នៅព្រឹកថ្ងៃទី០៦ ខែវិច្ឆិកា ឆ្នាំ២០២០ ប្រជាពលរដ្ឋ រងផលប៉ះពាល់ដោយសារវិបត្តិជំងឺកូវីដ១៩ ចំនួន២៨០គ្រួសារ មកពីភូមិចំនួន៨ នៃឃុំធ្លកក្រោម ស្រុកជីក្រែង បានទទួលជំនួយឧបត្ថម្ភ ពីទីភ្នាក់ងារសហប្រតិបត្តិការអន្តរជាតិកូរ៉េ ហៅកាត់ថា កយកា (Koica) តាមរយៈអង្គការ ហាតធូហាត(Heart To Heart) ស្ថិតក្នុងបរិវេណវត្តខ្នារធ្នង់ ភូមិថ្នល់តាសិត ឃុំធ្លកក្រោម ស្រុកជីក្រែង ខេត្តសៀមរាប។
នាយកអង្គការ ហាតធូហាត ប្រចាំកម្ពុជា បានឲ្យដឹងថា ការផ្តល់ជំនួយសង្គ្រោះនាពេលនេះ មានគោលបំណងជួយប្រជាពលរដ្ឋកម្ពុជា ដែលកំពុងជួបប្រទះការខ្វះខាត ដោយសារតែវិបត្តិជំងឺកូវីដ១៩។ ជំនួយនាពេលនេះ ក៏ជាផ្នែកមួយនៃការចូលរួមជាមួយរាជរដ្ឋាភិបាលកម្ពុជា នៅក្នុងការលើកកម្ពស់ជីវភាពប្រជាពលរដ្ឋដែលងាយរងគ្រោះ។
ថ្លែងក្នុងនាមអាជ្ញាធរខេត្ត និងក្នុងនាមមន្ទីរជំនាញ លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានសម្តែងនូវការអរគុណចំពោះ ទីភ្នាក់ងារកយកា និងអង្គការហាតធូហាត ដែលបានផ្តល់នូវជំនួយសង្គ្រោះ ប្រជាពលរដ្ឋ រងផលប៉ះពាល់ដោយសារជំងឺកូវីដ១៩។
ព័ត៌មានជាតិ ថ្មីៗ
ជាមួយនឹងការអរគុណនេះ លោកប្រធានមន្ទីសុខាភិបាល ក៏បានសំណូមពរដល់ប្រជាពលរដ្ឋទាំងអស់ត្រូវចូលរួមទាំងអស់គ្នាក្នុងការរក្សាបាននូវវិធានអនាម័យក្នុងការរស់នៅ ដើម្បីការពារនូវមេរោគឆ្លងផ្សេងៗ ជាពិសេសជំងឺកូវីដ១៩ ដែលកំពុងរាតត្បាតនៅតាមបណ្តាប្រទេសនានាលើសកលលោក។
អំណោយចែកជូនប្រជាពលរដ្ឋនាពេលនេះ រួមមានអង្ករ ទឹកត្រី ទឹកស៊ីអ៊ីវ អំបិល ស្ករស និងសម្ភារៈអនាម័យមួយចំនួនទៀតដូចជាសាប៊ូលាងដៃ ម៉ាស់សុខភាព ជាដើម។
គួរបញ្ជាក់ថា ទីភ្នាក់ងារសហប្រតិបត្តិការណ៍អភិវឌ្ឍន៍អន្តរជាតិនៃសាធារណរដ្ឋកូរ៉េប្រចាំនៅកម្ពុជា ដែលហៅកាត់ថា KOICA តាមរយៈនៃសកម្មភាពរបស់អង្គការ Heart to Heart ក្នុងកាលៈទេសៈនៃវិបត្តិកូវីដ១៩នេះ បានជ្រើសរើសពលរដ្ឋដែលងាយរងគ្រោះបំផុតមកពីឃុំចំនួន៩ នៃខេត្តសៀមរាប ស្មើនឹងជិត២០០០គ្រួសារ ដែលកំពុងទទួលរងផលប៉ះពាល់ មានកង្វះខាតលើជីវភាពរស់នៅប្រចាំថ្ងៃ ត្រូវបានទទួលកញ្ចប់ស្បៀងអាហារ និងកញ្ចប់ថែទាំសុខភាពផងដែរ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
