សន្និសីទរយៈពេល ៣ថ្ងៃ ស្តីពី ឧក្រិដ្ឋកម្មប្រឆាំងកុមារ ត្រូវបានបើកក្រោមអធិបតីភាព ឯកឧត្តម កេង សុម៉ារិទ្ឋ រដ្ឋលេខាធិការក្រសួងយុត្តិធម៌កម្ពុជា ឯកឧត្តមឯកអគ្គរដ្ឋទូតអាមេរិក ផាតទ្រីក មើហ្វី (W. Patrick Murphy) នៅសណ្ឋាគារសូហ្វីថែល ក្រុងសៀមរាប នាព្រឹកថ្ងៃទី២០ ខែតុលា ឆ្នាំ២០២០។
សន្និសីទចាប់ពីថ្ងៃទី ២០ ដល់២២ ខែតុលា ឆ្នាំ ២០២០មានការចូលរួមពី មន្ត្រីមកពីក្រសួងយុត្តិធម៌ នគរបាលជាតិកម្ពុជា អគ្គនាយកដ្ឋានអន្តោប្រវេសន៍ ចៅក្រម ព្រះរាជអាជ្ញា និងអង្គការក្រៅរដ្ឋាភិបាលផងដែរ។ សន្និសីទនេះដែរ រៀបចំដោយ ការិយាល័យស៊ើបអង្កេតសន្តិសុខមាតុភូមិ ហៅកាត់ថា HSI ការិយាល័យស៊ើបអង្កេតសហព័ន្ធ ហៅកាត់ថា FBI និងការិយាល័យសន្តិសុខតំបន់ ហៅកាត់ថា RSO នៃស្ថានទូតអាមេរិក នៅរាជធានីភ្នំពេញ។
ជារៀងរាល់ឆ្នាំសន្និសីទនេះ ប្រារព្ធឡើងដោយមជ្ឈមណ្ឌលតស៊ូមតិកុមារ នៅដាឡាស ដែលមានការទទួលស្គាល់ ថាជាសន្និសីទអន្តរជាតិ ដែលផ្តល់នូវការណែនាំ អនុវត្តន៍ជាក់ស្តែង ក្នុងការប្រយុទ្ធប្រឆាំងនូវបទឧក្រិដ្ឋទាំងនេះ ប្រឆាំងនឹងកុមារ និងជួយព្យាបាលនូវអារម្មណ៍ភ័យខ្លាចរបស់កុមារពីអំពើរំលោភបំពានផ្សេងៗ។
ថ្លែងបើកក្នុងឱកាសនោះ ឯកឧត្តម កេង សុម៉ារិទ្ឋ រដ្ឋលេខាធិការក្រសួងយុត្តិធម៌ បង្ហាញថា៖ សន្និសីទនេះ ជាសារៈសំខាន់មួយ សម្រាប់ការរួមចំណែកក្នុងការលើកកម្ពស់ចំណេះដឹង និងការអនុវត្តល្អៗ ពាក់ព័ន្ឋទៅនឹងកិច្ចការពារកុមារ ស្របតាមកម្មវិធីនយោបាយរបស់រាជរដ្ឋាភិបាល នៃព្រះរាជាណាចក្រកម្ពុជា ដូចពាក្យស្លោកថា កុមារជាទំពាំងស្នងឬស្សី កុមារជាសរសរទ្រូងរបស់ប្រទេសជាតិ និងបានកំណត់ផងដែរថា អភិវឌ្ឍកុមារ គឺជាកូនសោរ ដើម្បីសម្រេចបាននូវការកាត់បន្ថយភាពក្រីក្រ និងអភិវឌ្ឍប្រកបដោយចីរភាពក្នុងរយៈពេលវែង។
ឯកឧត្តមរដ្ឋលេខាធិការ ក៏បានបង្ហាញ ពីជំហរដ៏រឹងមាំរបស់ក្រសួងយុត្តិធម៌ នៃព្រះរាជាណាចក្រកម្ពុជា ដែលតែងតែចាត់ទុកកិច្ចការពារកុមារ ជាអាទិភាពដ៏ចម្បងមួយ។ ជាមួយនេះ រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានដាក់ចេញនូវនយោបាយ កម្មវិធីកំណែទម្រង់ជាបន្តបន្ទាប់ ជាពិសេសប្រព័ន្ឋយុត្តិធម៌ ដែលជាការងារអាទិភាព ដ៏សំខាន់មួយនៃយុទ្ឋសាស្ត្រចតុកោណរបស់រាជរដ្ឋាភិបាល។
ឯកឧត្តមបញ្ជាក់ផងដែរថា៖ ការបង្ការ និង ទប់ស្កាត់បទល្មើសប្រឆាំងនឹងកុមារនៅកម្ពុជា មិនមែនជាកិច្ចការ ឬការទទួលខុសត្រូវ របស់ស្ថាប័នណាមួយតែឯងនោះទេ ហេតុនេះទាមទារ ការចូលរួមឱ្យផុសផុល និងកិច្ចសហការដ៏ល្អរវាងបណ្តាក្រសួង ស្ថាប័នរបស់រាជរដ្ឋាភិបាល តុលាការ ដៃគូអភិវឌ្ឍ អង្គការមិនមែនរដ្ឋាភិបាល វិស័យឯកជនសង្គមស៊ីវិល និងតួអង្គពាក់ព័ន្ឋទាំងអស់ ដើម្បីចូលរួមលើកកម្ពស់កិច្ចការពារ ទប់ស្កាត់ ប្រឆាំងទៅនឹងបទល្មើសផ្សេងៗពាក់ព័ន្ឋទៅនឹងកុមារ។
តាមរយៈនៃអង្គសន្និសីទនេះ ឯកឧត្តម សង្ឃឹមនិងជឿជាក់ថា សិក្ខាកាមទាំងអស់នឹងទទួលបានការចែករំលែកនូបទពិសោធល្អៗ ថ្មីៗ តាមរយៈការពិភាក្សាផ្លាស់ប្តូរមតិយោបល់គ្នាទៅវិញទៅមក ដើម្បីស្វែងរកវិធីសាស្ត្រដោះស្រាយបញ្ហាប្រឈមនានាឱ្យបានឆាប់រហ័ស ដោយមិនទុកឱ្យភាពអសកម្មណាមួយ ធ្វើឱ្យប៉ះពាល់ដល់ដំណើរការនៃការផ្តល់យុត្តិធម៌ជូនអនិតិជន ដែលរងគ្រោះពីបទល្មើសនោះឡើយ។ ជាទិសដៅក្រសួងយុត្តិធម៌ សូមជំរុញ និងលើកទឹកចិត្តឱ្យតួអង្គ ដែលពាក់ព័ន្ឋទាំងអស់ ត្រូវបន្តអនុវត្តន៍ច្បាប់ឱ្យបានម៉ឹងម៉ាត់ពាក់ព័ន្ឋនឹងបញ្ហាបទល្មើសប្រឆាំងនឹងកុមារ ហើយត្រូវផ្សព្វផ្សាយ តាមរយៈសិក្ខាសាលា សន្និសីទ ឬវគ្គបណ្តុះបណ្តាលនានា ឱ្យបានកាន់តែច្រើននិងទូលំទូលាយទូទាំងប្រទេស។
គួរជម្រាបថា សន្និសីទនេះ នឹងមានការបណ្តុះបណ្តាលជាក់ស្តែង ដោយអ្នកជំនាញ របស់ទីភ្នាក់ងារជំនាញនានា និងប្រើប្រាស់វិធីសាស្ត្រ ដែលផ្តល់ពីចម្ងាយ ពីកម្មវិធីសន្និសីទឧក្រិដ្ឋកម្មប្រឆាំងកុមារ លើកទី៣២ នៅដាឡាស រដ្ឋតិចសាស់ ដែលផ្តោតលើការជួយដល់អ្នកអនុវត្តច្បាប់នៅកម្ពុជា និងព្រះរាជអាជ្ញា ក្នុងការប្រយុទ្ធប្រឆាំងនឹងការសូកប៉ាន់ កេងប្រវ័ញ្ច និងភាពងាយរងគ្រោះដោយសារការជួញដូរផ្លូវភេទ លើកុមារ។ អង្គសន្និសីទ ក៏នឹងលើកយកបទបង្ហាញ នូវចំណុចសំខាន់ៗ ដើម្បីជាវិធានគន្លឺះក្នុងការដេញតាមជនទុច្ចរិត ដូចជា៖សំណើ និង ការស៊ើបអង្កេតបឋម ,សម្ភាសន៍ជាមួយជនរងគ្រោះ និង សាក្សីដំបូងៗសកម្មភាពស៊ើបអង្កេតពាក់ព័ន្ធ នឹងដីកាឆែកឆេរសម្រាប់ក្រុមហ៊ុនផ្តល់ សេវាកម្មអីនធើណិត និង ការប្រមូលឯកសាររបស់របស់ក្រុមហ៊ុននោះជាដើម។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
