សម្តេចពិជ័យសេនា ផ្ដល់ភ្លើងបូជាសព ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប
នៅរសៀល ថ្ងៃទី ២៨ ខែវិច្ឆិកា ឆ្នាំ ២០២០ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយមូលដ្ឋាន ខេត្តសៀមរាប បានអញ្ជើញផ្ដល់ភ្លើង បូជាដល់សពឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប នៅវត្តពោធិបន្ទាយជ័យ សង្កាត់សៀមរាប ក្រុងសៀមរាប ។
ក្នុងឱកាសនោះ គេឃើញវត្តមាន ឯកឧត្តម លោកជំទាវជាសមាជិក សមាជិកា ព្រឹទ្ធសភា រដ្ឋសភា, អាជ្ញាធរខេត្ត,មេបញ្ជាការកងកម្លាំងប្រដាប់អាវុធទាំងបី អាជ្ញាធរក្រុង ស្រុក មន្ត្រីរាជការ និង ប្រជាពុទ្ធបរិស័ទ បានអញ្ជើញចូលរួមគោរពវិញ្ញាណក្ខ័ន្ត និង រំលែកទុក្ខយ៉ាងក្រៀមក្រំបំផុតជាមួយក្រុមគ្រួសារ ជាកិច្ចចុងក្រោយនៃសព ។
ក្នុងវិយោគកថា បានរំលេចពីជីវប្រវត្តិ ដែលស្ទើរតែពេញមួយជីវិត ឯកឧត្តម អ៊ឹង ហឿន បានបម្រើជាតិមាតុភូមិ តាំងពី ក្រោយថ្ងៃរំដោះ ៧មករា ១៩៧៩មក ដោយឯកឧត្តមបានបូជាកម្លាំងកាយចិត្តក្នុងបុព្វហេតុជាតិមាតុភូមិ និងបានបន្សល់ស្នាដៃធំៗ រួមទាំងនានាសមទ្ធិផលជាច្រើនទៀតជាមួយរាជរដ្ឋាភិបាល ក្នុងការអភិវឌ្ឍក្នុងខេត្តសៀមរាប ទាំងវិស័យអាណាចក្រ និង ពុទ្ធចក្រ រហូតដល់ថ្ងៃដែលឯកឧត្តមទួលមរណៈភាព ។សម្តេចពិជ័យសេនា ទៀ បាញ់ និង ឯកឧត្តម លោកជំទាវជាសមាជិក សមាជិកា ព្រឹទ្ធសភា រដ្ឋសភា, អាជ្ញាធរខេត្ត,មេបញ្ជាការកងកម្លាំងប្រដាប់ អាវុធទាំងបី អាជ្ញាធរក្រុង ស្រុក មន្ត្រីរាជការ និង ប្រជាពុទ្ធបរិស័ទ បានសម្តែងនូវក្តីសោកស្តាយ អាឡោះអាល័យរកទីបំផុតគ្មាននូវការបាត់បង់ថ្នាក់ដឹកនាំមួយដ៏ឆ្នើមមួយរូប ក្នុងការចូលរួមការពារ រក្សាសន្តិភាព ស្ថេរភាពនយោបាយជូនប្រទេសជាតិ ក្រោមការដឹកនាំ របស់សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ក្នុងឱកាសដ៏សោកសៅនេះ គណៈប្រតិភូទាំងអស់ បានអញ្ជើញបូជាទៀន-ធូប តាមគន្លងប្រពៃណីព្រះពុទ្ធសាសនា ជាកិច្ចជូនដំណើរចុងក្រោយ និងឧទ្ទិសបួងសួងជូនដល់ដួងវិញ្ញាណក្ខន្ធ ឯកឧត្តម អ៊ឹង ហឿន បានសោយសុខក្នុងសុគតិភពជានិច្ចនិរន្តន៍។
គួរជម្រាបថា ក្នុងពិធីគោរពវិញ្ញាណក្ខន្ធ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាបនេះ ចាប់ផ្ដើមពីថ្ងៃទី២៦ ដល់២៧ ខែវិច្ឆិកា ឆ្នាំ២០២០ នៅគេហដ្ឋានសពស្ថិតនៅភូមិទ្រៀក សង្កាត់សៀមរាប ក្រុងសៀមរាប ខេត្តសៀមរាប និងបានធ្វើការដង្ហែសពចេញពីគេហដ្ឋាន ឆ្ពោះទៅឈាបនដ្ឋានវត្តពោធិ៍បន្ទាយជ័យ ស្ថិតក្នុងសង្កាត់សៀមរាប នៅវេលាម៉ោង៣:០០រសៀល ថ្ងៃទី២៨ ខែវិច្ឆិកា ឆ្នាំ២០២០ ហើយនៅវេលាម៉ោង០៦ល្ងាច សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប អញ្ជើញប្រទានភ្លើងបូជាសព ៕
អត្ថបទ និង រូបថត ៖ យូ វង្ស
