ក្រោយពីបានមកដល់អាកាសយានដ្ឋានអន្តរជាតិសៀមរាប នៅរសៀលថ្ងៃទី៣០ ខែវិច្ឆិកា ឆ្នាំ២០២០ តាមរយៈជើងយន្តហោះពិសេសមកពីប្រទេសប៉ាគីស្ថាន។ ដំរីឯកោបំផុតរបស់ពិភពលោក ឈ្មោះខាវ៉ាន់ (Kaavan) ត្រូវបានសារព័ត៌មានល្បី និងមនុស្សលើពិភពលោក បង្ហាញនូវការសាទរចំពោះជីវិតថ្មីរបស់វា លើទឹកដីព្រះរាជាណាចក្រកម្ពុជា។
គួររំលឹកថា ដំរីឈ្មោលខាវ៉ាន់ ត្រូវបានប្រទេសស្រីលង្កា ជូនដល់ប្រទេសប៉ាគីស្ថាន ដើម្បីរក្សាទំនាក់ទំនងល្អរវាងប្រទេសទាំងពីរ។ ដំរីជាមិត្តចុងក្រោយរបស់វា បានស្លាប់នៅឆ្នាំ២០១២ ហើយវាបានរស់នៅឯកោ និងក្នុងស្ថានដ៏លំបាកនៅក្នុងសួនសត្វ នៃប្រទេសប៉ាគីស្ថាន។
បច្ចុប្បន្នខាវ៉ាន់ មានវ័យ៣៥ឆ្នាំ បានមកដល់ប្រទេសកម្ពុជា ដោយការសម្រេច របស់តុលាការកំពូល នៃប្រទេសប៉ាគីស្ថាន ដោយមានការតស៊ូមតិអស់រយៈពេល៥ឆ្នាំ ពីអង្គការពិភពលោក ការពារអភិរក្សសត្វ ហៅកាត់ថា ហ្វ័រផា(Four Paws) តារាចម្រៀងប៉ុបរបស់សហរដ្ឋអាមេរិក និងប្រជាជនជាច្រើនលើពិភពលោក តាមប្រព័ន្ធអ៊ិនធើណិត។
ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន បានស្វាគមន៍យ៉ាងកក់ក្ដៅ ចំពោះការមកដល់របស់ខាវ៉ាន់ ព្រមទាំងមានការប្រោសព្រំ ពីព្រះសង្ឃនៅឯព្រលានយន្តហោះផងដែរ។
ឯកឧត្តម លើកឡើងថា ការមកដល់កម្ពុជា ខាវ៉ាន់ មិនឯកោទៀតឡើយ វានឹងមានសេរីភាព និងមានជីវិតរស់នៅក្នុងតំបន់ព្រៃធម្មជាតិអភិរក្ស ដែលអនុញ្ញាតដោយក្រសួងបរិស្ថាន និងគ្រប់គ្រងការពារដោយ អង្គការអភិរក្សដែនជម្រកសត្វព្រៃកម្ពុជា ។
ឯកឧត្តម បានបញ្ជាក់ផងដែរថា ខាវ៉ាន់ នឹងមានគ្រួសារថ្មី នៅក្នុងតំបន់ព្រៃធម្មជាតិ ដែនជម្រកសត្វព្រែ គូលែនព្រហ្មទេព ស្ថិតនៅក្នុងភូមិសាស្រ្តខេត្តឧត្តរមានជ័យ។ គិតមកដល់បច្ចុប្បន្ននេះ ក្រៅពីដែនជម្រកសត្វព្រែ គូលែនព្រហ្មទេព នៅកម្ពុជាមានប្រភេទសត្វដំរីអាស៊ី ប្រមាណពី៤០០ ទៅ៦០០ក្បាល ដែលកំពុងរស់នៅក្នុងតំបន់ព្រៃធម្មជាតិនៃខេត្តមណ្ឌលគិរី រតនគិរី និងនៅតាមជួរភ្នំក្រវាញនៃខេត្តពោធិសាត់។
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
