេង ផល្លី
