ដើម្បីជួយដល់បងប្អូនដែលរងការប៉ះពាល់ដោយសារគ្រោះទឹកជំនន់កន្លងមក នៅព្រឹកថ្ងៃទី១៩ ខែវិចិ្ឆកា ឆ្នាំ២០២០នេះ លោក លី សំរិទ្ធ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានទទួលអំណោយជាអង្ករចំនួន១តោន ពីក្រុមហ៊ុន Tan Chong Motor (ក្រុមហ៊ុន Nissan) ខេត្តសៀមរាប ដើម្បីចូលរួមជួយដល់បងប្អូនដែលរងការប៉ះពាល់ដោយសារជំនន់ទឹកភ្លៀង និងចូលរួមនូវទុក្ខលំបាករបស់រាជរដ្ឋាភិបាលកម្ពុជា ក្នុងពេលប្រជាពលរដ្ឋ នៅតាមបណ្តារាជធានី ខេត្ត ជួបនូវបញ្ហាប៉ះពាល់ពីទឹកជំនន់កន្លងមកនេះ។
មានប្រសាសន៍នោះក្នុងនាមឯកឧត្តម ទៀ សីហា អភិបាលខេត្ត លោក លី សំរិទ្ធ ក៏បានធ្វើការថ្លែងអំណរគុណដល់ទឹកចិត្តដ៏ថ្លែថ្លាចំពោះ ក្រុមហ៊ុន Tan Chong Motor (ក្រុមហ៊ុនNissan) ដែលបានផ្តល់អំណោយជាអង្ករ ១តោន ដល់រដ្ឋបាលខេត្តសៀមរាប ដើម្បីជួយដល់បងប្អូនដែលរងការប៉ះពាល់ ដោយសារទឹកជំនន់ ក៏ដូចជាការចូលរួមចែករំលែក និងចូលរួមចំណែករំដោះស្រាយបញ្ហាស្បៀងអាហារជូនបងប្អូនប្រជាពលរដ្ឋ។ ជាមួយគ្នានោះ ប្រមុខរាជរដ្ឋាភិបាល ក៏ដូចអាជ្ញាធរខេត្ត បានយកចិត្តទុកដាក់ខ្ពស់លើបញ្ហាសុខភាពបងប្អូន និងមិនទុកឲ្យបងប្អូនណាម្នាក់ស្លាប់ដោយអាជ្ញាធរមិនដឹងនោះឡើយ ហើយក្នុងនោះដែរអាជ្ញាធរខេត្តក៏បានរៀបចំជាស្បៀង ដែលទទួលបានពីបងប្អូនសប្បុរសជន យកទៅផ្តល់ជូនដល់បងប្អូនប្រជាពលរងផលប៉ះពាល់សារទឹកជំនន់។
អត្ថបទ និង រូបភាព៖ គឿន វ៉េត
