លេខាធិការដ្ឋានរៀបចំការបោះឆ្នោតខេត្ដសៀមរាប ប្រជុំផ្សព្វផ្សាយ ស្ដីពីការបិទផ្សាយបញ្ជីបោះឆ្នោតដំបូង និង
បញ្ជីឈ្មោះអ្នកដែលនឹងត្រូវលុបចេញពីបញ្ជីបោះឆ្នោត
នៅព្រឹកថ្ងៃទី២៥ ខែវិច្ឆិកា ឆ្នាំ២០២០ នៅលេខាធិការដ្ឋានរៀបចំការបោះឆ្នោតខេត្ដសៀមរាប មានរៀបចំកិច្ចប្រជុំ ស្ដីពី ការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកដែលនឹងត្រូវលុបចេញពីបញ្ជីបោះឆ្នោត នៃឃុំ-សង្កាត់ សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២០ ដែលមានការចូលរួមពី តំណាងអាជ្ញាធរខេត្ត តំណាងគណបក្សចំនួន៦ និងតំណាងអង្គការ-សមាគមចំនួន៤។
លោក នឹម វ៉ាន់សំ ប្រធានលេខាធិការដ្ឋាន រៀបចំការបោះឆ្នោតខេត្តសៀមរាប លើកឡើងថា ការពិនិត្យបញ្ជីឈ្មោះបោះឆ្នោត និងបញ្ជីឈ្មោះ អ្នកដែលត្រូវលុបចេញពីបញ្ជីបោះឆ្នោត មានគោលបំណងផ្សព្វផ្សាយ ដល់ប្រជាពលរដ្ឋអញ្ជើញទៅពិនិត្យ ផ្ទៀងផ្ទាត់ឈ្មោះ និងទិន្នន័យផ្សេងៗរបស់ខ្លួនក្នុងបញ្ជីបោះឆ្នោត ព្រមទាំងកែតម្រូវ តាមរយៈការប្ដឹងតវ៉ា ឬប្ដឹងជំទាស់ ប្រសិនបើរកឃើញថាទិន្នន័យរបស់សាម៉ីខ្លួនពុំត្រឹមត្រូវ។
លោក នឹម វ៉ាន់សំ បញ្ជាក់ថា បញ្ជីបោះឆ្នោតដំបូង និងបញ្ជីឈ្មោះអ្នកដែលនឹងត្រូវលុបចេញពីបញ្ជីបោះឆ្នោត នឹងធ្វើការបិទផ្សាយនៅតាមសាលាឃុំ-សង្កាត់ និងនៅទីតាំងណាមួយក្នុងឃុំ-សង្កាត់ទូទាំងប្រទេស នៅថ្ងៃទី២៧ ខែវិច្ឆិកា ឆ្នាំ២០២០ខាងមុខនេះ។ លើសពីនេះ ប្រជាពលរដ្ឋទូទៅ អាចពិនិត្យការបិទផ្សាយនេះ តាមរយៈគេហទំព័ររបស់ គណៈកម្មការរៀបចំការបោះឆ្នោត (គ.ជ.ប) (ដែលមានអាសយដ្ឋាន www.voterlist.nec.gov.kh) ឬចូលតាមកម្មវីធីទូរស័ព្ទទំនើប (App) Voterlist KH។
លោក បញ្ជាក់បន្ថែមថា ក្នុងករណី ប្រជាពលរដ្ឋ រកឃើញថា មានបញ្ហាលើទិន្នន័យរបស់ខ្លួន នៅលើបញ្ជីបោះឆ្នោតដំបូងនេះ ពួកគេអាចប្ដឹងតវ៉ា ឬប្ដឹងជំទាស់ មកលេខាធិការដ្ឋានរៀបចំការបោះឆ្នោតខេត្ដសៀមរាប ចាប់ពីថ្ងៃទី២៨ វិច្ឋិកា ដល់ ថ្ងៃទី២ ខែធ្នូឆ្នាំ២០២០។
អត្ថបទ និង រូបភាព៖ ហាំ ម៉េងហួត
កែសម្រួលអត្ថបទ៖ សេង ផល្លី
