នៅព្រឹកថ្ងៃទី១៧ ខែវិច្ចិកា ឆ្នាំ២០២០នេះ អាជ្ញាធរមីនកម្ពុជា បានប្រគល់ផ្ទៃដីសុវត្ថិភាពជិត៦៩ហិចតា ដែលបានបោសសម្អាតបានទាំងស្រុងនូវ គ្រាប់មីន និងកាកសំណល់សង្គ្រាម ស្ថិតក្នុងភូមិទួលគ្រួស និងភូមិត្រពាំងថ្ម នៃឃុំឃុនរាម ស្រុកបន្ទាយស្រី ខេត្តសៀមរាប ជូនដល់អាជ្ញាធរស្រុក ដើម្បីប្រើប្រាស់ឡើងវិញ។
តាមសេចក្តីរាយការណ៍របស់ អនុសេនីយ៍ឯក អ៊ួន ភារម្យ តំណាងបញ្ជាការការដ្ឋានបោសសម្អាតមីន និងកាកសំណល់សង្គ្រាម នៃតំបន់ផ្ទេរ-ប្រគល់នេះ មានរយៈពេល១០ខែ ចាប់ពីថ្ងៃទី១៨ ខែសីហា ឆ្នាំ២០១៩ និងអនុវត្តន៍ដោយ កងកម្លាំងនៃមជ្ឈមណ្ឌលជាតិ គ្រប់គ្រងកងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាម ដែលហៅកាត់ថា NPMEC និងមានការគាំទ្រមូលនិធិដោយអង្គការ Peace Land Foundation។
បើតាមឯកឧត្តម Liu ZHIJIE អគ្គកុងស៊ុលចិនប្រចាំខេត្តសៀមរាប បង្ហាញថា៖ អង្គការ Peace Land Foundation គឺជាអង្គការក្រៅរដ្ឋាភិបាលមួយ នៃសាធារណរដ្ឋប្រជាមានិតចិន។ ពួកគេ ធ្វើការងារយ៉ាងសកម្មក្នុងការគៀងគរ រកមូលនិធិ ដើម្បីជួយគាំទ្រក្នុងវិស័យមីន ដូចដែលបានឃើញជាលទ្ធផលនៅស្រុកបន្ទាយស្រីនេះ។ កម្ពុជា-ចិន គឺជាអ្នកជិតខាង ជាដៃគូដ៏ល្អនិងស្មោះត្រង់ អាចថា ជាចំណងសម្ព័ន្ធមេត្រីភាពជាបងប្អូនបង្កើត រួមវាសនាតែមួយនៅក្នុងតំបន់។ ក្រៅពីវិស័យមីន ប្រទេសទាំងពីរ ក៏បានហត្ថលេខាលើកិច្ចព្រមព្រាងពាណិជ្ជកម្មសេរីក្នុងតំបន់ បានផ្តល់នូវលក្ខខណ្ឌអំណោយផលជាច្រើន សម្រាប់ជួយជំរុញកិច្ចសហប្រតិបត្តិការណ៍ជាមួយគ្នា ព្រមទាំងគ្រាដ៏លំបាកនៃស្ថានភាពជំងឺឆ្លងកូវីដ-១៩ ទំនាក់ទំនងរបស់មេដឹកនាំនៃប្រទេសទាំង២ បានឆ្លុះបង្ហាញកាន់តែច្បាស់ថែមទៀត អំពីចំណងមិត្តភាពដែកថែប កម្ពុជា-ចិន។
ឯកឧត្តម ព្រំ សុភមង្គល អគ្គលេខាធិការអាជ្ញាធរមីនកម្ពុជា លើកឡើងថា ៖ ផែនការយុទ្ធសាស្ត្រច្បាស់លាស់របស់កម្ពុជា គឺបញ្ចប់ការគម្រាមកំហែងដោយសារមីន ឲ្យអស់ត្រឹមឆ្នាំ២០២៥។ ជាង២០ឆ្នាំកន្លងមកនេះ ទូទាំងប្រទេសកម្ពុជា សម្រេចការរំដោះដីចំការមីនបានប្រមាណជាង ២ពាន់គីឡូម៉ែត្រក្រឡា នៅសល់ប្រមាណជាង ២ពាន់គីឡូម៉ែត្រក្រឡាទៀត ដែលពីត្រឹមពេលនេះ រហូតដល់ឆ្នាំ២០២៥។ នេះជាការបង្ហាញអំពីមហិច្ឆតាខ្ពស់របស់កម្ពុជា ក៏ប៉ុន្តែអ្វីដែលជាបញ្ហាប្រឈមចំពោះការសម្រេចមហិច្ឆតានេះ គឺការស្វែងរកថវិកាគាំទ្រក្នុងប្រត្តិបត្តិការនេះ។
ឯកឧត្តម គូសញ្ជាក់ថា យុទ្ធសាស្រ្តនៃការបោសសម្អាតមីន គឺដើម្បីគោលដៅអភិវឌ្ឍន៍។ ហានិភ័យនៃវត្តមានគ្រាប់មីន គឺធ្វើប្រជាពលរដ្ឋ បារម្ភខ្លាំង ភ័យខ្លាច ហើយមិនបានប្រើប្រាស់ឲ្យអស់លទ្ធភាព លើផ្ទៃដិដែលមាននោះទេ។
អភិបាលស្រុកបន្ទាយស្រី ( លោក ឃឹម ហ្វីណង់ ) ក៏បានបង្ហាញឲ្យដឹងដែរថា៖ មុននេះ ភូមិត្រពាំងថ្ម និងភូមិពើងឆ័ត្រ គឺជាមូលដ្ឋានលំបាកខ្លាំងជាងគេបំផុត។ ជាមួយនឹងការរំដោះផ្ទៃដីចេញពីគ្រាប់មីន អាជ្ញាធរស្រុកបានដោះស្រាយជាបណ្តើៗហើយ បញ្ហាទឹក បញ្ហាភ្លើងអគ្គីសនី និងកំពុងសម្លឹងមើលដៃគូអភិវឌ្ឃន៍ ដើម្បីធ្វើឲ្យដំណើរការលើវិស័យកសិកម្ម ថាតើត្រូវធ្វើអ្វី ដើម្បីតម្រូវតាមតំបន់ដែលមិនសូវសំបូរទឹកនេះ។ ហើយអ្វីដែលសំខាន់សម្រាប់ទៅថ្ងៃអនាគតដែរនោះ គឺវិស័យទេសចរណ៍។
អត្ថបទ និង រូបភាព៖ ងិន គឹមឡេង
កែអត្ថបទសម្រួល៖ សេង ផល្លី
