តាមការបញ្ជាក់របស់លោកវរៈសេនីយ៍ឯក ទេព ពុំសែន អធិការនគរបាលស្រុកពួក បានឲ្យដឹងថា នៅវេលាម៉ោង០៣ និង៣០នាទីទៀបភ្លឺ ឈានចូលថ្ងៃទី០៩ ខែ វិច្ឆិកា ឆ្នាំ២០២០ មានការណីគ្រោះថ្នាក់ចរាចរណ៍មួយកើតឡើង រវាងរថយន្តពីរគ្រឿង ដែលបានបណ្តាលធ្វើឲ្យមនុស្ស ៤នាក់រងរបួសធ្ងន់ ស្ថិតនៅលើកំណាត់ផ្លូវជាតិលេខ៦ ក្នុងភូមិកិត្តិយស ឃុំព្រៃជ្រូក ស្រុកពួក ខេត្តសៀមរាប។
លោកវរៈសេនីយ៍ឯក បានឲ្យដឹងទៀតថា ករណីគ្រោះ ថ្នាក់ចរាចរណ៍ បង្កឡើងដោយរថយន្ត កូរ៉េទម្ងន់ពីរតោនកន្លះ ពាក់ស្លាកលេខសៀមរាប3A-2246 ដឹកទ្រុងដាក់មាន់ បានបើកបរមកពីទិខាងលិច ឆ្ពោះទៅកើត លុះមកដល់ចំនុចកើតហេតុ បានរ៉េចង្កូតទៅចូលគន្លងផ្លូវខាងឆ្វេង ហើយបានទៅបុកជាមួយរថយន្តធុនកាម៉ាសសណ្តោង មួយគ្រឿងពាក់ផ្លាកលេខភ្នំពេញ4A-0673 ដែលមានផ្ទុកជ័តទឹកពេញទ្រុងរថយន្ត ដែលបើកបរក្នុងទិសដៅបញ្ជ្រាសគ្នា ដែលធ្វើឲ្យរថយន្តកាម៉ាស់ រ៉េចង្កូតទៅខាងឆ្វេង ហើយបានធ្លាក់ក្បាលរថយន្តចូលស្រះទឹក។ ចំនែករថយន្តបង្កក៏បានក្រឡាប់នៅលើទ្រូងផ្លូវខូចខាតធ្ងន់ធ្ងរផងដែរ។
ក្រោយកើតហេតុ ជនរងគ្រោះទាំង៤នាក់ខាងលើ ត្រូវបានដឹកទៅសង្គ្រោះនៅមណ្ឌលសុខភាពឃុំព្រៃជ្រូក ហើយបច្ចុប្បន្នបានបញ្ជូនទៅមន្ទីរពេទ្យបង្អែកខេត្តសៀមរាប ដើម្បីធ្វើការព្យាបាលបន្ត។
ចំណែករថយន្តទាំង២ខាងលើត្រូវបានកម្លាំងជំនាញ់យកទៅរក្សាទុកបណ្ដោះអាសន្ននៅអធិការដ្ឋាននគរបាលស្រុកពួក ដើមី្បការដោះស្រាយទៅតាមនីតិវិធីច្បាប់៕
អត្ថបទ និង រូបភាព: គឿនវេត
កែសម្រួល: អ៊ុន ណារាជ្យ
