នៅព្រឹកថ្ងៃទី២០ ខែតុលា ឆ្នាំ២០២០ ប្រជាពលរដ្ឋរងគ្រោះដោយទឹកជំនន់ចំនួន ៣០គ្រួសារ ក្នុងស្រុកបន្ទាយស្រី ខេត្តសៀមរាប បានទទួលពីកាកបាទក្រហមកម្ពុជា តាមរយៈសាខាកាកបាទក្រហមកម្ពុជា ខេត្តសៀមរាប ដឹកនាំដោយឯកឧត្តម គុជ លីណា អនុប្រធានគណៈកម្មាធិការសាខា រួមនិងសមាជិកគណៈកម្មាធិការសាខា អនុសាខាស្រុក រួមទាំងអាជ្ញាធរមូលដ្ឋានផងដែរ។
តាមសេចក្តីរាយការណ៍របស់លោក ថាប់ សារ៉ន ប្រធានកិត្តិយសអនុសាខាកាកបាទក្រហមស្រុកបន្ទាយស្រី ទឹកជំនន់ បង្កដោយទឹកភ្លៀងនេះ ហូរធ្លាក់ពីតំបន់ភ្នំគូលែន ចូលមកភូមិសាស្ត្រ ឃុំឃុនរាម និង ខ្នារសណ្តាយ កាលពីថ្ងៃទី១៨ តុលាកន្លងទៅនេះ និងបានធ្វើឲ្យលិចលង់ផ្ទះ និង ផលដំណាំប្រជាពលរដ្ឋមួយចំនួន ហើយបណ្តាឃុំមួយចំនួនទៀតនៅក្នុងស្រុកបន្ទាយស្រី ក៏ទទួលរងឥទ្ធពលនៃទឹកជំនន់នេះផងដែរ ។
ឯកឧត្តម គុជ លីណា បានបង្ហាញនូវការសោកស្ដាយចំពោះទ្រព្យសម្បតិ្ត និងផលដំណាំដែលប្រជាពលរដ្ឋក្នុងស្រុកបន្ទាយស្រី ឯកឧត្តម ក៏បាននាំយកការសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ទៀ សីហា ប្រធានគណៈកម្មាធិកាកសាខា ដែលជានិច្ចកាលសម្ដេចតែងតែយកចិត្តទុកដាក់គិតគូរខ្ពស់បំផុត ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ។
ឯកឧត្តម ក៏បានណែនាំ ប្រជាពលរដ្ឋ ត្រូវមានការប្រុងប្រយ័ត្នខ្ពស់ ចំពោះសុខភាព ទទួលទានប្រកបដោយអនាម័យ និងសត្វមានពិសនានា។ ម្យ៉ាងវិញទៀត ត្រូវមានការប្រុងប្រយ័ត្ន ចំពោះការបើកបរ ព្រោះប្រព័ន្ធផ្លូវថ្នល់មួយចំនួន ត្រូវបានកាត់ផ្ដាច់ដោយជំនន់ទឹកភ្លៀង។
សូមជម្រាបថា អំណោយនាពេលនោះ ក្នុងមួយគ្រួសារទទួលបាន អង្ករ ៣០គ.ក្រ ឃីត ១កញ្ចប់ , កន្ទេល ១, មី ១កេស , ត្រីខ ១យូរ អាវយឺត២ ,ទឹកត្រី ៤ដប , សាប៊ូ ២ដុំ និង ថវិកា ១០ម៉ឺនរៀល រួមនិងគ្រឿងឧបភោគបរិភោគ របស់សប្បុរសជន ផ្ដល់ឲ្យនៅនឹងកន្លែងផងដែរ។
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
