ថ្ងៃទី១៤ ខែតុលា ឆ្នាំ២០២០ ប្រតិភូជាន់ខ្ពស់ចម្រុះ រួមមានឯកឧត្តមរដ្ឋមន្ត្រីក្រសួងអប់រំ យុវជន និងកីឡា នៃប្រទេសកម្ពុជា ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា និងតំណាងអង្គការ មូលនិធិកុមារនៃអង្គការសហប្រជាជាតិ ដែលហៅកាត់ថា យូនីសេហ្វ (UNICEF) ព្រមទាំងមានការទទួលស្វាគមន៍ពីលោក ពៅ ពិសិដ្ឋ អភិបាលរងខេត្តសៀមរាប បានចុះទស្សនកិច្ច នៅវិទ្យាល័យសម្ដេចតេជោ ហ៊ុន សែន អង្គរធំ ស្រុកអង្គធំ ខេត្តសៀមរាប ដើម្បីវាយតម្លៃ ស្តីអំពីវឌ្ឍនភាពសាលារៀននៅកម្ពុជា ក្នុងពេលបើកសាលារៀន ឲ្យសិស្សានុសិស្សបានចូលរៀនវិញប្រកបដោយសុវត្ថិភាព ។
ដំណើរបំពេញការងារនេះ វាគឺជាព្រឹត្តិការណ៍ ឆ្លុះបង្ហាញអំពីការប្ដេជ្ញាចិត្ត រួមគ្នារបស់ស្ថាប័នទាំងបី ក្នុងការការពារសិទ្ធិទទួលបានការអប់រំរបស់កុមារ បើទោះជាមានបញ្ហាប្រឈមថ្មីៗដ៏លំបាក បង្កដោយវិបត្តិសកលនៃជំងឺកូវីដ១៩ យ៉ាងណាក៏ដោយ។ ក្នុងនោះសហភាពអឺរ៉ុប បានផ្ដល់ថវិកាចំនួន ២លានអឺរ៉ូ សម្រាប់កិច្ចដំណើរការបើកសាលារៀនឡើងវិញប្រកបដោយសុវត្ថិភាព និងបន្តផ្ដល់សេវាអប់រំដល់កុមារ ដែលជាផ្នែកមួយនៃការគាំទ្រ ឆ្លើយតប និងសម្រាប់ស្ដារវិស័យអប់រំនៅកម្ពុជា ចេញពីវិបត្តិកូវីដ១៩។
តាមរយៈការគាំទ្រនេះ យុទ្ធនាការត្រឡប់ចូលរៀនវិញ របស់សិស្សនៅក្នុងទូទាំងប្រទេសកម្ពុជា ត្រូវបានអនុវត្តន៍ដោយក្រសួងអប់រំ យុវជន និងកីឡា និងអង្គការយូនីសេហ្វ ដើម្បីផ្ដល់ការណែនាំដល់កុមារ មាតាបិតា អាណាព្យាបាលសិស្ស លោកគ្រូអ្នកគ្រូ និងបុគ្គលិកសាលារៀន អំពីរបៀបធ្វើឲ្យមានសុវត្ថិភាពបំផុត កាត់បន្ថយហានិភ័យ នៃការចម្លងជំងឺកូវីដ១៩។ យុទ្ធនាការនេះដែរ នឹងបន្តរហូតដល់ឆ្នាំ២០២១ និងអាចពង្រីកវិសាលភាពបន្ថែមទៀត។ លើសពីនេះ សម្ភារអនាម័យសំខាន់ៗ ក៏ត្រូវបានចែកជូនសាលាមត្តេយ្យ និងសាលាបឋមសិក្សាជាង១ម៉ឺនកន្លែងទូទាំងប្រទេស។
ក្រៅពីជំនួយរបស់សហភាពអឺរ៉ុប តាមរយៈមូលនិធិភាពជាដៃគូ សម្រាប់អភិវឌ្ឍសមត្ថភាពវិស័យអប់រំ (CDPF) ដែលគ្រប់គ្រងដោយអង្គការយូនីសេហ្វនាពេលនេះ មូលនិធិភាពជាដៃគូ សម្រាប់អភិវឌ្ឍសមត្ថភាពវិស័យអប់រំ (CDPF) ក៏ទទួលបានជំនួយបំពេញបន្ថែមពី ប្រទេសស៊ុយអែត ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ និងភាពជាដៃគូសកលសម្រាប់ការអប់រំ។
ឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា លើកឡើងថា៖ កម្ពុជាសូមស្វាគមន៍ចំពោះការឧបត្ថម្ភបន្ថែមពីសហភាពអឺរ៉ុបដល់សាលារៀន និងសិស្សានុសិស្សនៅទូទាំងប្រទេសក្នុងគ្រាដ៏ពិបាកនេះ។ ជំនួយគាំទ្រសម្រាប់ការបើកទ្វារសាលារៀនឡើងវិញប្រកបដោយសុវត្ថិភាពនេះ នឹងធ្វើឱ្យប្រជាសហគមន៍មានទំនុកចិត្តថា សិស្សានុសិស្ស ដែលជាកូនចៅរបស់ពួកគាត់ នឹងអាចវិលត្រឡប់ទៅសាលារៀនវិញ ក្នុងបរិយាកាសសិក្សាប្រកបដោយសុវត្ថិភាព៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
