មន្ត្រី ១៥០រូប នៃមន្ទីរអប់រំ យុវជន និងកីឡារាជធានីភ្នំពេញ សិក្សាស្វែងយល់ពីការគ្រប់គ្រងបេតិកភណ្ឌ ក្នុងរមណីយដ្ឋានអង្គរ
នារសៀលថ្ងៃទី២៧ ខែវិច្ឆិកា ឆ្នាំ២០២០ គណៈប្រតិភូមន្ទីរអប់រំ យុវជន និងកីឡារាជធានីភ្នំពេញ រួមមាន ក្រុមប្រឹក្សាកុមារកម្ពុជា-យុវជនកម្ពុជា លោកគ្រូ អ្នកគ្រូ ចំនួន១៥០រូប បានជួបស្ដាប់បទបង្ហាញ និងធ្វើទស្សនកិច្ច សិក្សាការអភិរក្សនិងអភិវឌ្ឍន៍ប្រកបដោយចីរភាព នៅរមណីយដ្ឋានអង្គរ ពីថ្នាក់ដឹកនាំអាជ្ញាធរជាតិអប្សរា។
លោក ង៉ែត សុខចាន់ ប្រធានការិយាល័យយុវជននៃមន្ទីរអប់រំ និងយុវជនរាជធានីភ្នំពេញ បង្ហាញថា ដំណើរទស្សនកិច្ចសិក្សានេះ គឺចាប់ពីថ្ងៃទី២៦ ដល់២៨ ខែវិច្ឆិកា ឆ្នាំ២០២០ នៅក្នុងតំបន់វប្បធម៌ប្រវត្តិសាស្ត្រនៃខេត្តសៀមរាប ដើម្បីលើកកម្ពស់ការយល់ដឹង បំណិនជីវិត បណ្តុះស្មារតី សាមគ្គីភាព និងគោរពស្រឡាញ់ចំពោះបេតិកភណ្ឌ។ ពិសេសគឺការទទួលបាននូវចំណេះដឹងថ្មីៗតាមរយៈបទបង្ហាញការងារពីអ្នកជំនាញអាជ្ញាធរជាតិអប្សរា ទាក់ទងនឹងកិច្ចការអភិរក្សនិងអភិវឌ្ឍន៍នៅក្នុងរមណីយដ្ឋានអង្គរ។
ព័ត៌មានជាតិ ថ្មីៗ
ក្នុងបទបង្ហាញនោះ ឯកឧត្តម គឹម សុធិន ឯកឧត្តម សុខ សង្វារ អគ្គនាយករង នៃអាជ្ញាធរជាតិអប្សរា រួមនិងរួមនិងមន្ត្រីជំនាញ បាន បង្ហាញអំពីកិច្ចការអភិរក្សប្រាសាទក្នុង និងក្រៅឧទ្យានអង្គរ ដែលជាកិច្ចសហប្រតិបត្តិការជាតិ និងអន្តរជាតិ ព្រមទាំងដំណើរការរៀបចំទេសចរណ៍ និងការគ្រប់គ្រង់ក្នុងតំបន់រមណីដ្ឋានទាំងនោះផងដែរ។
គួរជម្រាបថា ក្រៅពីបទបង្ហាញនោះ ថ្នាក់ដឹកនាំអាជ្ញាធរជាតិអប្សរា បានបង្ហាញពី កិច្ចការអភិរក្ស និងជួសជុលផ្ទាល់ នៅតាមប្រាសាទតាព្រហ្ម អង្គរវត្ត និងអង្គរធំ ជូនដល់គណៈប្រតិភូក្រុមប្រឹក្សាកុមារកម្ពុជា-យុវជនកម្ពុជា លោកគ្រូ អ្នកគ្រូនៃមន្ទីរអប់រំ យុវជន និងកីឡារាជធានីភ្នំពេញផងដែរ៕
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
