ប្រជាពលរដ្ឋជាង៣០០គ្រួសារ ក្នុងភូមិបណ្ដែតទឹកពាមតាអួរ ខេត្តសៀមរាប បញ្ឈប់ការចោលសំរាមប្លាស្ទិកទៅក្នុងទឹក
ក្នុងរយៈពេល៣ឆ្នាំកន្លងមក តំបន់ផ្នែកខាងក្រោមស្ទឹងសៀមរាប សហគមន៍នេសាទ និងសហគមន៍ទេសចរណ៍ធម្មជាតិនៃតំបន់បឹងទន្លេសាប ចំនួន៥គោលដៅ ត្រូវបាន ចាត់បញ្ចូលទៅក្នុង យុទ្ធនាការអប់រំប្រឆាំងសំណល់ប្លាស្ទិក ក្នុងតំបន់បឹងទន្លេសាបនៃខេត្តសៀមរាប។ កាលពីថ្ងៃទី២៥ ខែវិច្ឆិកា ឆ្នាំ២០២០នេះ អង្គការមូលនិធិទំពាំងស្នងឫស្សី ដែលបានបង្កើតយុទ្ធនាការនេះ បង្ហាញថា ប្រជាសហគមន៍មកពីភូមិពាមតាអួរ ឃុំកែវពណ៌ ស្រុកពួក ខេត្តសៀមរាប ប្រមាណជាង៣០០គ្រួសារ បានចូលរួមអនុវត្ត និងបញ្ឍប់សកម្មភាពបោះចោលសំរាមប្លាស្ទិកទៅក្នុងទឹក ឫការដុតសំរាមបន្តទៀតហើយ។
លោក ស៊ា សុផល ប្រធានអង្គការមូលនិធិទំពាំងស្នងឫស្សី បានបញ្ជាក់ថា ៖ នាពេលកន្លងមក ប្រជាពលរដ្ឋក្នុងតំបន់គោលដៅទាំង៥ រួមមាន សហគមន៍មេជ្រៃ នៃស្រុកពួក កំពង់ភ្លុក នៃស្រុកប្រាសាទបាគង កំពង់ឃ្លាំង នៃស្រុកសូទ្រនិគម សហគមន៍ចុងឃ្នៀស នៃក្រុងសៀមរាប និងតំបន់ផ្នែកខាងក្រោមស្ទឹងសៀមរាប នៃសង្កាត់សៀមរាប បានទទួលការអប់រំ ស្ដីពីការថែរក្សាជីវៈចម្រុះ ដើម្បីបរិស្ថាន និងសុខភាព ជាមួយនឹងការពង្រីកវិសាលភាពវិស័យទេសចរណ៍ នៅតាមតំបន់បឹងទន្លេសាប ដោយផ្តោតទៅលើការសម្អាតសំណល់ប្លាស្ទិក ដែលទាំងនេះ ជាគោលបំណង ក្នុងការឈានទៅរកការបញ្ឈប់ការចោលសំណល់ប្លាស្ទិកក្នុងបឹងទន្លេសាបទាំងស្រុង។
លោក ស៊ា សុផល ក៏បានបង្ហាញពី ការចាប់ផ្ដើម គម្រោងសាកល្បង ដោយបានឧបត្ថម្ភជាអង្ករ និងថវិកាមួយចំនួន ដល់ប្រជាសហគមន៍ ដែលជាការលើកទឹកចិត្ត និងជំរុញឲ្យការចូលរួមរបស់ពួកគាត់ កាន់តែមានប្រសិទ្ធភាព ក្នុងយន្តការប្រមូលសំណល់ប្លាស្ទិកចេញពីតំបន់បឹងទន្លេសាប។
((សំឡេង លោក ស៊ា សុផល ))
គម្រោងនេះដែរ ត្រូវបានក្រសួងបរិស្ថាន គាំទ្រ និងបន្តដាក់ឲ្យអនុវត្តនៅបណ្តាខេត្តផ្សេងៗទៀត ដែលមានភូមិសាស្រ្តជាប់បឹងទន្លេសាប។
លោក អ៊ឹង បារាំង ប្រជាពលរដ្ឋធ្វើដំណើរមកពីភូមិស្វាយចេក ដែលនៅជាប់គ្នានឹងភូមិពាមតាអួរ បានបង្ហាញពីការពេញចិត្ត និងចូលរួមអនុវត្តគម្រោងនេះជារៀងរហូត ដើម្បីធ្វើឲ្យសហគមន៍របស់លោក ចៀសផុតពីផលប៉ះពាល់នៃសំណល់ប្លាស្ទិកទាំងនេះ។
((សំឡេង លោក អ៊ីង បារាំង))
ការប្រារព្ធទិវាអនាម័យបរិស្ថានជាតិ នៅ
គួរជម្រាបថា សហគមន័មេជ្រៃ គឺជាជំហានទី២ បន្ទាប់ពីសហគមន៍កំពង់ឃ្លាំង ដែលអង្គការមូលនិធិទំពាំងស្នងឫស្សី បានអនុវត្តន៍គម្រោងសាកល្បងលើកទឹកចិត្ត ក្នុងយុទ្ធនាការអប់រំប្រឆាំងសំណល់ប្លាស្ទិក ក្នុងតំបន់បឹងទន្លេសាបនៃខេត្តសៀមរាប នៅឆ្នាំ២០២០ ក្នុងឱកាសនោះ ក៏មានការចូលរួមពីម្ចាស់សណ្ឋាគារមួយចំនួនក្នុងក្រុងសៀមរាប អង្គការគាំទ្រសាលាជនបទ និងក្រុមហ៊ុន យើងធ្វើបាន ( PSSBL)ផងដែរ។ គម្រោងដែរនេះ ក៏ជាការចូលរួម នៃ ការប្រារព្ធទិវាអនាម័យបរិស្ថានជាតិ ២៣វិច្ឆិកាផងដែ។
អត្ថបទ និង រូបភាព៖ ងិន គឹមឡេង និង លោក ស៊ាន សុផាត
កែសម្រួលអត្ថបទ៖ សេង ផល្លី
