បងប្អូនខ្មែរឥស្លាមក្រីក្រចំនួន៥០គ្រួសារ ក្នុងក្រុងសៀមរាប ទទួលបានអំណោយពីសប្បុរសជនសាសនិកឥស្លាមនៅសិង្ហបូរី
បងប្អូនប្រជាពលរដ្ឋដែលជាសាសនិកឥស្លាមក្រីក្រនៅក្នុងក្រុងសៀមរាប ចំនួន៥០គ្រួសារ ទទួលបានអំណោយជាគ្រឿងឧបភោគបរិភោគ ពីសប្បុរសដែលជាសាសនិកឥស្លាមនៅប្រទេសសឹង្ហបុរីដែល តាមរយៈលោកប្រធានគណៈអ៊ីម៉ាំក្រុងសៀមរាប ដែលក្នុងមួយគ្រួសារទទួលបាន អង្ករ២០គីឡូក្រាម , ស្ករស១គីឡូក្រាម , ប្រេងឆា១លីត្រ , ត្រីខ៤កំប៉ុង , មី១០កញ្ចប់ , អំបិល១គីឡូក្រាម , ទឹកដោះគោខាប់២កំប៉ុង និងតែចំនួន២កញ្ចប់ ។
ព័ត៌មានជាតិ ថ្មីៗ
ពិធីចែកអំណោយនេះបានប្រព្រឹត្តទៅ នៅទីកន្លែងវិហារឥស្លាម អាន់នៀក ម៉ាស់ ស្ថិតនៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប
នាព្រឹកថ្ងៃទី២៧ ខែវិច្ឆិកា ឆ្នាំ២០២០នេះ ។
ឯកឧត្តម អែល សៀតសមាជិកក្រុមប្រឹក្សាខេត្ត និងអនុប្រធានសាសនាឥស្លាមខេត្តសៀមរាប មានប្រសាសន៍ថា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានធ្វើឲ្យប្រទេសជាតិមានសុខសន្ដិភាពពេញបរិបូរណ៍ និង មានការអភិវឌ្ឍន៍យ៉ាងឆាប់រហ័ស ជាពិសេសសេរីភាពលើជំនឿសាសនា បានធ្វើឲ្យវិស័យសាសនា មានការរីកចម្រើនឥតឈប់ឈរ ដោយមិនមានការខ្វែងគំនិត ឬ ការរំលោភសិទ្ធិសេរីភាពទៅលើការប្រតិបត្តិវិន័យរបស់សាសនាណាមួយ ផ្ទុយទៅវិញសាសនិកទាំងអស់ រស់នៅប្រកបដោយសុខដុមរមនីយកម្ម នៅក្រោមដំបូលតែមួយរបស់រាជរដ្ឋាភិបាលកម្ពុជា ហើយសម្រាប់គណៈអ៊ីម៉ាំសាសនាឥស្លាមខេត្តទាំងអស់ តែងតែយកចិត្តទុកដាក់ គិតគូរពីសុខទុក្ខក្នុងការរស់នៅរបស់បងប្អូននៅតាមសហគមន៍ខ្មែរឥស្លាមជានិច្ច ។
ក្នុងឱកាសនោះដែរឯកឧត្តម អែល សៀត បានមានប្រសាសន៍លើកទឹកចិត្តដល់សាសនិកឥស្លាមទាំងអស់គ្នា ត្រូវរស់នៅក្នុងសហគមន៍សន្តិភាព ឲ្យមានកិត្តយស ចៀសវាងការប្រកាន់ រើសអើងគ្នា ប្រកាន់ពូជសាសន៍ សាសនានេះ សាសនានោះ ដែលការយល់ឃើញបែបនេះ គឺមិនត្រឹមត្រូវទេ ខណៈដែលរាជរដ្ឋាភិបាលកម្ពុជា បានខិតខំអនុវត្តន៍ នូវគោលនយោបាយសុខដុមនីយកម្មសាសនាបានល្អបំផុត ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
