នៅព្រឹកថ្ងៃទី២២ ខែតុលា ឆ្នាំ២០២០នេះ សាខាកាកបាទក្រហមកម្ពុជាខេត្តសៀមរាប បានទទួលអំណោយមនុស្សធម៌ ពីសប្បុរសជនក្នុងខេត្តសៀមរាប សម្រាប់ជួយសម្រួលជីវភាពបងប្អូនប្រជាពលរដ្ឋរងគ្រោះដោយជំនន់ទឹកភ្លៀង ដោយពិធីនេះដែរប្រព្រឹត្តិទៅក្រោមអធិបតិភាព លោកជំទាវ ទាង អេង ទៀ សីហា អនុប្រធានគណៈកម្មាធិការ សាខាកាកបាទក្រហមខេត្ត តំណាំងដ៏ខ្ពង់ខ្ពស់ ឯកឧត្តម ទៀ សីហា អភិបាលខេត្ត និងជាប្រធានគណៈកម្មាធិការ សាខាកាកបាទក្រហមខេត្ត ដោយមានការចូលរួមពីសមាជិកសមាជិកាគណៈកម្មាធិការ រួមទាំងបងប្អូនជាសប្បុរសជន ជាតិ និងអន្តរជាតិផងដែរ។
បើតាម លោក ស៊ុ សំអន នាយកប្រតិបត្តិសាខាកាកបាខេត្ត បានឲ្យដឹងថា ក្នុងពេលដែលប្រជាពលរដ្ឋកម្ពុជា ក៏ដូចនៅលើពិភពលោក បានកំពុងជួបវិបត្តិនៃជម្ងឺកូវិដ១៩ និយាយដោយ ឡែកនៅកម្ពុជា ដែលបានទទួលរងនូវឥទ្ធពលអាកាសធាតុសម្ពាធទាប បានធ្វើឲ្យរាជធានី ខេត្តក្រុងស្រុកមួយចំនួន មានការលិចលង់ដោយជំនន់ទឹកភ្លៀង ដោយឡែកចំពោះខេត្តសៀមរាប ក៏មានស្រុកមួយចំនួន បានរងផលប៉ះពាល់ភូមិ ឃុំមួយចំនួនដោយជំនន់ទឹកភ្លៀង បានធ្វើឲ្យខូចខាតនូវភោគផលដំណាំ ផ្ទះសម្បែង និងហេដ្ឋារចនាសម្ព័ន្ធ ជនបទមួយចំនួនទៀតផង ។
មានប្រសាសន៍នាឱកាសនោះ លោកជំទាវ ទាង អេង ទៀ សីហា ក៏បានធ្វើការសម្តែងនូវអំណរគុណ អំពីទឹកចិត្តដ៏សប្បុរសធម៌របស់លោកលោកស្រីដែលជាសប្បុរសជន ដែលបានចូលរួមនូវសកម្មភាពមនុស្សធម៌ ជាមួយសាខាកាកបាទក្រហមកម្ពុជា ក្នុងការចែករំលែកនូវធនធាន ដើមី្បជួយទៅដល់ប្រជាពលរដ្ឋរងគ្រោះ ដោយជំនន់ទឹកភ្លៀង ក្នុងពេលថ្មីៗនេះ នៅតាមបណ្តាក្រុង ស្រុកមួយចំនួន ក្នុងខេត្តសៀមរាប។ ជាមួយគ្នានោះ សកម្មភាពនៃកាយវិការដ៏សប្បុរសធម៌នេះ គឺជាប្រពៃណីវប្បធម៌ចែករំលែកមួយក្នុងគ្រាលំបាក នៅពេលកំពុងជួបវិបត្តិជម្ងឺកូវិដ១៩ និង ដើមី្បបំពេញតម្រូវការក្នុងការខ្វះខាតរបស់បងប្អូនរងគ្រោះ និងងាយរងគ្រោះនៃស្បៀងអាហារ សំខាន់ក្នុងពេលកំពុងជួបគ្រោះធម្មជាតិនេះ ។
លោកជំទាវអនុប្រធានគណៈកម្មាធិការ បានបញ្ជាក់ថា រាល់ស្បៀងអាហារ សម្ភារៈ និងថវិកាដែលទទួលបានពីបងប្អូននាពេលនេះ សាខាកាកបាទក្រហមខេត្ត និង យកទៅប្រើប្រាស់ រៀបចំដើមី្បដឹកនាំយកទៅចែកជូនបងប្អូននៅតាមមូលដ្ឋានដែលទទួលរងគ្រោះ ដោយមិនបានប្រកាន់វណ្ណៈ ពណ៌សម្បុរ ជំនឿសាសនា ឬ និន្នាការនយោបាយណាមួយឡើយ។ ក្នុងនោះការបរិចាកនូវធនធាន ជាស្បៀងអាហារ សម្ភារៈ ថវិកា ក្នុងស្មារតីលើកកម្ពស់ចលនាមនុស្សធម៌ របស់បងប្អូនសប្បុរសជននៅថ្ងៃនេះ ជាការចូលរួមជាមួយសាខាកាកបាទក្រហមខេត្ត ដើមី្បមានលទ្ធភាពជួយដល់ក្រុមគ្រួសារ និង ជនរងគ្រោះដោយគ្រោះមហន្តរាយនូវគ្រោះធម្មជាតិនៅតាមបណ្តាក្រុង ស្រុកក្នុងខេត្ត ។ ម៉្យាងទៀតអំណោយទាំងនេះ សាខាកាកបាទក្រហមកម្ពុជា និង យកទៅប្រើប្រាស់ផ្តល់ជូនដល់ដៃបងប្អូនរងគ្រោះ នៅពេលដែលកំពុងជួបគ្រោះមហន្តរាយ នៅតាមបណ្តាស្រុកក្នុងខេត្តសៀមរាប ។
សូមបញ្ជាក់ថា អំណោយមនុស្សធម៌ដែលសប្បុរសជនបានប្រគល់ជូន ដើម្បីជួយទ្រទ្រង់សកម្មភាព នៃចលនាកាកបាទក្រហម ក្នុងឱកាសនោះជារួម មានអង្ករ ១២តោន២០០គក្រ , មី ៣៨០កេស , ទឹកបរិសុទ្ធ ៣០០កេស , ភួយ ៥០០ មុង ១០០ ,ធុងដាក់ សម្រាម ២០ ,ឆ័ត្រ៤ និង ថវិកា ប្រាក់រៀល ចំនួន ៣២.១១០.០០០រៀល និងប្រាក់ដុល្លាចំនួន ៦.៤៥០ដុល្លារផងដែរ៕
អត្ថបទ និង រូបភាព៖ ទ្រា ពន្លឺ
កែសម្រួល៖ អ៊ុន ណារាជ្យ
