គណៈប្រតិភូព្រឹទ្ធសភា រដ្ឋសភា ក្រសួងស្ថាប័នជាតិ អាជ្ញាធរខេត្តសៀមរាប និងអង្គភាពស្ថាប័ននានា អញ្ជើញគោរពវិញ្ញាណក្ខន្ធឯកឧត្តម អ៊ឹង ហឿន ប្រធានក្រប្រឹក្សាខេត្តសៀមរាប
នៅថ្ងៃទី២៦ ខែ វិច្ឆិកា ឆ្នាំ២០២០នេះ គណៈប្រតិភូព្រឹទ្ធសភាជាតិ ដឹកនាំដោយឯកឧត្តម សួន លន់ សមាជិកព្រឹទ្ធសភា មណ្ឌលភូមិភាក៤ គណៈប្រតិភូរដ្ឋសភា ដឹកនាំដោយឯកឧត្តមបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប គណៈប្រតិភូក្រុមប្រឹក្សាខេត្ត ដឹកនាំដោយ ឯកឧត្តម អ៊ាន ឃុន ប្រធានស្តីទីក្រុមប្រឹក្សាខេត្ត គណៈប្រតិភូអាជ្ញាធរខេត្ត ដឹកនាំដោយ ឯកឧត្តម ទៀ សីហា អភិបាល នៃគណៈអភិបាលខេត្ត មេបញ្ជាការយោធភូមិភាគទី៤ ស្នងការដ្ឋាននគរបាលខេត្ត កងរាជអាវុធហត្ថខេត្ត និងរដ្ឋបាលក្រុងស្រុក ព្រមទាំងអគ្គកុងស៊ុលសាធារណរដ្ឋសង្គមនិយមវៀតណាម បានអញ្ជើញគោរពវិញ្ញាណក្ខន្ធ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និងរំលែកទុក្ខដ៏ក្រៀមក្រំបំផុត ចំពោះក្រុមគ្រួសារនៃសព នៅគេហដ្ឋានស្ថិតនៅភូមិទ្រៀក សង្កាត់សៀមរាប ក្រុងសៀមរាប ខេត្តសៀមរាប។
មរណភាពរបស់ឯកឧត្តម អ៊ឹង ហឿន គឺការបាត់បង់ នូវថ្នាក់ដឹកនាំមួយដ៏ឆ្នើម ក្នុងការចូលរួមការពារ សន្តិភាព ស្ថេរភាពនយោបាយជូនប្រទេសជាតិ និង ការរីកចម្រើនគ្រប់វិស័យទាំងអាណាចក្រ និងពុទ្ធចក្រ ក្រោមការដឹកនាំ របស់សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ក្នុងឱកាសដ៏សោកសៅនេះ គណៈប្រតិភូទាំងអស់ បានអញ្ជើញបូជាទៀន-ធូប តាមគន្លងប្រពៃណីព្រះពុទ្ធសាសនា ជាកិច្ចជូនដំណើរចុងក្រោយ និងឧទ្ទិសបួងសួងជូនដល់ដួងវិញ្ញាណក្ខន្ធ ឯកឧត្តម អ៊ឹង ហឿន បានសោយសុខក្នុងសុគតិភពជានិច្ចនិរន្តន៍។
គួរជម្រាបថា ក្នុងពិធីគោរពវិញ្ញាណក្ខន្ធ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាបនេះ ចាប់ផ្ដើមពីថ្ងៃទី២៦ ដល់២៧ ខែវិច្ឆិកា ឆ្នាំ២០២០ នៅគេហដ្ឋានសពស្ថិតនៅភូមិទ្រៀក សង្កាត់សៀមរាប ក្រុងសៀមរាប ខេត្តសៀមរាប និងធ្វើការដង្ហែសពចេញពីគេហដ្ឋាន ឆ្ពោះទៅឈាបនដ្ឋានវត្តពោធិ៍បន្ទាយជ័យ ស្ថិតក្នុងសង្កាត់សៀមរាប ក្រុងសៀមរាប នៅវេលាម៉ោង៣:០០រសៀល ថ្ងៃទី២៨ ខែវិច្ឆិកា ឆ្នាំ២០២០។
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
