ព្រឹកនៅថ្ងៃ០៩ ខែវិច្ឆិកា ឆ្នាំ២០២០នេះ រដ្ឋបាលខេត្ដ ថ្នាក់ដឹកនាំ មន្ទីរ អង្គភាព កងកម្លាំងប្រដាប់អាវុធទាំង៣ប្រភេទ រួមទាំងសិស្សានុសិស្ស និងប្រជាពលរដ្ឋជាច្រើនរូប បានចូលរួមអបអរ ទិវាបុណ្យឯករាជ្យជាតិខួបលើក៦៧ (០៩វិច្ឆិកា១៩៥៣-០៩វិច្ឆិកា២០២០) ដែលប្រទេសកម្ពុជា បានទទួលឯករាជ្យពេញបរិបូណ៌ពីសាធារណរដ្ឋបារាំង។
តាមការកត់សម្គាល់ ជារៀងរាល់ឆ្នាំ ការប្រារព្ធទិវាបុណ្យឯករាជ្យជាតិ នៃព្រះរាជាណាចក្រកម្ពុជា ក្នុងខេត្តសៀមរាប តែងតែរៀបចំនៅក្នុងបរិវេណវិមានរំលឹកគុណអតីតវីរយុទ្ធជន នាក្រុងសៀមរាប ដើម្បីសម្តែងពីការដឹងព្រះគុណ ព្រះរាជបេសកកម្ម ដើម្បីជាតិមាតុភូមិ ក្រោមព្រះរាជបូជនីកិច្ច របស់ព្រះករុណាព្រះបាទសម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត។
គួររំលឹកថា ប្រទេសកម្ពុជា បានទទួលឯករាជ្យពេញបរិបូរណ៌ពីអាណានិគមនិយមបារាំង នៅថ្ងៃទី០៩ វិច្ឆិកា ឆ្នាំ១៩៥៣ ក្រោមព្រះរាជបូជនីយកិច្ចរបស់ព្រះករុណា ព្រះបាទសម្ដេច ព្រះនរោត្តម សីហនុ ព្រះបរមរតនកោដ្ឋ ហើយព្រះអង្គ បានសរសេរលិខិតផ្លូវការទៅរដ្ឋាភិបាលបារាំង ដោយអះអាងថា ចាប់ពីថ្ងៃទី ៩វិច្ឆិកា ឆ្នាំ១៩៥៣ តទៅ គឺកម្ពុជា ជាប្រទេសឯករាជ្យមួយ មិនស្ថិតនៅក្រោមអាណានិគមរបស់ប្រទេសណាមួយនោះឡើយ ហើយកម្ពុជា នឹងស្រលាញ់រាប់អានបារាំង ក្នុងឋានៈជាប្រទេសឯករាជ្យដូចគ្នា៕
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
