ដោយមានការគាំទ្រពី CAMBODIA AIRPORTS នៅព្រឹកថ្ងៃទី២១ ខែតុលា ឆ្នាំ២០២០នេះ សាខាកាកបាទក្រហមកម្ពុជាខេត្តសៀមរាប បានរៀបចំបើកវគ្គបណ្តុះបណ្តាលគ្រូបង្គោលមួយ រយ:ពេល ២ថ្ងៃ គឺនៅថ្ងៃទី២១និងថ្ងៃទី២២ ខែតុលា ដល់អ្នកស្ម័គ្រចិត្តកាកបាទក្រហមកម្ពុជាខេត្តសៀមរាប ចំនួន២៥នាក់ ស្ដីពីសុវត្ថិភាពចរាចរណ៍ ហានីភ័យនៃការបើកបរក្រោមឥទ្ធិពលគ្រឿងស្រវឹង នឹងមិនពាក់មួកសុវត្ថិភាព ។
លោក ស៊ុ សំអន នាយកប្រតិបត្តិការសាខាកាកបាទក្រហមកម្ពុជាខេត្តសៀមរាប មានប្រសាសន៍ថា ការបណ្តុះបណ្តាលដល់អ្នកស្ម័គ្រចិត្តកាកបាទក្រហមកម្ពុជាខេត្តនាពេលនេះ ក្នុងគោលបំណងឲ្យបន្តការផ្សព្វផ្សាយ និង ក្រើនរំឮកដល់អ្នកប្រើប្រាស់ផ្លូវថ្នល់ទាំងអស់ បង្កើនការប្រុងប្រយ័ត្នឲ្យបានខ្ពស់ នៅពេលយើងធ្វើដំណើរ ដោយហេតុថា បច្ចុប្បន្ននេះ ករណីគ្រោះថ្នាក់ចរាចរណ៍ គឺជាបញ្ហាប្រឈមដ៏ធំរបស់កម្ពុជា ដោយវាបានសម្លាប់មនុស្សជារៀងរាល់ថ្ងៃ បន្សល់ទុកនូវកុមារកំព្រា ស្រ្តីមេម៉ាយ ជនពិការ ប៉ះពាល់ដល់សេដ្ឋកិច្ចប្រទេសជាតិ និងខូចខាតសណ្តាប់ធ្នាប់សង្គម ដោយសារតែអ្នកប្រើប្រាស់ផ្លូវ មិនគោរពច្បាប់ចរាចរណ៍ បើកបរក្រោមឥទ្ធិពលគ្រឿងស្រវឹង បើកបរហួសល្បឿនកំណត់ និងមិនពាក់មួកសុវត្ថិភាព នៅពេលធ្វើដំណើរផងដែរ ។
លោក ស៊ុ សំអន មានប្រសាសន៍ទៀតថា តាមរយៈនៃវគ្គបណ្តុះបណ្តាលនេះ សិក្ខាកាមទាំងអស់ នឹងទទួលបានចំណេះដឹងថ្មីៗ ដើម្បីចូលរួមកាត់បន្ថយអត្រាគ្រោះថ្នាក់ដោយសារចរាចរណ៍ទូទាំងខេត្ត តាមរយៈការជួយណែនាំដល់បងប្អូនខ្លួននៅក្នុងគ្រួសារ និងអ្នកជិតខាង ឱ្យពួកគាត់យល់ដឹងនៅពេលបើកបរត្រូវពាក់មួក និងពាក់ខ្សែក្រវ៉ាត់សុវត្ថិភាពឱ្យបានជាប់ជាប្រចាំ ហើយបើកបរទៅតាមល្បឿនកំណត់ គោរពស្លាកសញ្ញាតាមដងផ្លូវ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
