កាលពីថ្ងៃទី២២ ខែវិច្ឆិកា ឆ្នាំ២០២០ ក្រុមរួមគ្នាដើម្បីការងារសង្គម និងក្រុមសហស្សវត្សមនុស្សធម៌ បាននាំយកសម្ភារៈសិក្សាមួយចំនួន និងកង់ចំនួន១០គ្រឿង ដើម្បីចែកជូនសិស្សានុសិស្សចំនួន ១៥០នាក់ នៃសាលាបឋមសិក្សាត្រពាំងទឹម ស្ថិតនៅភូមិត្រពាំងទឹម ឃុំតាសៀម ស្រុកស្វាយលើ ខេត្តសៀមរាប។
អញ្ជើញជាអធិបតីក្នុងឱកាសនោះ ឯកឧត្តម សួស សុខចាន់ សមាជិកក្រុមប្រឹក្សាខេត្តសៀមរាប លើកឡើងថា កុមារជាគ្រាប់ពូជ ប្រកបដោយសក្តានុពល ហើយក៏ជាថាមពលរបស់សង្គមទៅអនាគតផងដែរ។ ទន្ទឹមនោះ សិស្សានុសិស្សត្រូវខិតខំសិក្សារៀនសូត្រ ឲ្យបានខ្ជាប់ខ្ជួន និងត្រូវមានអនាម័យខ្ពស់ ជាពិសេសអំឡុងវិបត្តិជំងឺកូវីដ១៩ ដែលនៅតែបន្តរីករាលជាសកលនៅឡើយ។
ព័ត៌មានជាតិ ថ្មីៗ
តាមការឲ្យដឹង លោក ញាណ តុលា អ្នកសម្របសម្រួល និងដឹកនាំកម្មវិធី នេះជាលើកទី១៦ហើយ ដែលក្រុមរួមគ្នាដើម្បីការងារសង្គម និងក្រុមសហស្សវត្សមនុស្សធម៌ បាននាំយកសម្ភារសិក្សា ក៏ដូចជាថវិកាមួយចំនួនជូនដល់សិស្សានុសិស្សក្រីក្រ និងទុរគតជននៅទីជនបទ ហើយថវិកាទាំងអស់នោះ មានការចូលរួមឧបត្ថម្ភគាំទ្រពីសប្បុរសជននានា ក្នុងប្រទេសនិងក្រៅប្រទេស។
គួរជម្រាបថា សកម្មភាពរបស់ សប្បុរធម៌នេះ បានចាប់ផ្តើមនៅឆ្នាំ២០១៥ និងជាការស្ម័គ្រចិត្តរបស់យុវជន និស្សិត អ្នកជំនួញ ក្នុងនោះពួកគេ បានសាងសង់ផ្ទះជូនទុរគតជន មានឈ្មោះថា ផ្ទះរួមចិត្ត នៅស្រុកអង្គរជុំ ខេត្តសៀមរាប ១ខ្នង, ផ្ទះរួមចិត្ត នៅស្រុកពួក ខេត្តសៀមរាប និងការប្រគុំតន្ត្រីសប្បុរសធម៌ តាមទីសាធារណផងដែរ។
អត្ថបទ និង រូបភាព៖ យូ វង្ស
កែសម្រួលអត្ថបទ៖ សេង ផល្លី
