ទោះបីស្ថានភាពជំងឺកូវីដ-១៩នៅបន្តរីករាលជាសកលក្ដី ប៉ុន្តែដំណើរការនៃការប្រឡងមធ្យមសិក្សាទុតិយភូមិ ឬហៅថាបាក់ឌុបសម្រាប់ឆ្នាំ២០២០ នៅតែបន្តជាប្រក្រតីដដែល ហើយនៅឆ្នាំនេះដែរ បេក្ខជនប្រឡងក្នុងខេត្តសៀមរាប មានចំនួនសរុប ៩,៤៦៤នាក់ កើនឡើងជាង១១ភាគរយ បើធៀបនឹងឆ្នាំ២០១៩ មានចំនួន៨,៤៨៨នាក់ នេះបើតាមរបាយការណ៍របស់ មន្ទីរអប់រំយុវជន និងកីឡា ខេត្ដសៀមរាប បានបង្ហាញក្នុងកិច្ចប្រជុំ ពិភាក្សាស្ដីពីវិធានការទបស្កាត់កូវីដ១៩ នៅថ្ងៃប្រលងបាក់ឌុប ថ្ងៃទី២៤ខែវិច្ឆិកាឆ្នាំ២០២០នេះ។
លោក ពិន ប្រាកដ អភិបាលរងខេត្តសៀមរាប លើកឡើងថា ទោះបីការប្រឡងមធ្យមសិក្សាទុតិយភូមិ នៅតែបន្ត ក្នុងវិបត្តិកូវីដ-១៩ ប៉ុន្តែរដ្ឋបាលខេត្ត បានចាត់វិធានការយ៉ាងហ្មត់ចត់ ក្នុងការពារការរីករាលដាលនៃជំងឺកូវីដ-១៩ នៅតាមមណ្ឌលប្រឡងទាំង១៣ក្នុងក្រុ ដោយបានណែនាំដល់ មន្ទីរសុខាភិបាលខេត្ត សហការជាមួយ មន្ទីរអប់រំយុវជន និងកីឡា ព្រមទាំងសមត្ថកិច្ចពាក់ព័ន្ធ ត្រូវរៀបចំកន្លែងចេញចូល នៅថ្ងៃប្រលង ឲ្យបានត្រឹមត្រូវតាមការណែនាំរបស់ក្រសួងសុខាភិបាល។ រួមមានការពាក់ម៉ាស ការរក្សាគម្លាត ការវាស់កម្ដៅ កន្លែងលាងដៃនឹងទឹកអាកុល និងត្រៀមកន្លែងរក្សាទុក ដាច់ដោយឡែក ចំពោះបេក្ខជនប្រលង ឬគណៈកម្មការប្រលង ដែលមានកម្ដៅលើសពី៣៧.៥អង្សារឡើងទៅ។
គួរជម្រាបថា សម័យប្រឡង មធ្យមសិក្សាទុតិយភូមិ ឬហៅថាបាក់ឌុបសម្រាប់ឆ្នាំ២០២០ នឹងចាប់ផ្ដើមនៅថ្ងៃទី២១ ខែធ្នូ ឆ្នាំ២០២០ សម្រាប់ខេត្តសៀមរាប មានបេក្ខជនប្រឡងសរុប ៩,៤៦៤នាក់ បែងចែកទៅតាមមណ្ឌលចំនួន១៣ ក្នុងក្រុងសៀមរាប។
អត្ថបទ និង រូបភាព៖ បូ សាវី
កែសម្រួលអត្ថបទ៖ សេង ផល្លី
