យោងតាមលទ្ធផលនៃកិច្ចប្រជុំ របស់ក្រុមការងារថ្នាក់ជាតិ របស់រាជរដ្ឋាភិបាលចុះមូលដ្ឋាន ស្រុកបន្ទាយស្រី ខេត្តសៀមរាប ដើម្បីត្រួតពិនិត្យ និងជំរុញគាំទ្រការអនុវត្តកម្មវិធីនយោបាយ និងយុទ្ធសាស្រ្តចតុកោណតំណាក់កាលទី៤ របស់រាជរដ្ឋាភិបាលកម្ពុជា បានរៀបចំសេចក្តីព្រាងយន្តការថ្មីមួយ ស្តីអំពីកំណែទម្រង់រចនាសម្ព័ន្ធ ពង្រឹងក្រុមលេខាធិការដ្ឋាន និងរៀបចំវិធីសាស្រ្តការងារ ដាក់ឆ្លងកិច្ចប្រជុំលើកក្រោយក្នុងអំឡុងខែធ្នូខាងមុខ ដាក់ជូនប្រធានក្រុមការងារថ្នាក់ជាតិចុះជួយខេត្តសៀមរាប ដើម្បីអនុម័តប្រើប្រាស់ សម្រាប់ឆ្នាំ២០២១ខាងមុខ ប្រកបដោយប្រសិទ្ធភាព។
កិច្ចប្រជុំនេះ បានធ្វើឡើងនៅសាលាស្រុកបន្ទាយស្រី នាព្រឹកថ្ងៃទី២០ ខែតុលា ឆ្នាំ២០២០ ក្រោមវត្តមានដឹកនាំកិច្ចប្រជុំ ដោយឯកឧត្តម សោម សុគន្ធ រដ្ឋលេខាធិការ ក្រសួងវប្បធម៌ និងវិចត្រសិល្បៈ ប្រធានក្រុមការងាររាជរដ្ឋាភិបាលចុះមូលដ្ឋានស្រុកបន្ទាយស្រី ។ សមាសភាពនៃកិច្ចប្រជុំនេះ រួមមានក្រុមការងារចល័ត ក្រុមការងារលេខាធិការដ្ឋាន និងក្រុមការងារចុះជួយមូលដ្ឋានឃុំទាំង៦របស់ស្រុក ដែលមកពីបណ្តាស្ថាប័នរដ្ឋបាលសាធារណៈ និងអង្គភាពជំនាញដែលពាក់ព័ន្ធ ក្នុងនោះក៏មានសមាជិកនៃក្រុមការងារមកពីអាជ្ញាធរជាតិអប្សរាផងដែរ។
បញ្ហាសំខាន់ផងដែរ ដែលបានលើកបង្ហាញនៅក្នុងកិច្ចប្រជុំនេះ គឺការប្រមូលព័ត៌មាន ស្តីអំពីតម្រូវការរបស់សហគមន៍ ក្តីកង្វល់ និងសំណូមពររបស់ប្រជាពលរដ្ឋ ពិសេសចំពោះមុខនៃវិបត្តិកូវីដ១៩ រួមទាំងផលប៉ះពាល់នៃជំនន់ទឹកភ្លៀង ដែលទើបនឹងកើតឡើងថ្មីៗនេះ។ កិច្ចប្រជុំក៏បានលើកឡើងផងដែរថា វេទិការសាធារណៈ គឺជាឧបករណ៍ប្រមូលព័ត៌មានដ៏ត្រឹមត្រូវ ដើម្បីឆ្លើយតបទៅនឹងសេចក្តីត្រូវការរបស់មូលដ្ឋានសហគមន៍ និងបំពេញ ចំពោះអ្វីដែលជាសំណូមពររបស់ប្រជាពលរដ្ឋក៏ពិតមែន ក៏ប៉ុន្តែវាមិនគ្រប់គ្រាន់នោះទេ បើពុំមានបេសកកម្មរបស់ក្រុមការងារចុះសិក្សាស្វែងយល់បន្ថែមទៀត ក្នុងទម្រង់ទស្សនកិច្ច ក្រៅពីទម្រង់កិច្ចការសាធារណៈនោះ។
យ៉ាងណាក៏ដោយ កិច្ចប្រជុំបានទាមទារឲ្យសមាជិកនៃក្រុមការងារគោលដៅនីមួយៗ មានសមាសភាពជំនាញមកពីគ្រប់មន្ទីរ អង្គភាព និងស្ថាប័នដែលពាក់ព័ន្ធ ស្របទៅនឹងអ្វីដែលជាតម្រូវការឆ្លើយតបចំពោះមូលដ្ឋាន។ សមាសភាពជាមន្រ្តីជំនាញទាំងនោះ ត្រូវតែទទួលបាននូវការគាំទ្រពីសំណាក់ស្ថាប័នសាម៉ីរបស់ខ្លួនផងដែរ ហើយអ្វីដែលកិច្ចប្រជុំចង់បានជាពិសេសជាងនេះ គឺសំណូមពរឲ្យស្ថាប័នសាម៉ីនៃសមាជិកក្រុមការងារ ចាត់តាំងតំណាងជំនួស នៅពេលដែលសមាជិកចំឈ្មោះនៃក្រុមការងារ ត្រូវបានអវត្តមាន ក្នុងបេសកកម្មចុះជួបប្រជាពលរដ្ឋនៅមូលដ្ឋាន។
គួរបញ្ជាក់ផងដែរថា បញ្ហាដីធ្លីនៅស្រុកបន្ទាយ នៅតែជាកម្មវត្ថុនៃដំណោះស្រាយជាបន្តបន្ទាប់ ហើយស្រុកមួយនេះក៏មានទីតាំងបូរាណដ្ឋាន និងតំបន់ការពារបេតិកភ័ណ្ឌផងដែរ ដែលគ្រប់គ្រងការពារដោយអាជ្ញាធរជាតិអប្សរា។ ទោះជាយ៉ាងនេះក្តី អាជ្ញាធរជាតិអប្សរា មានក្រុមការងារសហគន៍ប្រចាំស្រុកបន្ទាយស្រី ឈរជាប់ជាប្រចាំ ដើម្បីសម្របសម្រួលសំណូមពរជូនប្រជាពលរដ្ឋ លើការប្រើប្រាស់ដីធ្លីនិងសាងសង់លំនៅដ្ឋានជាដើម។ អាជ្ញាធរជាតិអប្សរា មានគោលការណ៍អប់រំប្រជាពលរដ្ឋសហគមន៍ផងដែរ ដើម្បីបញ្ជ្រាបនូវការយល់ដឹង និងចូលរួមការពារតំបន់បេតិកភណ្ឌទាំងអស់គ្នា៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
