នៅថ្ងៃទី១៦ ខែតុលា ឆ្នាំ២០២០ ឯកឧត្តម ស៊ាន បូរ៉ាត់ រដ្ឋលេខាធិការ ក្រសួងអប់រំ យុវជន និង កីឡា និងជាប្រធានក្រុមការងាររាជរដ្ឋាភិបាលចុះជួយស្រុកស្រីស្នំ បានដឹកនាំប្រតិភូក្រុមការងារ និងអាជ្ញាធរស្រុក ចុះពិនិត្យស្ថានភាពកម្រិតទឹកក្នុងទំនប់អាងទឹកស្ទឹងស្រែង នៃស្រុកស្រីស្នំ ខេត្តសៀមរាប ស្របពេលសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាស កាលពីយប់មិញនេះ ថាប្រទេសថៃ នឹងទម្លាក់ទឹកមកប្រទេសកម្ពុជា ហើយខេត្តបន្ទាយមានជ័យ អាចនឹងរងគ្រោះបន្ថែម។
បើតាមការឲ្យដឹងពីលោក ហ៊ន់ ឫទ្ធិ អភិបាលស្រុកស្រីស្នំ បង្ហាញថា ទំនប់អាងទឹកស្ទឹងស្រែង១ របស់ខេត្តសៀមរាប មានប្រភពពីទំនប់អាងទឹកស្ទឹងស្រែង២ របស់ខេត្តឧត្តរមានជ័យ ដែលជាខេត្តជាប់ព្រំប្រទល់ប្រទេសថៃ។ ប៉ុន្តែនៅព្រឹកនេះ កម្រិតទឹកក្នុងទំនប់អាងទឹកស្ទឹងស្រែង១ ពុំមានការកើនឡើង គួរឲ្យព្រួយបារម្ភឡើយ។
យោងតាមរបាយការណ៍ គណៈកម្មាធិការគ្រោះមហន្តរាយស្រុកស្រីស្នំ បង្ហាញថា ចាប់ពីថ្ងៃទី០៤ ដល់ទី១៤ ខែតុលាឆ្នាំ២០២០កន្លង ក្នុងស្រុកស្រីស្នំ មានភ្លៀងបានធ្លាក់ជាបន្តបន្ទាប់ និងបណ្ដាលឲ្យមានជំនន់ទឹកភ្លៀង ហូរកាត់ភូមិមួយចំនួន ក្នងឃុំទាំង០៦របស់ស្រុក រួមមាន ឃុំក្លាំងហាយ ឃុំជ្រោយនាងងួន ឃុំត្រាំសសរ ឃុំប្រីយ៍ ឃុំមោង និងឃុំស្លែងស្ពាន ប៉ុន្តែផលប៉ះពាល់នោះ ពុំបង្កឲ្យមានភាពធ្ងន់ធ្ងរឡើយ។
អត្ថបទ និង រូបភាព ៖ លោក សេង ផល្លី និង លោក ខេង ឧត្តម
