ថ្នាក់ដឹកនាំនិងមន្ត្រីរាជការនៃមន្ទីរព័ត៌មានខេត្តសៀមរាប អញ្ជើញគោរពវិញ្ញាណក្ខន្ធឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប
នៅព្រឹកថ្ងៃទី២៧ ខែ វិច្ឆិកា ឆ្នាំ២០២០នេះ ថ្នាក់ដឹកនាំនិងមន្ត្រីរាជការនៃមន្ទីរព័ត៌មានខេត្តសៀមរាប ដឹកនាំដោយឯកឧត្តម លីវ សុខុន ទីប្រឹក្សាក្រសួងព័ត៌មាន និង ជាប្រធានមន្ទីរព័ត៌មានខេត្ត បានអញ្ជើញគោរពវិញ្ញាណក្ខន្ធ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និងរំលែកទុក្ខដ៏ក្រៀមក្រំបំផុត ចំពោះក្រុមគ្រួសារនៃសព នៅគេហដ្ឋានស្ថិតនៅភូមិទ្រៀក សង្កាត់សៀមរាប ក្រុងសៀមរាប ។
ឯកឧត្តម លីវ សុខុន មានប្រសាសន៍ថា មរណភាពរបស់ឯកឧត្តម អ៊ឹង ហឿន គឺជាការបាត់បង់នូវបញ្ញវន្តដ៏ឆ្នើម និងជាឥស្សរជននយោបាយដ៏ប៉ិនប្រសព្វមួយរូបរបស់រាជរដ្ឋាភិបាលកម្ពុជា ដែលកន្លងមក ឯកឧត្តម បានរួមចំណែកយ៉ាងសកម្មក្នុងបុព្វហេតុបម្រើប្រជាពលរដ្ឋ និងសង្គមជាតិដោយស្មោះសរ ព្រមទាំងបានបូជាកម្លាំងកាយ និងប្រាជ្ញាស្មារតី ចូលរួមក្នុងដំណើរការកសាង និងការអភិវឌ្ឍសេដ្ឋកិច្ចសង្គមនៅខេត្តសៀមរាប ជាពិសេសនោះឯកឧត្តម អ៊ឹង ហឿន ក៏ជាមេដឹកនាំដ៏ល្អម្នាក់ផងដែរ ក្នុងអំឡុងពេលដែលនៅជាប្រធានមន្ទីរព័ត៌មានខេត្ត ឯកឧត្ដមតែងតែមានចិត្តមេត្តាករុណា សណ្ដោសប្រណី និង យកចិត្តទុកដាក់ចំពោះសុខទុក្ខរបស់កូនចៅក្រោមឱវាទជានិច្ច ។
ឯកឧត្តម លីវ សុខុន មានប្រសាសន៍បន្ថែមថា ក្នុងឱកាសនេះក្នុងនាមថ្នាក់ដឹកនាំមន្រ្តីរាជការទាំងអស់ នៃមន្ទីរព័ត៌មានខេត្តសៀមរាប សូមសម្ដែងនូវការសោកស្ដាយជាអនេក ចំពោះសព ឯកឧត្តម អ៊ឹង ហឿន ជាទីគោរពស្រឡាញ់ដ៏ខ្ពង់ខ្ពស់ដែលបានខិតខំបម្រើជាតិមាតុភូមិ និងប្រជាពលរដ្ឋក្នុងសង្គមជាតិ ប្រកបដោយភាពសុខសាន្ត និងរីកចម្រើនដូចពេលបច្ចុប្បន្ន និងសូមចូលរួមរំលែកទុក្ខដ៏សែនក្រៀមក្រំ ប្រកបដោយភាពក្ដុកក្ដួលក្នុងចិត្តរកទីបំផុតគ្មានជាមួយលោកជំទាវ ព្រមទាំងក្រុមគ្រួសារ និងញាតិមិត្តទាំងអស់នៃសព ហើយសូមបួងសួងឲ្យវិញ្ញាណក្ខ័ន្ធ ឯកឧត្តម អ៊ឹង ហឿន បានទៅសោយសុខក្នុងសុគតិភព កុំបីឃ្លៀងឃ្លាតឡើយ ។
សូមបញ្ជាក់ថា ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប បានទទួលមរណភាព នៅវេលាម៉ោង ២១និង២០នាទី នាថ្ងៃទី២៣ ខែ វិច្ឆិកា ឆ្នាំ២០២០ ក្នុងជន្មាយុ ៧២ ឆ្នាំ ដោយរោគាពាធ ហើយសពឯកឧត្តមប្រធានក្រុមប្រឹក្សាខេត្តសៀមរាប ត្រូវបានតម្កល់ទុកធ្វើបុណ្យនៅគេហដ្ឋាននៃសព ដើម្បីប្រារព្ធពិធីបុណ្យតាមគន្លងប្រពៃណីព្រះពុទ្ធសាសនា ក្នុងរយៈពេល៧ថ្ងៃ គឺចាប់ពីថ្ងៃទី២៣ រហូតដល់ថ្ងៃទី២៩ ខែវិច្ឆិកា ឆ្នាំ២០២០ ។ តាមកម្មវិធីនៃបុណ្យសពនេះ នៅថ្ងៃទី២៦ និង ថ្ងៃទី២៧ ខែវិច្ឆិកានេះ នឹងមានការអញ្ជើញចូលរួមគោរពវិញ្ញាណក្ខន្ធសពឯកឧត្តម អ៊ឹង ហឿន ពីសំណាក់ស្ថាប័នព្រឹទ្ធសភា រដ្ឋសភា ក្រសួង ខេត្តជិតខាង ក្រុមប្រឹក្សាខេត្តសៀមរាប គណៈអភិបាលខេត្ត មន្ទីរ អង្គភាពនានាក្នុងខេត្ត ក្រុមប្រឹក្សានិងគណៈអភិបាលក្រុងស្រុកទាំង១២ និង ស្ថាប័នឯកជនក្នុងខេត្តសៀមរាប ។
សពឯកឧត្តម អ៊ឹង ហឿន នឹងត្រូវបានប្រារព្ធពិធីដង្ហែចេញពីគេហដ្ឋាន នៅវេលាម៉ោង៣និង៣០នាទីរសៀល នាថ្ងៃទី២៨ ខែវិច្ឆិកា ឆ្នាំ២០២០ ឆ្ពោះទៅប្រារព្ធពិធីបូជានៅវត្តពោធិ៍បន្ទាយជ័យ ស្ថិតក្នុងសង្កាត់សៀមរាប ហើយនៅវេលាម៉ោង០៦ល្ងាច សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប នឹងប្រទានភ្លើងបូជាសព ៕
#មន្ទីរព័ត៌មានខេត្តសៀមរាប
