ក្រសួងចំនួន៣ នឹងត្រួតពិនិត្យគុណភាពការស្ថាបនាផ្លូវ ក្នុងគម្រោងសាងសង់ និងកែលម្អផ្លូវចំនួន៣៨ខ្សែក្រុងសៀមរាប
ក្រសួងចំនួន ៣រួមមាន ក្រសួងរៀបចំដែនដី នគរូបនីយកម្ម និងសំណង់ ក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ នឹងធ្វើការត្រួតពិនិត្យ និងវាយតម្លៃ លើគម្រោងសាងសង់ និងកែលម្អផ្លូវចំនួន៣៨ខ្សែ ក្នុងក្រុងសៀមរាប ដើម្បីធានាបានគុណភាពសាងសង់ ស្របតាមបទដ្ឋានបច្ចេកទេស នេះបើតាមការបង្ហាញ ឯកឧត្ដម ស៊ុន ចាន់ថុល ទេសរដ្ឋមន្រ្តី រដ្ឋមន្ដ្រីក្រសួងសាធារណការ និងដឹកជញ្ជូន ក្នុងពិធីបើកការដ្ឋានគម្រោងសាងសង់ និងកែលម្អផ្លូវចំនួន៣៨ខ្សែ នៅថ្ងៃទី៣០ ខែវិច្ឆិកា ឆ្នាំ២០២០។
ព័ត៌មានជាតិ ថ្មីៗ
ឯកឧត្ដម ស៊ុន ចាន់ថុល បន្ថែមថា ក្រុមការងារត្រួតពិនិត្យ និងវាយតម្លៃការងារអង្គភាពសាងសង់ផ្លូវ បង្កើតឡើងតាមការចង្អុលបង្ហាញ របស់ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង ដោយមាន ឯកឧត្ដ ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជាប្រធានក្រុមការងារ ឯកឧត្ដម ស៊ុន ចាន់ថុល ទេសរដ្ឋមន្រ្តី រដ្ឋមន្ដ្រីក្រសួងសាធារណការ និងដឹកជញ្ជូន និង ឯកឧត្តម វង្សី វិស្សុត ជារដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងហិរញ្ញវត្ថុ ជាអនុប្រធានក្រុមការងារ ព្រមទាំងមានក្រុមការងារជាសេនាធិការ ចំនួន៩ទៀត នៅប្រចាំការតាមការដ្ឋាននីមួយៗ។
ឯកឧត្ដម ស៊ុន ចាន់ថុល បញ្ជាក់ថា ការងារស្ថាបនាហេដ្ឋារចនាសម្ព័ន្ធផ្លូវទាំង៣៨ខ្សែ គ្រោងនឹងប្រើថវិកាជាតិចំនួន ១៤០ដុល្លារអាមេរិច រីឯការងាររៀបចំសាងសង់ប្រព័ន្ធបង្ហូរទឹកភ្លៀង និងទឹកកខ្វក់ដែល នៅក្រៅគម្រោងនេះ គ្រោងនឹងប្រើថវិកាជាតិ ៩ដុល្លារអាមេរិច ដោយសាងសង់រយៈពេល១៣ខែ។ ក្នុងនោះ អំឡុងពេលអនុវត្តន៍ការដ្ឋាន អង្គភាពអនុវត្ត ត្រូវធានាឱ្យបាននូវសុវត្ថិភាពនៅតាមការដ្ឋាន និងកិច្ចសហការល្អជាមួយអាជ្ញាធរមូលដ្ឋាន និងក្រុមការងារគ្រប់គ្រងបច្ចេកទេសក្រសួង ជាពិសេស ត្រូវបញ្ចៀសការ កកស្ទះចរាចរណ៍ទៅមករបស់បងប្អូនប្រជាពលរដ្ឋ។
អត្ថបទ៖ សេង ផល្លី
