បើតាមលោកវរសេនីយ៍ឯក លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថា កាលវេលាម៉ោង០៨ និង៣០នាទីព្រឹកនៅថ្ងៃទី២០ ខែវិច្ឆិកា ឆ្នាំ២០២០ មានគ្រោះថ្នាក់ចរាចរណ៍បានកើតឡើង ដោយរថយន្តដឹកទំនិញ១គ្រឿង បើកបរមិនប្រយ័ត្នបានទៅបុករថយន្តទំនើប១គ្រឿងទៀត បណ្តាលមនុស្ស៥នាក់រងរបួសធ្ងន់ស្រាល។
លោកវរសេនីយ៍ឯក លឹម សម្បត្តិ បានឲ្យដឹងទៀតថា មុនពេលកើតហេតុរថយន្តទាំង២ខាងលើ បើកបរច្រាស់ទិសគ្នា ដោយរថយន្តមួយគ្រឿងម៉ាក HYUNDAI ពណ៌ខៀវពាក់ផ្លាកលេខស្វាយរៀង 3A.0958 បើកបរដោយឈ្មោះ ម៉េង សុខឃង ភេទប្រុសអាយុ ២២ ឆ្នាំរស់នៅភូមិព្រែកហូ ឃុំព្រែកហូ ស្រុកតាខ្មៅ ខេត្តកណ្តាល បើកបរ ទិសដៅពីកើតទៅលិចក្នុងល្បឿនលឿនលុះមកដល់កន្លែងកើតហេតុក៏បានរ៉េចង្កូត ទៅបុកជាមួយរថយន្ត១គ្រឿងទៀតម៉ាក FORTUNER ពណ៌សពាក់ផ្លាកលេខ សៀមរាប 2B.4299 បើកបរដោយឈ្មោះ លុយ ស៊ីនិត ភេទប្រុអាយុ ៣៣ឆ្នាំ រស់នៅភូមិខ្នារ សង្កាត់ជ្រាវ ក្រុងសៀមរាប និងរបួសអ្នករួមដំណើរនៅក្នុងរថយន្តចំនួន៤នាក់ទៀតរងរបួសធ្ងន់ស្រាល់។
លោកបានបញ្ចាក់ទៀតថា ក្រោយពេលកើតហេតុរួចអ្នកបើកបរ និងអ្នករួមដំណើរទាំង៥នាក់ខាងលើ ត្រូវបានបញ្ជូនទៅសង្គ្រោះនៅពេទ្យឯកជន។ ចំណែករថយន្ត ទាំង២ខាងលើត្រូវបានកម្លាំងសមត្ថកិច្ច យកទៅរក្សាទុកបណ្ដោះអាសន្ននៅអធិការដ្ឋាននគរបាលស្រុកប្រាសាទបាគង។ ចំនែកអ្នកបើករថយន្តបង្ក ត្រូវបានកម្លាំងនគរបាលស្រុកប្រាសាទបាគង កសាងសំណុំរឿង បញ្ជូនទៅដោះស្រាយតាមផ្លូវច្បាប់ នៅការិយាល័យជំនាញនៃស្នងការនគរបាលខេត្តសៀមរាប៕
អត្ថបទ និង រូបភាព៖ គឿន វ៉េត
កែសម្រួល៖ អ៊ុន ណារាជ្យ
