នៅព្រឹកថ្ងៃទី៣០ ខែវិច្ឆិកា ឆ្នាំ២០២០នេះ គម្រោងសាងសង់ និងកែលម្អផ្លូវចំនួន៣៨ខ្សែ ក្នុងក្រុងសៀមរាប បានចាប់ផ្ដើមបើកការដ្ឋានជាផ្លូវការហើយ ក្រោមអធិបតីដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
តាមរយៈរបាយការណ៍ ឯកឧត្ដម ស៊ុន ចាន់ថុល ទេសរដ្ឋមន្រ្តី រដ្ឋមន្ដ្រីក្រសួងសាធារណការ និងដឹកជញ្ជូន ផ្លូវទាំង៣៨ខ្សែនេះ មានប្រវែងសរុប ១០៨.៧៤គីឡូម៉ែត្រ ដោយគ្រោងប្រើប្រាស់ថវិកាជាតិសរុបប្រមាណ ១៤០លានដុល្លារអាមេរិក រីឯថវិកាជាង ៩លានដុល្លារអាមេរិកទៀត សម្រាប់ការងារចាំបាច់ ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ដែលនៅក្រៅគម្រោងនេះ។ គម្រោងនេះដែរ នឹងធ្វើឲ្យទីក្រុងសៀមរាប ប្រែក្លាយរូបរាងជាទីក្រុងទំនើប និងទេសចរណ៍ ដ៏មានសក្តានុពល ដែលត្រូវបានរាជរដ្ឋាភិបាលកម្ពុជាកំណត់ ជាតំបន់ស្នូលនៃប៉ូលអភិវឌ្ឍជាតិ ជាគោលដៅទេសចរណ៍វប្បធម៌ប្រវត្តិសាស្រ្ត និងធម្មជាតិ ស្របតាមរូបសាស្ត្រទីក្រុង រួមជាមួយការគិតគូរដល់ការការពារ និងកែលម្អបរិស្ថាន ផាសុកភាពរបស់ប្រជាពលរដ្ឋ និងការរៀបចំអភិវឌ្ឍជាទីក្រុងឆ្លាតវៃ (Smart City) ។
ថ្លែងក្នុងពិធីបើកការដ្ឋាននេះ សម្ដេចតេជោ ហ៊ុន សែន លើកឡើងថា ខណៈការរីកដុះដាលនៃ អគារហាងទំនិញ ផ្ទះសំណាក់ សណ្ឋាគារក្នុងក្រុង កាន់តែច្រើន ផ្លូវនៅក្នុងក្រុងសៀមរាប នៅពុំទាន់ឆ្លើយតបទៅនឹងខេត្តប៉ូលសេដ្ឋកិច្ច និងជាខេត្តទេសចរណ៍ វប្បធម៌ ប្រវត្តិសាស្ត្រ ធម្មជាតិដ៏ស្រស់ស្អាតមួយនេះនៅឡើយទេ។
គួរជម្រាបថា ក្រៅពីគម្រោង សាងសង់ និងកែលម្អផ្លូវចំនួន៣៨ខ្សែក្រុងសៀមរាប សម្ដេចតេជោ ក៏នឹងផ្ដល់ថវិកាជាតិចំនួន ៥លានដុល្លារអាមេរិចផ្សេងទៀត ដើម្បីកែលម្អដងស្ទឹងសៀមរាបទាំងសងខាង ដែលមានប្រវែងសរុបជិត ៩គីឡូម៉ែត្រផងដែរ។
អត្ថបទ៖ សេង ផល្លី
