នៅឆ្នាំ២០១៩ ដោយមានកិច្ចសហការរវាង រដ្ឋបាលខេត្តសៀមរាប មន្ទីរបរិស្ថាន និងអង្គការមូលនិធិទំពាំងស្នងឬស្សី សំណល់ប្លាស្ទិកជាង ៤០០០ការ៉ុង ឬស្មើនឹងទម្ងន់ជិត ២០០ តោន ត្រូវបានប្រមូលចេញពីបឹងទន្លេសាបក្នុងភូមិសាស្ត្រខេត្តសៀមរាប ហើយចំនួននេះបានកើនដល់ជាង ៥០០០ការ៉ុង ឬស្មើនឹងជិត ២៥០ តោន នៅឆ្នាំ២០២០ នេះបើតាមរបាយការណ៍ របស់ក្រសួងបរិស្ថាន ក្នុងឱកាសប្រារព្ធទិវាអនាម័យបរិស្ថានជាតិ ២៣វិច្ឆិកា និងពិធីបុណ្យទន្លេសាបរដូវទឹកសម្រកប្រចាំឆ្នាំ២០២០ ក្រោមប្រធានបទ “អនាម័យបរិស្ថានល្អ សុខភាពសហគមន៍ល្អ” នៅឃុំកំពង់ឃ្លាំង ស្រុកសូទ្រនិគម ខេត្តសៀមរាប។
ទោះបីជាមានកិច្ចសហការល្អ រវាងអាជ្ញាធរខេត្ត និងអង្គការដៃគូ ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន លើកឡើងថា៖ សំណល់ប្លាស្ទិក ដែលហូរចូលក្នុងបឹងទន្លេសាបក្នុងភូមិសាស្ត្រខេត្តសៀមរាប មានការកើនឡើង ដែលសំណល់ទាំងនេះ បានបង្កផលប៉ះពាល់ដល់ប្រព័ន្ធអេកូឡូស៊ី និងជីវៈចម្រុះគ្រប់ប្រភេទនៅក្នុងទឹក រួមនឹងសោភណ្ឌភាពបឹងទន្លេសាបផងដែរ។
ឯកឧត្តមរដ្ឋលេខាធិការ ក៏បានអំពាវនាវដល់ ប្រជាពលរដ្ឋ ចូលរួមជាមួយអាជ្ញាធរ ក្នុងការប្រមូលសំណល់ប្លាស្ទិកចេញពីបឹងទន្លេសាប និងទប់ស្កាត់សំណល់ប្លាស្ទិកហូរចូលទន្លេសាប តាមរយៈនៃការស្ទាក់ចាប់តាមប្រភពទឹកនានា រួមមានស្ទឹង ព្រែកជាដើម។
ព័ត៌មានជាតិ ថ្មីៗ
ជាមួយនោះ លោក ពិន ប្រាកដ អភិបាលរងខេត្តសៀមរាប គូសបញ្ជាក់ថា ការប្រារព្ធទិវា អនាម័យបរិស្ថានជាតិ ២៣វិច្ឆិកា និងពិធីបុណ្យទន្លេសាបរដូវទឹកសម្រកប្រចាំឆ្នាំ២០២០ នឹងផ្ដល់ការយល់ដឹងពីបន្ថែម ពីផលប៉ះពាល់នៃសំណល់ប្លាស្ទិកក្នុងទឹកទន្លេ ដល់ប្រជាពលរដ្ឋក្នុងសហគមន៍ សិស្សានុសិស្ស និងភាគីពាក់ព័ន្ធផ្សេងៗទៀត។ ហើយទិវានេះ ក៏ជាការប្តេជ្ញាចិត្តខ្ពស់ ក្នុងកិច្ចសហការរវាងអាជ្ញាធរខេត្ត អង្គការដៃគូ និងពីគ្រប់មជ្ឈដ្ឋាន ដើម្បីរលើកកម្ពស់សុខភាពមនុស្សនាពេលបច្ចុប្បន្ន និងសម្រាប់កូនចៅជំនាន់ក្រោយៗទៀត។
គួរជម្រាបថា យុទ្ធនាការរើសសំរាមសំណល់ប្លាស្ទិក អនុវត្តន៍ដោយអង្គការមូលនិធិ ទំពាំងស្នងឫស្សី រៀបចំឡើង រយៈពេលមួយសប្ដាហ៍ ក្នុង១ឆ្នាំ ចំនួន២ដង គឺក្នុងរដូវទឹកសម្រក នៅខែ វិច្ឆិកា និងក្នុងរដូវទឹកឡើងអំឡុងខែមិថុនា ដែលមានការចូលរួម ពីមន្ទីរ-អង្គភាពជំនាញ ក្រុមយុវជនមេត្រីភាពបរិស្ថាន និងគាំទ្រថវិកា ដោយអង្គការអន្តជាតិសម្ព័ន្ធភាពស្តារមហាសមុទ្រ ( Ocean Recovery Alliance )។ យុទ្ធនាការនេះ ផ្តោតសំខាន់ លើការប្រមូលតែសំណល់ប្លាស្ទិកប៉ុណ្ណោះ ដែលវាជាប្រភេទសំណល់មានអាយុរាប់រយឆ្នាំ បង្កហានិភ័យខ្ពស់ គំរាមកំហែងទាំងជីវិតមនុស្ស និង សត្វ។ ក្នុងនោះ សហគមន៍គោលដៅជាប់បឹងទន្លេសាបក្នុងខេត្តសៀមរាប អនុវត្តន៍ដោយអង្គការមូលនិធិ ទំពាំងស្នងឫស្សី រួមមានតំបន់ឃុំកំពង់ឃ្លាំង កំពង់ភ្លុក ចុងឃ្នៀស មេជ្រៃ និងតំបន់ផ្នែកខាងក្រោមនៃដងស្ទឹងសៀមរាប។
អត្ថបទ និង រូបភាព៖ ងិន គឹមឡេង
កែសម្រួលអត្ថបទ៖ សេង ផល្លី
