នៅព្រឹកថ្ងៃទី០៦ ខែវិច្ឆិកា ឆ្នាំ២០២០ ក្រសួងទេសចរណ៍ សហការជាមួយរដ្ឋបាលខេត្តសៀមរាប បានរៀបចំសិក្ខាសាលាមួយ ស្ដីពី ប្រតិបត្តិការអាជីវកម្មទេសរណ៍ក្នុងដំណាក់កាលកូវីដ១៩ ” វិធានសុវត្ថិភាពទេសចរណ៍ និងយន្តការលើកទឹកចិត្ត” ក្នុងគោលបំណងផ្សព្វផ្សាយពី ការអនុវត្តសុវត្ថិភាពទេសចរណ៍ វិធានការលើកទឹកចិត្ត និងគាំពារដល់អាជីវកម្មទេសចរណ៍បន្ត សម្រាប់ឆ្នាំ២០២១ខាងមុខ។
ឯកឧត្តម សុង តុងហាប់ រដ្ឋលេខាធិការក្រសួងទេសចរណ៍ និងជាអនុប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ ក្រសួងទេសចរណ៍ លើកឡើងថា សម្រាប់ឆ្នាំ២០២០ ដោយសារវិបត្តិជាសកលនៃជំងឺកូវីដ១៩ នៅឆ្នាំ២០២០នេះ ទេសចរណ៍អន្តរជាតិនៅកម្ពុជា ត្រូវបានព្យាករណ៍ថា នឹងប៉ះពាល់ក្នុងរង្វង់ ៨០ភាគរយ រីឯ ទេសចរណ៍ផ្ទៃក្នុង នឹងប៉ះពាល់៥០ភាគរយ ដែលចំនួននេះ នឹងឲ្យធ្វើឲ្យបាត់បង់ចំណូលជាតិប្រមាណ ៣ពាន់លានដុល្លារអាមេរិច។ ទន្ទឹមនោះ អាជីវកម្មទេសចរណ៍សរុបជិត ៣ពាន់កន្លែងចុះបញ្ជីស្របច្បាប់ ស្មើនឹងជិត៣០ភាគរយ នៃអាជីវកម្មសរុប ត្រូវបានបិទ ឬព្យួរសកម្មភាព។
ឯកឧត្តម រដ្ឋលេខាធិការ បន្ថែមថា ដើម្បីជួយដល់អាជីវកម្មទេសចរណ៍ក្នុងប្រទេស អំឡុងវិបត្តិកូវីដ១៩នេះ រាជរដ្ឋាភិបាលកម្ពុជា បានដាក់ចេញនូវវិធានការចំនួន០៦ជុំ ជាបន្តបន្ទាប់ រួមមាន វិធានការពន្ធដារ វិធានការគាំពារកម្មករ-និយោជិត និងវិធានការលើកលែងកម្រៃ នៃការបន្តអាជ្ញាបណ្ណទេសចរណ៍គ្រប់ប្រភេទ នៅទូទាំងប្រទេសសម្រាប់ឆ្នាំ២០២១។ លើសពីនេះ ក្រសួងទេសចរណ៍ ក៏ដាក់ឆ្លង រាជរដ្ឋាភិបាលនូវទម្រង់នៃការធ្វើដំណើរកម្សាន្តហៅថា Travel Bubble ឬម្យ៉ាងទៀត One Way Closed-Loop Charter Planes សម្រាប់ឆ្នាំ២០២១ ព្រមទាំងឯកសារយុទ្ធសាស្ត្រសំខាន់ៗមួយចំនួនទៀត រួមមាន ផែនទីចង្អុលផ្លូវស្តីពីការស្ដារ និងលើកស្ទួយវិស័យទេសចរណ៍កម្ពុជា ២០២០-២០២៥ ផែនការមេសម្រាប់ការអភិវឌ្ឍវិស័យទេសចរណ៍ខេត្តសៀមរាប ២០២០-២០៣៥ ផែនការមេសម្រាប់ការអភិវឌ្ឍវិស័យទេសចរណ៍ខេត្តកែប ២០២០-២០៣៥ ផែនការមេសម្រាប់ការអភិវឌ្ឍវិស័យទេសចរណ៍ខេត្តមណ្ឌលគិរី ២០២០-២០៣៥ និងផែនការយុទ្ធសាស្ត្រជាតិអភិវឌ្ឍន៍ទេសចរណ៍ ២០២១-២០៣០។
មានប្រសាសន៍ក្នុងឱកាសនោះ លោក ពៅ ពិសិដ្ឋ អភិបាលរងខេត្តសៀមរាប បង្ហាញថា បច្ចុប្បន្ន អាជីវកម្មទេសចរណ៍ កំពុងដំណើរការក្នុងខេត្ត មានចំនួនសរុប ១២១ កន្លែង ស្មើនឹងជាង៧១ភាគរយ។ ដើម្បីជំរុញចលនាទេសចរណ៍ ឲ្យកាន់តែមានភាពសកម្ម និងផ្តល់ទំនុកចិត្តដល់ភ្ញៀវទេសចរ ស្របតាមគោលការណ៍ណែនាំរបស់ក្រសួងទេសចរណ៍ និងក្រសួងសុខាភិបាល រដ្ឋបាលខេត្តសៀមរាប បានរៀបចំវគ្គបណ្តុះបណ្តាល ជនបង្គោលសុវត្ថិភាពទេសចរណ៍ ជូនដល់បុគ្គលិកបម្រើការ ក្នុងវិស័យទេសចរណ៍ក្នុងខេត្ត បានចំនួនមួយវគ្គ និងមានសិក្ខាកាមចូលរួមចំនួន ១២០នាក់ផងដែរ។
អត្ថបទ និង រូបភាព ៖ លោក សេង ផល្លី
