កាលពីរសៀលថ្ងៃទី១៦ ខែតុលា ឆ្នាំ២០២០ ឯកឧត្តម ទៀ សីហា អភិបាលខេត្តសៀមរាប បានដឹកនាំមន្ត្រីជំនាញ ចុះពិនិត្យស្ថានភាពទឹកនៅក្នុង ទំនប់អាងទឹកម្កាក់ ស្ថិតនៅភូមិម្កាក់ ឃុំគោកធ្លកលើ ស្រុកជីក្រែង ខេត្តសៀមរាប ដែលអាចប្រឈមនឹងការកើនឡើងកម្ពស់ទឹករហ័ស ខណៈព្យុះទី១៧ ឈ្មោះ សូឌែល (SOUDEL) នៅតែរក្សាឥទ្ធិពលរបស់ខ្លួនចូលមកប្រទេសកម្ពុជា ជាពិសេសខេត្តនៅតំបន់វាលទំនាប តំបន់ជួរភ្នំដងរែក និងខេត្តតំបន់មាត់សមុទ្រ។
ឯកឧត្តម អភិបាលខេត្ត បានណែនាំដល់ មន្ទីរធនធានទឹក និងឧតុនិយមខេត្ត ត្រូវតាមដាន និងពិនិត្យកម្ពស់ទឹកឱ្យបានជាប់ជាប្រចាំ ប្រសិនបើកម្រិតទឹកឡើងដល់កម្រិតត្រូវប្រកាសអាសន្ន និងសហការជាមួយអាជ្ញាធរពាក់ព័ន្ធត្រៀមលក្ខណៈ បើកទ្វារទឹកបញ្ជៀសការបាក់ទំនប់ ឬទឹកឡើងលើសកម្រិត។
លើសពីនោះ ឯកឧត្តម អភិបាលខេត្ត ក៏បានណែនាំដល់ គណៈបញ្ជាការឯកភាពរដ្ឋបាល និងគណៈកម្មការគ្រប់គ្រងគ្រោះមហន្តរាយរដ្ឋបាលក្រុង-ស្រុក ឃុំ-សង្កាត់ ត្រូវត្រៀមលក្ខណៈជានិច្ចក្នុងការជួយអន្តរាគមន៍ សង្គ្រោះប្រជាពលរដ្ឋទៅរកទីទួលសុវត្ថិភាព ជៀសវាងមានគ្រោះថ្នាក់ផ្សេងៗ។ ទន្ទឺមនោះ ឯកឧត្តម ក៏បានអំពាវនាវដល់ ប្រជាពលរដ្ឋ និងសាធារណជន ត្រូវបង្កើនការយកចិត្តទុកដាក់ និងប្រុងប្រយ័ត្នខ្ពស់ ជៀសវាងគ្រោះថ្នាក់ធ្ងន់ធ្ងរ ដែលអាចកើតឡើងជាយថាហេតុ ព្រមទាំងចូលរួមសហការ និងផ្តល់ព័ត៌មាន ជូនដល់អាជ្ញាធរមានសមត្ថកិច្ច ដែលនៅជិតបំផុត ដើម្បីជួយអន្តរាគមន៍បានទាន់ពេលវេលា៕
អត្ថបទ និង រូបភាព ៖ លោក យូ វង្ស
កែសម្រួលអត្ថបទ៖ លោក សេង ផល្លី
