តាមរបាយការណ៍របស់រដ្ឋបាលស្រុកអង្គរជុំ បានឲ្យដឹងថា គិតត្រឹមរសៀលថ្ងៃទី១៨ ខែតុលា ឆ្នាំ២០២០នេះ គ្រោះមហន្តរាយដែល កើតឡើងដោយសារជំនន់ទឹកភ្លៀង ក្នុងស្រុកអង្គរជុំ បានបង្កឱ្យមានការប៉ះពាល់ ដល់ផ្លូវថ្នល់ និងផ្ទះរបស់ប្រជាពលរដ្ឋនៅឃុំចំនួន០៣ ក្នុងចំណោមឃុំចំនួន០៧ ក្នុងទូទាំងស្រុក រួមមាន ៖ ១. ឃុំតាសោម ៖ លិចផ្លូវក្រួសក្រហមនៅបណ្ដាភូមិមួយចំនួន មានប្រវែង៥៨០ម៉ែត្រ , ២. ឃុំគោល ៖ ជំនន់ទឹកភ្លៀងបានហូររំលងផ្លូវ ៣ ខ្សែ ប្រវែង ១៨០ ម៉ែត្រ , ទឹកហូររំលងទំនប់ខ្វាវ ពីភូមិខ្វាវទៅភូមិរវៀងថ្មី ប្រវែង ៤០០ម៉ែត្រ និងហូរច្រោះដាច់ប្រវែង ៥០ ម៉ែត្រ , ទឹកហូររំលងទំនប់ភូមិអំពិលធ្នង់ ទៅភូមិគោកចាស់ (ស្រែខ្វាវ ) ប្រវែង ៣០០ម៉ែត្រ និង ទឹកលិច
ក្រោមផ្ទះប្រជាពលរដ្ឋ នៅភូមិគោលចំនួន ៨ខ្នង និងភូមិអំពិលធ្នង់ចំនួន ៧ ខ្នង និង ឃុំដូនពេង ៖ ទឹកហូរលិចក្រោមផ្ទះចំនួន១៥៤ គ្រួសារ និង ទឹកហូររំលងផ្លូវថ្នល់៦កន្លែង ប្រវែង១.៦៨៤ ម៉ែត្រ ។
ដោយឡែកស្ថានភាពទឹកជនន់មន្ទីរពេទ្យបង្អែក មានការស្រកចុះបន្តិចនៅ ខណៈឃុំផ្សេងៗទៀត នៅមិនទាន់មានផលប៉ះពាល់ឡើយ ។
នៅពេលនេះ គណៈកម្មាធិការស្រុក បានចុះពិនិត្យតាមបណ្ដាទ្វារទឹក ប្រឡាយសំខាន់ៗ និងលូធំ តូច ដើម្បីកាយសំរាមតាមមុខលូ ប្រឡាយ ឱ្យទឹកហូរបានលឿន និងស្រកលឿន ព្រមទាំងបានណែនាំដល់ប្រជាពលរដ្ឋ ឱ្យមានការប្រុងប្រយ័ត្នខ្ពស់លើការការពារសុខភាព និងជាពិសេសគឺកូនៗតូចរបស់ពួកគាត់ ចៀសវាងមានហានីភ័យណាមួយកើតមានឡើង ៕
#មន្ទីរព័ត៌មានខេត្តសៀមរាប
