លោកវរសេនីយ៍ទោ ឆាន់ វុទ្ធី នាយរងការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តសៀមរាប បានបញ្ជាក់ថា រាល់បទល្មើសដែលស្ថិតក្នុងប្រភេទបទល្មើសឧក្រិដ្ឋ មិនត្រូវមានការសម្របសម្រួលក្រៅប្រព័ន្ធច្បាប់នោះឡើយ បើសិនជាការប្រព្រឹត្តនោះ បង្កឲ្យមានរបួសស្នាម រហូតធ្វើឲ្យមានពិការភាព ឬបាត់បង់អាយុជីវិត ជាដើម ។
លោកមានប្រសាសន៍ទៀតថា ផ្អែកតាមច្បាប់នៃក្រមព្រហ្ម គឺមិនអនុញ្ញាតឲ្យមន្រ្តីនគរបាលយុត្តិធម៌ ធ្វើការដោះស្រាយក្រៅប្រព័ន្ធច្បាប់នោះទេ ប៉ុន្តែប្រភេទបទល្មើសណាដែលមិនបង្កឲ្យមានភាពធ្ងន់ធ្ងរ ទាំងអាយុជីវិត ទ្រព្យសម្បត្តិ ឬរបួសផ្សេង គឺអាចធ្វើការសម្របសម្រួល ដោយផ្អែកលើឆន្ទៈរបស់ភាគីទាំងសងខាង ។
លោកវរសេនីយ៍ទោ ឆាន់ វុទ្ធី មានប្រសាសន៍យ៉ាងដូច្នេះ ក្នុងកម្មវិធីសន្ទនាមតិ របស់វិទ្យុនិងទូរទស្សន៍ជាតិខេត្តសៀមរាប កាលពីព្រឹកថ្ងៃ២០ ខែវិច្ឆិកា ឆ្នាំ២០២០នេះ ក្រោមប្រធានបទ ការកំណត់ប្រភេទបទល្មើសព្រហ្មទណ្ឌ ។
សូមជម្រាបថា បញ្ញាត្តិក្នុងក្រមព្រហ្មទណ្ឌនៃព្រះរាជាណាចក្រកម្ពុជា បទល្មើសចែកចេញចំនួនបីប្រភេទដូចជា៖ បទល្មើសឧក្រិដ្ឋ ត្រូវជាប់ទោសដាក់ពន្ធនាគារ លើសពី៥ឆ្នាំ ឬទោសធ្ងន់រហូតជាប់ពន្ធនាគារអស់មួយជីវិត , បទល្មើសមជ្ឈឹម ជាប់ទោសដាក់ពន្ធនាគារ ដែលមានថិរវេលាលើសពី ០៦ ថ្ងៃ និងក្រោម ឬស្មើនឹង ៥ឆ្នាំ និង ត្រូវបន្ថែមនូវទោសពិន័យជាប្រាក់ផងដែរ និង បទល្មើសលហុ ដែលជាបទល្មើសស្រាលជាងគេ ត្រូវជាប់ទោសអតិបរិបមាដាក់គុពន្ធនាគារ ពី ០១ ថ្ងៃទៅ០៦ ថ្ងៃ៕
អត្ថបទ ៖ លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
