នៅព្រឹកថ្ងៃទី០៦ ខែវិច្ឆិកា ឆ្នាំ២០២០ មន្ទីរទំនាក់ទំនង រដ្ឋសភា និងព្រឹទ្ធសភាខេត្តសៀមរាប សហការជាមួយស្រុកស្រីស្នំ មានរៀបចំវេទិការផ្សព្វផ្សាយ ស្ដីពីច្បាប់ភូមិបាល ស្ថិតក្នុងបរិវេណវត្តជ្រោយនាងងួន ឃុំជ្រោយនាងងួន ស្រុកស្រីស្នំ ខេត្តសៀមរាប ដើម្បីពង្រឹងការយល់ដឹងរបស់ប្រជាពលរដ្ឋ ពីច្បាប់គ្រប់គ្រងដីធ្លីរបស់រាជរដ្ឋាភិបាល កាត់បន្ថយជម្លោះដីធ្លី និងបាតុភាពអសកម្មនានានៅមូលដ្ឋាន។
វេទិការផ្សព្វផ្សាយ មានការចូលរួមពី ថ្នាក់ដឹកនាំ តំណាងមន្ទីរ អង្គភាពជំនាញ លោកអភិបាលស្រុក អាជ្ញាធរមូលដ្ឋាន ប្រជាពលរដ្ឋ និងសិស្សានុសិស្សសរុបជាង៣០០នាក់។
លោក លឹម សុភ័ក្រ ប្រធានមន្ទីរ ទំនាក់ទំនងរដ្ឋសភា និងព្រឹទ្ធសភា លើកឡើងថា កង្វះចំណេះដឹងពីច្បាប់ភូមិបាលនេះ បានធ្វើឲ្យប៉ះពាល់ ដល់ការរស់នៅរបស់ប្រជាពលរដ្ឋ ខាតបង់ប្រយោជន៍ និងបង្កឲ្យមានជម្លោះដីធ្លីជាច្រើន។ វេទិកានេះដែរ គឺជាឱកាសសម្រាប់ ប្រជាពលរដ្ឋ ជាពិសេសសិស្សានុសិស្ស លើកជាសំណួរ ដើម្បីបានយល់កាន់តែច្បាស់ ពីច្បាប់ភូមិបាល និងផ្សព្វផ្សាយបន្ត ដល់ប្រជាពលរដ្ឋដទៃទៀតក្នុងសហគមន៍៕
លោក ហ៊ន់ ឫទ្ធិ អភិបាលស្រុកស្រីស្នំ លើកឡើងថា វេទិកាផ្សព្វផ្សាយនេះ បានជំរុញដល់ស្ថាប័នអង្គភាពសាធារណៈស្ថាប័នរដ្ឋ បំពេញភារកិច្ចប្រកបដោយសក្ដានុពលភាព តម្លាភាព គណនេយ្យភាព និងប្រសិទ្ធភាព តាមរយៈការអនុវត្តច្បាប់ និងបទដ្ឋាគតិយុត្ត ដែលចូលជាធរមាន។
លោកអភិបាលស្រុក ក៏បានអំពាវនាវដល់ អាជ្ញាធរ និងប្រជាពលរដ្ឋ ត្រូវចៀសឲ្យឆ្ងាយពី ការរំលោភបំពានកម្មសិទ្ធិដីធ្លី សាធារណៈ រួមមានដីចំណីថ្នល់ ប្រឡាយ បឹង ស្ទឹង ដីព្រៃឈើជាដើម និងចូលរួមរួមរាយការណ៍ និងទប់ស្កាត់ទាំងអស់គ្នា។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
