ក្រុមការងារប្រយុទ្ធប្រឆាំងអំពើជួញដូរមនុស្សខេត្ដសៀមរាប ពិភាក្សាពន្លឿនការដោះស្រាយ និងទប់ស្កាត់ការជួញដូរមនុស្ស
នៅព្រឹកថ្ងៃទី២៥ខែវិច្ឆិកាឆ្នាំ២០២០នេះ ក្រុមសមាជិកលេខាធិការដ្ឋាននៃគណៈកម្មាធិការប្រយុទ្ធប្រឆាំង អំពើរជួញដូរមនុស្ស ហៅកាត់ថា គ.ខ.ប.ជ មានរៀបចំកិច្ចប្រជុំប្រចាំខែ ដើម្បីពិភាក្សា និងរិះរកវិធីសាស្ដ្រពន្លឿនការដោះស្រាយ និងទប់ស្កាត់ការធ្វើសកម្មភាពជួញដូរមនុស្សនៅខេត្ដសៀមរាប ដែលមានការចូលរួមពីមន្ទីរអង្គភាពពាក់ព័ន្ធ ព្រមទាំងតំណាងអង្គការដៃគូពាក់ព័ន្ឋសរុប៥៤នាក់។
លោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាន គ.ខ.ប.ជ ខេត្តសៀមរាប នៃគណៈកម្មាធិការប្រយុទ្ធប្រឆាំងអំពើជួញដូរមនុស្ស មានប្រសាសន៍ថា កិច្ចប្រជុំប្រចាំខែតុលា ឆ្នាំ២០២០ កន្លងទៅ បានពិភាក្សាលើបញ្ហាប្រឈម មួយចំនួន ដែលក្រុមការងារបានអនុវត្តសកម្មភាពប្រយុទ្ធប្រឆាំងអំពើជួញដូរមនុស្ស តាមគ្រប់រូបភាព ដោយមានការចូលរួមសហការពីគ្រប់ភាគីពាក់ព័ន្ឋទាំងអស់ នៅតាមមូលដ្ឋានភូមិ-ឃុំ ដូចជា ធ្វើការផ្សព្វផ្សាយច្បាប់ស្តីពីការបង្ក្រាបអំពើជួញដូរមនុស្ស ការធ្វើអាជីវកម្មផ្លូវភេទ ច្បាប់ពាក់ព័ន្ឋនានា គោលនយោបាយភូមិ-ឃុំមានសុវត្ថិភាព វេទិកាសាធារណៈ ច្បាប់ទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ការធ្វើចំណាកស្រុកដោយសុវត្ថិភាព ការចាក់ស្ប៉តអប់រំ ការផ្សាយតាមវិទ្យុ ទូរទស្សន៍ ជាដើម។ ជាមួយគ្នានោះ ក៏មានការស៊ើបអង្កេត និងបង្ក្រាបបទល្មើស ដើម្បីយកទៅផ្តន្ទាទោសតាមនីតិវិធី ពិសេសការស្រាវជ្រាវស្វែងរកចាប់ និងឃាត់ខ្លួនមេខ្យល់ ។
នៅក្នុងកិច្ចប្រជុំនេះផងដែរ លោកស្រីអភិបាលរងខេត្ត ក៏បានលើកយកបញ្ហាជាច្រើនមកពិភាក្សា ដើម្បីស្វែងរកដំណោះស្រាយរួមគ្នាសម្រាប់ការពារជនរងគ្រោះ និងងាយរងគ្រោះ ដោយអំពើហិង្សាទាក់ទងនឹងយេនឌ័រ ឬការរំលោភបំពានផ្សេងៗ ដែលពាក់ព័ន្ធទៅនឹងច្បាប់ ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
ក្នុងកិច្ចប្រជុំនោះ ក្រុមការងារបានពិភាក្សា និងត្រួតពិនិត្យ៖
១. សេចក្តីព្រាងកំណត់ហេតុ និងបញ្ហាប្រឈមដែលបានដាក់ចេញកាលពីកិច្ចប្រជុំប្រចាំខែតុលា។
២ របាយការណ៍ប្រចាំខែវិច្ឆិកា ឆ្នាំ២០២០។
៣. តាមដាន និងពិភាក្សាលើប្រព័ន្ធ ទទួល – បញ្ជូន ជនរងគ្រោះ ដែលគ្រប់គ្រងដោយមន្ទីរសង្គមកិច្ច និងកិច្ចការនារីខេត្ត រួមនិងទទួលបានមកពី មន្ទីរអង្គភាពពាក់ព័ន្ធ និងអង្គការដៃគូជាតិ-អន្តរជាតិ ដើម្បីធ្វើការកំណត់អត្តសញ្ញាណ និងការស្តារនីតិសម្បទា។
៤. ពិភាក្សាលើផ្តល់ជំនាញវិជ្ជាជីវៈផ្នែកការគ្រប់គ្រងធុរកិច្ច និងសហគ្រិនភាព និងការគ្រប់គ្រងភោជនីយដ្ឋាន ដល់កម្មករ និងយោជិត នៅវិទ្យាស្ថានពហុបច្ចេកទេសភូមិភាគតេជោ សែនសៀមរាប និងវិទ្យាស្ថានជាតិពហុបច្ចេកទេសអង្គរ ដែលបានបាត់បង់ការងារធ្វើក្នុងវិបត្តិកូវីដ១៩ នៅក្នុងខេត្តសៀមរាប ។
៥. បានជំរុញលើការពន្លឿននីតិវិធីតុលាការ លើករណីរបស់ពលករ ដែលបានលោតទឹកពីលើទូកនេសាទ នៅបរទេស ដែលជាករណីចាស់ៗ ។
៦. ពិនិត្យ និងតាមដាននីតិវិធីតុលាការ ពាក់ព័ន្ធនឹងករណីអំពើជួញដូរមនុស្ស និងអំពើហិង្សាទាក់ទងនឹងយេនឌ័រ។
៧. បានពិភាក្សាលើការរៀបចំប្រជុំជាមួយអន្តរសាសនា លើការងារបង្ការទប់ស្កាត់អំពើជួញដូរមនុស្ស ព្រមទាំង បានពិភាក្សាលើបញ្ហាប្រឈមមួយចំនួនទៀតពាក់ព័ន្ធ ដូចជាការរៀបចំកម្មវិធី ផ្តល់ជូនសម្ភារៈ ដល់កុមារតាមម្តាយនៅក្នុងពន្ធនាគារ៕
អត្ថបទ និង រូបភាព៖ បូ សាវី
កែសម្រួលអត្ថបទ៖ សេង ផល្លី
