នាថ្ងៃទី២៣ ខែវិច្ឆិកា ឆ្នាំ២០២០ នៅស្រុកសូទ្រនិគម មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប មានរៀបចំវគ្គបណ្តុះបណ្តាលស្តីពី បច្ចេកទេសអង្កេតវាស់ស្ទង់ទិន្នផលស្រូវ ជូនដល់កសិករមកពី ស្រុកចំនួន៤ ក្នុងខេត្តសៀមរាប រួមមានស្រុកជីក្រែង សូទ្រនិគម ស្វាយលើ និងស្រុកវ៉ារិន សរុបចំនួន៤២នាក់។
វគ្គបណ្តុះបណ្តាលនេះធ្វើឡើង ក្នុងគោលបំណង ទី១ បង្ហាញពីវិធីសាស្ត្រនៃការប្រមូលទិន្នន័យ មុនអនុវត្តន៍ ការធ្វើអង្កេតវាស់ស្ទង់ទិន្នផលស្រូវ។ ទី២ វិធីសាស្ត្រ ក្នុងការអនុវត្ត ការអង្កេតវាស់ស្ទង់ទិន្នផលស្រូវ។ ទី៣ វិធីសាស្ត្រ ក្នុងការចងក្រង និងបញ្ចូលទិន្នន័យក្នុងប្រព័ន្ធ Database។ និងទី៤ វិភាគវាយតម្លៃស្បៀងតាមបណ្តាភូមិ ឃុំ ស្រុក និងទូទាំខេត្ត ព្រមទាំងការរៀបចំគោលនយោបាយកសិកម្ម។
លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លើកឡើងថា៖ ការច្រូតកា់ត់ប្រមូលផលស្រូវ និងការងារអង្កេតវាស់ស្ទង់ទិន្នផលស្រូវ ជាការងារចាំបាច់ ត្រូវធ្វើខាងតែបាន និងមានភាពច្បាស់លាស់ ដើម្បីឈានទៅបូកសរុបវាយតម្លៃទិន្នផលស្បៀង និងធ្វើការកំណត់សន្ទស្សន៍ នៃការវិវឌ្ឍន៍លើវិស័យកសិកម្ម នៅក្នុងផែនការយូទ្ធសាស្រ្តរបស់ខេត្ត ។
លោកប្រធានមន្ទីរ បញ្ជាក់ថា វគ្គបណ្ដុះបណ្ដាលនេះ មិនមែនសម្រាប់ តែដំណាំស្រូវតែមួយមុខទេ នៅមានមុខដំណាំកសិកម្មជាច្រើនទៀត។ លើសពីនេះ ការងារអង្កេតវាស់ស្ទង់ទិន្នផល នឹងជួយធ្វើឲ្យការស្រង់ទិន្នន័យ មានភាពជឿជាក់ និងសុក្រឹត្យ និងប្រែក្លាយកសិកម្មតាមបែបយថាផល ដែលពឹងលើធម្មជាតិទាំងស្រុង ហើយឈានទៅរក ផលិតកម្មប្រពលវប្បកម្ម ដែលផ្ដល់នូវទិន្នផលខ្ពស់ ជាមួយបច្ចេកទេសថ្មី។ បន្ថែមពីនោះ វាក៏នឹងលើកកម្ពស់ផលិតភាព ការដាំដំណាំ ដែលមានសក្តានុពល សមស្របតាមតម្រូវការទីផ្សារ រួមទាំងការចិញ្ចឹមសត្វ និងវារីវប្បកម្មជាលក្ខណៈពាណិជ្ជកម្ម ផងដែរ។
គួរជម្រាបថា វគ្គបណ្ដុះបណ្ដាលនេះ នឹងរៀបចំនៅតាមបណ្ដាស្រុកគោលដៅជាបន្តបន្ទាប់ សម្រាប់ពង្រឹងសមត្ថភាពកសិករ មន្ត្រីកសិកម្ម នៃបណ្ដាក្រុង-ស្រុកទាំង១២ ក្នុងខេត្តសៀមរាប។
អត្ថបទ និង រូបភាព៖ យូ វង្ស
កែសម្រួលអត្ថបទ៖ សេង ផល្លី
