នៅព្រឹកថ្ងៃទី០៩ ខែវិច្ឆិកា ឆ្នាំ២០២០នេះ ស្រូវពូជក្នុងទម្ងន់១០តោន ដែលជាអំណោយរបស់រាជរដ្ឋាភិបាល តាមរយៈរដ្ឋបាលខេត្តសៀមរាប ត្រូវបានចែកជូនដល់ប្រជាកសិករចំនួន១០០គ្រួសារ មកពី៣ឃុំ រួមមានឃុំកំពង់ផ្កូវ ឃុំតាអាន និងឃុំចន្លាសដៃ ក្នុងស្រុកក្រឡាញ់ ដែលរងផលប៉ះពាល់ធ្ងន់ធ្ងរ ដោយគ្រោះជំនន់ទឹកភ្លៀងកន្លងមកនេះ ហើយពិធីចែកស្រូវពួជនេះ បានធ្វើឡើងនៅសាលាឃុំកំពង់ថ្កូវ។
លោក នាក់ ណេរ៉ុន អភិបាលរងខេត្តសៀមរាប មានប្រសាសន៍ថា ក្រោយពីជំនន់ទឹកភ្លៀងត្រូវបានថមថយទៅវិញ និងស្ថិតក្រោមចំណាត់ការដ៏ខ្ពង់ខ្ពស់ និងឈ្លាសវៃ នៃសម្តេចតេជោប្រមុខរាជរដ្ឋាភិបាលកម្ពុជា លើវិធានការស្តារវិស័យសិកម្មឡើងវិញ ពិសេសចំពោះមុខ គឺសំដៅទៅលើការគិតគូអំពីដំណាំស្រូវ ដែលត្រូវរងការបំផ្លិចបំផ្លាញនោះ។ ច្បាស់ណាស់ថា ដំណាំស្រូវ គឺជាដង្ហើមសេដ្ឋកិច្ចនៃគ្រួសារកសិករ និងជាខ្នងបង្អែកដ៏មានអទិភាពលើវិស៍យសេដ្ខកិច្ចជាតិផងដែរ ដូច្នេះហើយទើបយុទ្ធនាការចែកស្រូវពូជ ត្រូវតែជាសកម្មភាពបន្ទាន់ ក្រោមកិច្ចសហការជាមួយគ្នាដោយ ក្រសួងកសិកម្ម គណៈកម្មាធិការជាតិគ្រប់គ្រងគ្រោះមហន្តរាយ និងអាជ្ញាធរខេត្ត។
បើតាម លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានឲ្យដឹងថា ស្រុកក្រឡាញ់ គឺជាស្រុកគោលដៅទី៦ និងជាស្រុកចុងក្រោយគេ ដែលអាជ្ញាធរខេត្តសៀមរាប ត្រូវបញ្ចប់យុទ្ធនាការចែកស្រូវពូជជូនដល់ប្រជាកសិករ ដែលរងផលប៉ះពាល់ខូចខាតស្រូវស្រែ ដោយជំនន់ទឹកភ្លៀងនារដូវវស្សាកន្លងមក។ មូលដ្ឋានដែលទទួលបានស្រូវពូជនេះរួមមានស្រុក-ក្រុងចំនួន៦ ស្ថិតនៅតាមបណ្តាយផ្លូវជាតិលេខ៦ គឺស្រុកជីក្រែង សូទ្រនិគម ប្រាសាទបាគង ក្រុងសៀមរាប ស្រុកពួក និងស្រុក្រឡាញ់ សារុបជាង ៨០តោន។ ស្រូវពូជទាំងនោះ គឺពូជស្រូវសែនក្រអូប ផលិតដោយក្រសួងកសិកម្ម ពិនិត្យគុណភាពបែងចែកដោយប្រព័ន្ធស្បៀងបម្រុងកម្ពុជា ក្រោមកិច្ចសហការបញ្ជូនទៅកាន់គោលដៅយដោយ គណៈកម្មាធិការជាតិតិគ្រប់គ្រងគ្រោះមហន្តរាយ ជាប្រភេទពូជស្រូវមិនប្រកាន់រដូវ មានអាយុកាលចាប់ពីគ្រាប់ស្រូវធ្លាក់ដល់ដី រហូតដល់ពេលវេលាប្រមូលផល ត្រឹមតែ១១០ថ្ងៃប៉ុណ្ណោះ។
គួរបញ្ជាក់ដែរថា ក្នុងព្រឹត្តិការណ៍ជំនន់ទឹកភ្លៀងកន្លងមកនេះ ផ្ទៃដីបង្ករបង្កើនផលស្រូវនៅខេត្តសៀមរាប ទទួលរងផលប៉ះពាល់ប្រមាណជាង១ម៉ឺនហិចតា ក្នុងនោះផ្ទៃដីដែលរងការខូចខាតធ្ងន់ធ្ងរនិងត្រូវស្តារឡើងវិញ មានទំហំ ប្រមាណជាង៨០០ហិចតាប៉ុណ្ណោះ ដោយសារតែភូមិសាស្រ្តនៃខេត្តសៀមរាប មានផ្ទៃរងទឹកភ្លៀងជាតំបន់ឆ្លងកាត់នៃលំហូរបរិមាណទឹកភ្លៀងពីតំបន់ខ្ពង់រាប ឆ្ពោះទៅកាន់តំបន់វាលទំនាបនៃបឹងទន្លេសាប។ វស្សាឆ្នាំ២០២០នេះ បឹងទន្លេសាបមិនមានជំនន់ខ្លាំង កម្រឹតកម្ពស់ទឹកនៅទាប ដែលមានលទ្ធភាពអាចទទួលស្រូបយកបរិមាណទឹកភ្លៀង ដែលហូរធ្លាក់ពីតំបន់ខាងលើ ដូច្នេះហើយទើបឆ្នាំនេះ ខេត្តសៀមរាបអាចចៀសផុតពីការរងគ្រោះធ្ងន់ធ្ងរនៃជំនន់ទឹកភ្លៀង៕
អត្ថបទ និង រូបភាព៖ ងិន គីមឡេង
