បន្ទាប់ពីបញ្ចប់បេសកកម្មនៅខេត្តបាត់ដំបង និង ខេត្តបន្ទាយមានជ័យរួចមក របស់ឯកឧត្ដម ខៀវ កាញារីទ្ធ រដ្ឋមន្រ្តីក្រសួងព័ត៌មាន និង ប្រតិភូអមដំណើរ និងបន្តបំពេញបេសកកម្មនៅខេត្តសៀមរាបនោះ នៅព្រឹកថ្ងៃទី ១៤ តុលា ឆ្នាំ ២០២០នេះ ឯកឧត្ដមរដ្ឋមន្រ្តីក្រសួងព័ត៌មាន និង ប្រតិភូអមដំណើរ បានចុះស្វែងយល់ពីការរៀបចំកែលម្អបរិស្ថានតំបន់ប្រាសាទអង្គរ ។
ក្នុងដំណើរបំពេញទស្សនកិច្ចនៅតំបន់អង្គរ របស់ឯកឧត្ដម ខៀវ កាញារីទ្ធ រដ្ឋមន្រ្តីក្រសួងព័ត៌មាន និង ប្រតិភូអមដំណើរនោះ ត្រូវបានឯកឧត្ដម ហង់ ពៅ អគ្គនាយក នៃអគ្គនាយកដ្ឋានអាជ្ញាធរជាតិអប្សរា ទទួលស្វាគមន៍យ៉ាងរាក់ទាក់បំផុត ។
ឯកឧត្ដម ហង់ ពៅ អគ្គនាយកអាជ្ញាធរជាតិអប្សរា បានឲ្យដឹងថា ឯកឧត្ដមពិតជាមានការពេញចិត្តជាខ្លាំងចំពោះវត្តមានឯកឧត្ដម ខៀវ កាញារីទ្ធ រដ្ឋមន្រ្តីក្រសួងព័ត៌មាន និង ប្រតិភូអមដំណើរ ក្នុងឱកាសអញ្ជើញមកស្វែងយល់ពីការរៀបចំកែលម្អបរិស្ថានតំបន់ប្រាសាទអង្គរនេះ ហើយឯកឧត្ដម ក៏បានជម្រាបជូនឯកឧត្ដមរដ្ឋមន្រ្តីក្រសួងព័ត៌មាន និង ប្រតិភូអមដំណើរ អំពីដំណើរការកែលម្អបរិស្ថាន សំដៅ លើកកម្ពស់សោភ័ណភាពនៅជុំវិញប្រាសាទអង្គរវត្ត ដើម្បីត្រៀមខ្លួនក្នុងការទទួលភ្ញៀវទេសចរអន្តរជាតិ ក្រោយកូវីដ.១៩ រលាយបាត់ពីសាកលលោក រួមមាន ការចាក់កៅស៊ូបេទីមមេនឺរ កសាងផ្លូវដើរថ្មើរជើងពង្រីកឧទ្យាន ការដាំកូនឈើ បាន ប្រមាណជាង ២ លានដើមក្នុងតំបន់ប្រាសាទទាំងមូលកសាងអាគារលក់វត្ថុអនុស្សាវរីយ៍ ភោជនីយដ្ឋាន ចំណតរថយន្ត និងបន្ទប់ ទឹកអានាម័យ សម្រាប់បម្រើដល់ភ្ញៀវ ។
ឯកឧត្ដម ហង់ ពៅ មានប្រសាសន៍ទៀតថា ការកែលម្អបរិស្ថានមុខប្រាសាទអង្គរវត្ត គឺសំដៅរៀបចំឲ្យសមស្របទៅនឹងតម្លៃវប្បធម៌របស់ប្រាង្គប្រាសាទដែលជាទីសក្ការៈបូជា និងជាស្ថាបត្យកម្មបុរាណល្អឯកគ្មាន២នៅលើសាកលោក ព្រោះប្រាសាទអង្គរ មានភាពល្បីល្បាញនៅក្នុងសាកលលោក ហើយប្រាសាទអង្គរវត្ត គឺជាសម្បត្តិបេតិកភណ្ឌពិភពលោកមានជីវិតរស់រវើក ខុសប្លែកពីប្រាសាទ ឬ វិមានបុរាណ នៃប្រទេសនានាក្នុងពិភពលោក ដោយហេតុថា តំបន់ប្រាសាទអង្គររបស់ខ្មែរគឺមានប្រាសាទដល់ទៅ៩១ប្រាសាទ និងជាបេតិកភណ្ឌពិភពលោកដ៏ពិសិដ្ឋ ។
ក្នុងឱកាសនោះដែរ ឯកឧត្ដម ខៀវ កាញារីទ្ឋ រដ្ឋមន្ត្រីក្រសួងព័ត៌មាន បានសម្តែងការកោតសរសើរ និងគាំទ្រដល់ថ្នាក់ដឹកនាំ និងមន្ត្រីគ្រប់ជាន់ថ្នាក់របស់អាជ្ញាធរជាតិអប្សរា ចំពោះកិច្ចខិតខំប្រឹងប្រែង លើការងារអភិរក្សនិងអភិវឌ្ឍតំបន់រមណីយដ្ឋានប្រាង្គប្រាសាទប្រកបដោយចិរភាព ដោយទទួលបាននូវសមិទ្ឋផលជាផ្លែផ្កាគួរជាទីមោទៈ ជាពិសេស ការការងារជួសជុលប្រាង្គប្រាសាទ ការងាររៀបចំសួនច្បារ ការដាំកូនឈើនិងរុក្ខជាតិបៃតងអមសងខាងផ្លូវក្នុងតំបន់រមណីយដ្ឋានអង្គរ រួមទាំងការរក្សាបាននូវអនាម័យ បរិស្ថាន និងការរៀបចំសណ្តាប់ធ្នាប់សាធារណៈបានយ៉ាងល្អ ព្រមទាំងរៀបចំឱ្យមានកន្លែងសម្រាប់ប្រជាពលរដ្ឋលក់ដូរប្រកបដោយសណ្ដាប់ធ្នាប់ទៀតផង ៕
អត្ថបទ និង រូបថត ៖ លោក យូ វង្ស និង លោក ធន់ ពូថេ
កែសម្រួលអត្ថបទ ៖ លោក លីវ សាន្ត
