មានប្រសាសន៍ក្នុងកម្មវិធីសន្ទនាមតិ នាព្រឹកថ្ងៃទី២១ ខែតុលា ឆ្នាំ២០២០ លោក ម៉ក់ ប្រុស អភិបាលស្រុកសូទ្រនិគម បានបញ្ជាក់ថា ការចូលរួមក្នុងកិច្ចការនៅមូលដ្ឋាន ជាមួយនឹងឆន្ទៈរបស់យុវជន មានសារសំខាន់ណាស់ ដើម្បីស្វែងយល់ពីតម្រូវការរបស់ប្រជាពលរដ្ឋនៅសហគមន៍ ហើយពួកគេ នឹងអាចក្លាយអ្នកបន្ដវេន ដែលមានសមត្ថភាព ក្នុងការងារដឹកនាំមូលដ្ឋាន។
លោក ម៉ក់ ប្រុស មានប្រសាសន៍បន្ថែមថា ស្របតាមគោលនយោបាយជាតិ របស់រាជរដ្ឋាភិបាល ក្នុងការជំរុញឲ្យមានវត្តមានយុវជនក្នុងការងារសង្គម យ៉ាងតិច៣០ភាគរយ អាជ្ញាធរស្រុកសូទ្រនិគម បាននឹងបន្ដជំរុញលើកទឹកចិត្តបន្ថែមទៀត ដល់យុវជនដែលមានបំណងចង់បម្រើការងាររាជការ ជាជំនួយការឃុំ មេភូមិ មន្រ្តីជាប់កិច្ចសន្យា ឬ មន្រ្តីរាជការ ឬការងារផ្សេងៗដែលបានចូលរួមចំណែកក្នុងកិច្ចការងារសង្គមជាតិ ។
លោក ម៉ក់ ប្រុស អភិបាលស្រុកសូទ្រនិគម មានប្រសាសន៍បន្ថែមទៀតថា ក្នុងមូលដ្ឋានស្រុកសូទ្រនិគមទាំងមូល មានវត្តមានយុវជនកំពុងបម្រើការងារសង្គម ប្រមាណ៣០ភាគរយ ដែលនេះទាមទារឲ្យយុវជនខ្លួនឯង ត្រូវមានឆន្ទៈ ការទទួលខុសត្រូវ និងការចង់ដឹង ចង់ធ្វើ ដើម្បីធ្វើការអភិវឌ្ឍមូលដ្ឋានឲ្យមានប្រសិទ្ធភាព និង មានបទពិសោធន៍ក្នុងការបន្ដវេនដែលមានសមត្ថភាព ៕
អត្ថបទ និង រូបថត ៖ លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
