វិទ្យាល័យអារញ្ញសាគរ ស៊ី អែហ្វ ស៊ី ប្រារព្ធទិវាពិភពលោកលាងសម្អាតដៃ និងទិវាអនាម័យនៅតាមគ្រឹះស្ថានសិក្សាក្នុងបរិបទនៃជំងឹកូវីដ-១៩
ក្រោមការឧបត្ថម្ភពីអង្គការថែរក្សាដើម្បីកម្ពុជា (Caring for Cambodia . CFC) នៅព្រឹកថ្ងៃទី២៦ ខែវិច្ឆិកា ឆ្នាំ២០២០នេះ វិទ្យាល័យអារញ្ញសាគរ ស៊ី អែហ្វ ស៊ី ដែលស្ថិតក្នុងសង្កាត់សៀមរាប ក្រុងសៀមរាប បានប្រារព្ធទិវាពិភពលោកលាងសម្អាតដៃ និងទិវាអនាម័យនៅតាមគ្រឹះស្ថានសិក្សាក្នុងបរិបទនៃជំងឹកូវីដ-១៩ ក្រោមប្រធានបទ ៖ លាងសម្អាតដៃសម្រាប់ទាំងអស់គ្នា ក្នុងគោលបំណងរំលឹកដល់ការលើកកម្ពស់ការផ្សព្វផ្សាយអំពីសារៈសំខាន់នៃអនាម័យដៃ តាមរយៈការលាងសម្អាតដៃដោយសាប៊ូ និងការបំផុសឱ្យមានការផ្លាស់ប្តូរមួយចាប់ពីស្ថាប័នគោលនយោបាយថ្នាក់ជាតិ រហូតដល់អ្នកអនុវត្តសកម្មភាពនៅតាមសហគមន៍មូលដ្ឋាន ។
លោក លី ប៊ុនណា ប្រធានមន្ទីរអប់រំយុវជននិងកីឡាខេត្ត តំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលខេត្តសៀមរាប មានប្រសាសន៍ថា ការប្រារព្ធទិវាពិភពលោកលាងសម្អាតដៃ និងអនាម័យនៅតាមគ្រឹះស្ថានសិក្សានាពេលនេះ គឺជាការជួយ ជំរុញបន្ថែមទៀត សម្រាប់ចូលរួមដើម្បីឈានទៅសម្រេចគោលដៅរបស់រាជរដ្ឋាភិបាល ដែលបានកំណត់នៅឆ្នាំ២០២៥ ព្រោះថាការលាងសម្អាតដៃនេះ នឹងកាត់បន្ថយអត្រាឆ្លងជំងឺផ្សេងៗ តាមរយៈដៃមិនស្អាត ពិសេសកាត់បន្ថយអត្រាមរណភាពរបស់កុមារទាក់ទងនឹងជំងឺរាក ជំងឺរលាកផ្លូវដង្ហើម និងបញ្ហាកង្វះអាហារូបត្ថម្ភ ដែលតែងតែកើតឡើងចំពោះកុមារ ដោយគ្រាន់តែអនុវត្តវិធីងាយៗ គឺការលាងសម្អាតដៃនឹងសាប៊ូ ឱ្យបានស្អាតមុនពេលបរិភោគចំណីអាហារ និងក្រោយពេលចេញពីបង្គន់ ដែលនេះជាសកម្មភាពសាមញ្ញៗ ដែលយើងអាចធ្វើបានគ្រប់ៗគ្នានិងគ្រប់ទីកន្លែង ។
លោក លី ប៊ុនណា មានប្រសាសន៍ទៀតថា ក្រសួងបានអនុវត្តគោលការណ៍ណែនាំលក្ខខណ្ឌអប្បបរមាទឹកស្អាត និងអនាម័យ នៅតាមគ្រឹះស្ថានសិក្សាមួយចំនួននៅ តាមរាជធានីខេត្ត ក្នុងនោះខេត្តសៀមរាប ក៏កំពុងបានអនុវត្តកម្មវិធីនេះផងដែរ ដូច្នេះតាមរយៈនេះ សូមឱ្យគ្រប់សាលាទាំងអស់ក្នុងខេត្ត ត្រូវមានបង្គន់ , មានបន្ទប់ទឹក , មានកន្លែងលាងសម្អាតដៃ និងប្រព័ន្ធទឹកស្អាតប្រើប្រាស់ឱ្យបានសមស្រប ហើយចំពោះសាលាដែលមិនទាន់មានកន្លែងលាងសម្អាតដៃ ត្រូវចលនាប្រភពធនធានដើម្បីសាងសង់ឱ្យបាន និង ចាត់តាំងឱ្យសិស្សអនុវត្តការលាងសម្អាតដៃនៅគ្រប់វេនសិក្សា ជាពិសេសចំពោះអាណាព្យាបាល ឬមាតាបិតាសិស្ស ក៏ត្រូវចូលរួមជួយសាលារៀន និងជំរុញកូនចៅរបស់ខ្លួនឱ្យអនុវត្ត ការលាងសម្អាតដៃនេះឱ្យបានគ្រប់ៗគ្នា នៅតាមគេហដ្ឋានរបស់ខ្លួនដែរ ។ សូមបញ្ជាក់ថា ទិវានេះ ត្រូវបានប្រារព្ឋជាលើកដំបូងនៅថ្ងៃទី១៥ ខែតុលា ឆ្នាំ២០០៨ ប៉ុន្តែសម្រាប់ខេត្តសៀមរាប បានចាប់ផ្តើមធ្វើនៅឆ្នាំ២០១៩ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
