ការឆ្លងជំងឺកូវីដ-១៩ ក្នុងសហគមន៍ថ្មីៗនេះ សម្ដេចតេជោ បានហៅថាជា “ព្រឹត្តិការណ៍សហគមន៍២៨វិច្ឆិកា”
គិតមកដល់ព្រឹកថ្ងៃទី៣០ ខែវិច្ឆិកា ឆ្នាំ២០២០ សំណាកចំនួន ២,២៤៧សំណាក ត្រូវបានពិនិត្យ ក្នុងចំណោមសំណាកសរុបចំនួន ៣,៣៣២សំណាក ក្នុងនោះមនុស្សចំនួន១៤នាក់ ត្រូវបានរកឃើញថា មានវិជ្ជមានជំងឺកូវីដ១៩។ ចំពោះការឆ្លងចូលសហគមន៍ជាលើកដំបូង និងគ្មានប្រភពច្បាស់លាស់ ត្រូវបានសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហៅថាជា “ព្រឹត្តិការណ៍សហគមន៍២៨វិច្ឆិកា” ក្នុងឱកាសសម្ដេច អញ្ជើញបើកការដ្ឋានផ្លូវ៣៨ខ្សែ ក្នុងក្រុងសៀមរាប នៅព្រឹកនេះ។
សម្ដេចតេជោ បានលើកឡើងថា ព្រឹត្តិការណ៍សហគមន៍២៨វិច្ឆិកានេះ ជាដំណាក់កាលសាកល្បងដ៏ធំរបស់កម្ពុជា ក្នុងការប្រយុទ្ធប្រឆាំងនឹងជំកូវីដ១៩ ដែលចាំបាច់ត្រូវមានការចូលរួមពីប្រជាពលរដ្ឋ និងអាជ្ញាធរទាំងអស់។
សម្ដេចតេជោ ក៏បានណែនាំដល់ ក្រសួងសុខាភិបាលត្រូវបញ្ចេញថវិកា ដែលផ្ដល់ដោយសប្បុរសជននាពេលកន្លងមក ផ្ដល់ជូនអភិបាលគោលដៅ សម្រាប់ផ្គត់ផ្គង់ដល់គ្រួសារក្រីក្រដែលបានធ្វើចត្តាឡីស័កនៅតាមផ្ទះចំនួន ១ម៉ឺន ឬ២ម៉ឺនរៀលក្នុងមួយគ្រួសារ ដោយឡែកអ្នកដែលបានធ្វើចត្តាឡីស័កនៅតាមមណ្ឌល ត្រូវផ្គត់ផ្គង់អាហារជូនពួកគាត់។ លើសពីនោះ សម្ដេចក៏បានអំពាវនាវដល់ អាជ្ញាធរគ្រប់លំដាប់ថ្នាក់ ចូលរួមផ្គត់ផ្គង់ស្បៀងអាហារដល់ជនក្រីក្រ ដែលបាននិងកំពុងធ្វើចត្តាឡីស័កនោះផងដែរ។ ទន្ទឹមនោះ ប្រជាពលរដ្ឋកម្ពុជា ដែលបានមកពិនិត្យសំណាក ឬរកឃើញវិជ្ជមានជំងឺកូវីដ១៩ គឺមិនមានគិតថ្លៃអ្វីទាំងអស់ លើកលែងតែអ្នកមកពីបរទេស តែប៉ុណ្ណោះ។
សម្ដេចតេជោនាយករដ្ឋមន្ត្រី ក៏បានអំពាវនាវដល់ប្រជាពលរដ្ឋទាំងអស់ សូមធ្វើជាអ្នកចាញ់ និងជាអ្នកខ្លាច ដើម្បីប្រយុទ្ធប្រឆាំងនឹងជំងឺកូវីដ១៩ ដោយត្រូវពាក់ម៉ាសឲ្យបានជាប្រចាំ ចៀសវាងការជួបជុំនានា ធ្វើអនាម័យដៃ នឹងអាកុល សាប៊ូ ជែលជាដើម ។
អត្ថបទ៖ សេង ផល្លី
