បន្ទាប់ពីជំនន់ទឹកភ្លៀងការពីពេលថ្មីៗនេះបានបញ្ចប់ ហេដ្ឋារចនាសម្ព័ន្ធនានា មានខូចខាតជាច្រើនកន្លែង ក្នុងនោះទឹកស្អាត ជាបញ្ហាអាទិភាពមួយ សម្រាប់ប្រជាពលរដ្ឋនៅតាមជនបទ។ តាមការបង្ហាញរបស់ ឯកឧត្តម ចាន់ ដារ៉ុង រដ្ឋលេខាធិការ និងជាអ្នកនាំពាក្យ ក្រសួងអភិវឌ្ឍន៍ជនបទ នាទីស្តីការគណៈរដ្ឋមន្រ្តី នៅថ្ងៃទី២៤ ខែវិច្ឆិកា ឆ្នាំ២០២០ សម្រាប់ខេត្តសៀមរាប អណ្ដូងទឹកខូចខាតដោយសារជំនន់ទឹកភ្លៀងជាង៤០០កន្លែង នឹងត្រូវស្ដារឡើងវិញ។
ឯកឧត្តមរដ្ឋលេខាធិការ បញ្ជាក់ថា ក្រសួងអភិវឌ្ឍន៍ជនបទ គ្រោងនឹងស្ដារអណ្តូងទឹកជាង៤ពាន់កន្លែង នៅតាមបណ្ដាខេត្តចំនួន៨ រួមមាន ខេត្តបន្ទាយមានជ័យ បាត់ដំបង ពោធិ៍សាត់ ប៉ៃលិន សៀមរាប ព្រះវិហារ ស្វាយរៀង និងខេត្តកំពង់ចាម។ គម្រោងនេះ នឹងប្រើប្រាស់ថវិកា ៩០ម៉ឺនដុល្លារ ដែលទទួលបានពីរាជរដ្ឋាភិបាល និងការចូលរួមពីអង្គការដៃគូនានា។
ឯកឧត្តម បានអំពាវនាវដល់ប្រជាពលរដ្ឋនៅតាមជនបទ ត្រូវបន្តយកចិត្តទុកដាក់ខ្ពស់ លើបញ្ហាគ្រោះរាំងស្ងួតនាពេលខាងមុខនេះ ដោយរក្សាប្រភពទឹកប្រកបដោយប្រសិទ្ធភាពខ្ពស់ និងជូនដំណឹងពីការខូចខាត អណ្តូង និងស្រះទឹក ដល់អាជ្ញាធរខេត្ត ដើម្បីធ្វើការជួសជុល និងស្ដារឡើង។ គម្រោងនេះដែរ ក្រសួងអភិវឌ្ឍន៍ជនបទ ក៏មានកិច្ចសហការជាមួយអង្គការដៃគូ ផ្ដល់ជូនម្សៅក្លរ រួមនិងធុងចម្រោះទឹកស្អាត សម្រាប់ចែកជូនដល់ ប្រជាពលរដ្ឋ ដែលរងផលប៉ះពាល់ធ្ងន់ធ្ងរនៅតាមតំបន់ជនបទមួយចំនួនផងដែរ។
អត្ថបទ និង រូបភាព៖ មន្ទីព័ត៌មានខេត្តសៀមរាប
