គិតត្រឹមម៉ោង១១:១៥នាទីព្រឹក ថ្ងៃទី០១ ខែធ្នូ ឆ្នាំ២០២០នេះ មន្ត្រីរាជការ កងកម្លាំងប្រដាប់អាវុធ និង ប្រជាពលរដ្ឋក្នុងខេត្តសៀមរាប ដែលពាក់ព័ន្ធទៅនឹងព្រឹត្តិការណ៍សហគមន៍ ២៨វិច្ឆិកា បានស្ម័គ្រចិត្តផ្ដល់សំណាក ពិនិត្យរកជំងឺកូវីដ-១៩ មានចំនួនសរុប៣៩៨នាក់ហើយ ។
លោក ពិន ប្រាកដ អភិបាលរងខេត្តសៀមរាប បង្ហាញថា សម្រាប់ថ្ងៃដដែលនេះ មនុស្ស១៩២នាក់ ពិនិត្យរកពុំឃើញវិជ្ជមានមេរោគកូវីដ១៩ឡើយ។ រីឯអ្នកពាក់ព័ន្ធទៅនឹងព្រឹត្តិការណ៍សហគមន៍ ២៨វិច្ឆិកា និងអ្នកស្ម័គ្រចិត្តផ្ដល់សំណាក
ជាបន្តបន្ទាប់ កំពុងត្រូវបានមន្ទីរពិសោធន៍ ពិនិត្យរកនៅឡើយ។ បច្ចុប្បន្ន ពួកគេវិលត្រឡប់ទៅវិញ ដោយធ្វើចត្តាឡីស័កនៅនឹងផ្ទះរបស់ខ្លួន និងត្រូវបានរក្សាទំនាក់ទំនងជាមួយក្រុមគ្រូពេទ្យតាមរយៈទូរស័ព្ទ។ ដោយឡែក ប្រជាពលរដ្ឋ ទើបត្រឡប់មកពីបរទេស ចាំបាច់ត្រូវធ្វើចត្តាឡីស័កនៅក្នុងមណ្ឌលរយៈពេល១៤ថ្ងៃ ដោយផ្គត់ផ្គង់អាហារមួយថ្ងៃចំនួន ៣ពេល ព្រមទាំងផ្ដល់សេវេអ៊ិនធើណិតដោយមិនគិតថ្លៃផងដែរ។
លោកអភិបាលរងខេត្ត ក៏បានអំពាវនាវ មន្ត្រីរាជការ កងកម្លាំងប្រដាប់អាវុធ ព្រះសង្ឃ និង ប្រជាពលរដ្ឋទាំងអស់ ត្រូវគោរពតាមគោលការណ៍សុវត្ថិភាព របស់ក្រសួងសុខាភិបាល ព្រមទាំងសេចក្ដីណែនាំរបស់រាជរដ្ឋាភិបាល។ ក្នុងនោះ សូមកុំជឿ និងមានការភ័យស្លន់ស្លោ ចំពោះព័ត៌មានដែលគ្មានប្រភពច្បាស់លាស់ នៅតាមបណ្តាញសង្គម ដែលបង្ក នូវភាពចលាចល អស្ថេរភាពក្នុងសង្គម។ ចំពោះជនណាដែលបានបង្ហោះព័ត៌មានក្លែងក្លាយទាំងនោះ អាជ្ញាធរខេត្តនឹងចាត់វិធានការ ចុះធ្វើការស្រាវជ្រាវ ដើមី្បនាំខ្លួនយកមកធ្វើការផ្តន្ទាទោសទៅតាមផ្លូវច្បាប់ ៕
អត្ថបទ និង រូបថត ៖ លោក ម៉ី សុខារិទ្ធ និង លោក បូ សាវី
កែសម្រួលអត្ថបទ ៖ លោក សេង ផល្លី
