ពិធីផ្សព្វផ្សាយរបាយការណ៍វឌ្ឍនភាពឆ្នាំ២០១៩ នៃការសម្រេចបានគោលដៅអភិវឌ្ឍប្រកបដោយចីរភាពកម្ពុជា ២០១៦-២០៣០
នៅព្រឹកថ្ងៃទី២៦ ខែវិច្ឆិកា ឆ្នាំ២០២០នេះ ឯកឧត្តម កិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានអញ្ជើញជាអធិបតី ក្នុងពិធីផ្សព្វផ្សាយរបាយការណ៍វឌ្ឍនភាពឆ្នាំ២០១៩ នៃការសម្រេចបានគោលដៅអភិវឌ្ឍ ប្រកបដោយចីរភាពកម្ពុជា ២០១៦-២០៣០។ ពិធីនេះដែរក៏មានការអញ្ជើញចូលរួមពីសំណាក់ឯកឧត្តម កុយ សង សមាជិកក្រុមប្រឹក្សាខេត្ត លោក ង៉ាន់ ភិរុណ អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប រួមជាមួយឯកឧត្តម លោកជំទាវ លោកលោកស្រីគណ:ប្រតិភូ នៃក្រសួងផែនការ
លោក លោកស្រីប្រធាន អនុប្រធានមន្ទីរផែនការខេត្តទាំង ៩ខេត្ត និងលោក លោកស្រីប្រធាន អនុប្រធានមន្ទីរជុំវិញខេត្តផងដែរ។
ឯកឧត្តម កិត្តិសេដ្ឋាបណ្ឌិត ឆាយ ថន បានមានប្រសាសន៍ថា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បច្ចុប្បន្ននេះ យើងទាំងអស់គ្នាពិតជាមានការសាទរ ចំពោះការប្រកាសដាក់ឲ្យអនុវត្តជាផ្លូវការ នូវសមិទ្ធផលដែលយើងទាំងអស់គ្នា ខិតខំរួមគ្នាសម្រេចបាន។ សមិទ្ធផលនេះ គឺជាការបង្ហាញឲ្យឃើញច្បាស់ ពីការប្រែក្លាយការប្តេជ្ញាចិត្តរបស់រាជរដ្ឋាភិបាលកម្ពុជា ដែលជាសមាជិកមួយរបស់អង្គការសហប្រជាជាតិ ក្នុងការអនុវត្ត និងរួមចំណែកធ្វើឲ្យសម្រេចបានរបៀបវារៈឆ្នាំ២០៣០ របស់អង្គការសហប្រជាជាតិ ។ លទ្ធផលនេះ ក៏ជាការបញ្ជាក់ឲ្យឃើញ ពីការរួបរួមសាមគ្គី និងសហការគ្នាយ៉ាងជិតស្និទ្ធពីគ្រប់ភាគីទាំងអស់ ទាំងក្រសួង ស្ថាប័នរបស់រាជរដ្ឋាភិបាលកម្ពុជា ដៃគូអភិវឌ្ឍ សង្គមស៊ីវិល អង្គការមិនមែនរដ្ឋាភិបាល ផែ្នកឯកជន និងភាគីដែលពាក់ព័ន្ធផ្សេងទៀត ក្នុងការរួមចំណែកធ្វើឲ្យកើតមានឡើង នូវសមិទ្ធផលគួរទីជាមោទន: ដែលបាន និងកំពុងធ្វើការផ្សព្វផ្សាយនៅពេលនេះ។
ឯកឧត្តមទេសរដ្ឋមន្ដ្រី បានមានប្រសាសន៍ទៀតថា វឌ្ឍនភាពឆ្នាំ២០១៩ នៃការសម្រេចបានគោលដៅអភិវឌ្ឍ ប្រកបដោយចីរភាពកម្ពុជានេះ គឺជារបាយការណ៍សម្រាប់បំពេញបន្ថែម ដល់របាយការណ៍ត្រួតពិនិត្យថ្នាក់ជាតិ ដោយស្ម័គ្រចិត្តឆ្នាំ២០១៩ ដែលត្រូវបានរៀបចំឡើងដោយមានលក្ខណ:បន្ទាន់ តាមតម្រូវការជាក់ស្តែង គឺត្រូវចាប់ផ្តើមរៀបចំនៅខែកុម្ភ:ឆ្នាំ២០១៩ និងត្រូវបញ្ចប់ឲ្យរួចរាល់នៅខែមិថុនា ឆ្នាំ២០១៩ ព្រោះរបាយការណ៍ត្រួតពិនិត្យថ្នាក់ជាតិ ដោយស្ម័គ្រចិត្តឆ្នាំ២០១៩នេះ ត្រូវយកទៅបង្ហាញនៅក្នុងវេទិកាកម្រិតខ្ពស់ របស់អង្គការសហប្រជាជាតិ នាថ្ងៃទី១៦ ខែកក្កដា ឆ្នាំ២០១៩ នៅទីស្នាក់ការកណ្តាលអង្គការសហប្រជាជាតិ នាបុរីញូយ៉ក សហរដ្ឋអាមេរិករួចមកហើយ។ ដើម្បីបំពេញបន្ថែមលើរបាយការណ៍ ត្រួតពិនិត្យថ្នាក់ជាតិ ដោយស្ម័គ្រចិត្តឆ្នាំ២០១៩ ក្រសួងផែនការបានផ្តួចផ្តើមរៀបចំ របាយការណ៍វឌ្ឍនភាពឆ្នាំ២០១៩ នៃការសម្រេចបានគោលដៅអភិវឌ្ឍ ប្រកបដោយចីរភាពកម្ពុជា នេះឡើង ដោយមានកិច្ចសហការយ៉ាងជិតស្និទ្ធពីក្រសួង ស្ថាប័ន ដៃគូអភិវឌ្ឍ និងភាគីពាក់ព័ន្ធផ្សេងទៀត។
លោក ង៉ាន់ ភិរុណ ក្នុងនាមអាជ្ញាធរខេត្ត ពិតជាមានការសារទរចំពោះរបាយការណ៍ខាងលើនេះ ព្រោះវា គឺជាឯកសារដ៏មានសារ: សំខាន់ ដែលត្រូវបានរៀបចំឡើង ក្រោមកិច្ចខិតខំប្រឹងប្រែងរួមគ្នារបស់ក្រសួង ស្ថាប័ន នៃរាជរដ្ឋាភិបាលកម្ពុជា និងដោយមានការចូលរួមសហការ និងផ្ដល់អនុសាសន៍ពីគ្រប់ភាគីពាក់ព័ន្ធទាំងអស់ តាមរយៈសិក្ខាសាលា ក៏ដូចជាកិច្ចប្រជុំនានាជាច្រើនលើកច្រើនសារ នាពេលកន្លងមក។
លោកបន្តថា ចំពោះរបាយការណ៍នេះ នឹងដើរតួនាទីយ៉ាងសំខាន់ក្នុង ការអនុវត្តគោលនយោបាយអាទិភាពនានារបស់រាជរដ្ឋាភិបាល ដែលបានកំណត់នៅក្នុងគោលដៅអាទិភាពដទៃទៀត ក្នុងយុទ្ធសាស្រ្តចតុកោណដំណាក់កាលទី៤ ដោយបានកំណត់អាទិភាព សូចនាករ និងពេលវេលាច្បាស់លាស់ ដើម្បីសម្រេចឲ្យបានតាមផែនការយុទ្ធសាស្រ្តអភិវឌ្ឍជាតិឆ្នាំ២០១៩-២០២៣ និងចូលរួមចំណែកសម្រេចឲ្យបាននូវក្របខណ្ឌគោលដៅអភិវឌ្ឍន៍ប្រកប ដោយចីរភាពកម្ពុជា ២០១៦-២០៣០។ ជាមួយគ្នានោះអាជ្ញាធរខេត្តសៀមរាប ពិតជាគាំទ្រទាំងស្រុងនូវរបាយការណ៍វឌ្ឍនភាពឆ្នាំ២០១៩នេះ ដែលបានដាក់ចេញជាទិសដៅដ៏ត្រឹមត្រូវសម្រាប់ជំរុញដល់កិច្ចការអភិវឌ្ឍន៍កម្ពុជា ឱ្យមានការរីកចម្រើនលើគ្រប់វិស័យនាពេលដ៏ខ្លីខាងមុខនេះ៕
អត្ថបទ និងរូបភាព៖ អ៊ុន ណារាជ្យ
កែសម្រួលដោយ លីវ សុខុន
