ព្រឹកមិញនេះគណ:ប្រតិភូគណបក្សប្រជាជនកម្ពុជានិងស្ថាប័នជាតិមួយចំនួនអញ្ជើញគោរពវិញ្ញាណក្ខន្ធសពឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប
នៅព្រឹកថ្ងៃទី ២៥ ខែវិច្ឆិកា ឆ្នាំ២០២០នេះ គណៈប្រតិភូគណបក្សប្រជាជនកម្ពុជា ដឹកនាំដោយឯកឧត្តម សំរឹទ្ធ សារុណ សមាជិកគណៈកម្មាធិការកណ្តាលនៃគណបក្សប្រជាជនកម្ពុជា , ប្រតិភូក្រសួងមហាផ្ទៃ ដឹកនាំដោយលោក អ៊ឹង វណ្ណារិន អនុនាយកដ្ឋានគ្រប់គ្រងបុគ្គលិក , ប្រតិភូក្រសួងក្រសួងរៀបចំដែនដីនគរូបនីយកម្មសំណង់ និង សុរិយោដី ដឹកនាំដោយ លោក ហ៊ី សាយ ប្រធានមន្ទីររៀបចំដែនដីនគរូបនីយកម្មសំណង់ និង សុរិយោដីខេត្តសៀមរាប និង ក្រុមហ៊ុន គ្រឹះស្ថានសិក្សាឯកជនមួយចំនួនទៀត បានអញ្ជើញចូលរួមគោរពវិញ្ញាណក្ខន្ធសពឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប ដែលបានតម្កល់ទុកធ្វើបុណ្យនៅគេហដ្ឋាននៃសព ស្ថិតនៅភូមិទ្រៀក សង្កាត់សៀមរាប ក្រុង សៀមរាប ខេត្តសៀមរាប ។
ក្នុងឱកាសនៃការគោរពវិញ្ញាណក្ខន្ធសពឯកឧត្តម អ៊ឹង ហឿន គណ:ប្រតិភូទាំងអស់ បានសម្ដែងនូវការរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារសព និង សោកស្តាយយ៉ាងខ្លាំង នៃការបាត់បង់មន្ត្រីជាថ្នាក់ដឹកនាំមួយរូបដ៏ឆ្នើម ក្នុងជួរមន្ត្រីរដ្ឋបាលថ្នាក់ក្រោមជាតិ ដែលពោពេញទៅដោយបទពិសោធន៍ បច្ចេកទេស ក្នុងការដឹកនាំ និង បំពេញភារកិច្ច ជូនជាតិមាតុភូមិកន្លងមក ព្រមទាំងបានឧទ្ទិសកុសលជូនដល់ដួងវិញ្ញាណក្ខន្តឯកឧត្តម អ៊ឹង ហឿន សូមបានទៅកាន់សុគតិភពកុំបីឃ្លាងឃ្លាតឡើយ ។
ក្នុងរយៈពេល៤១ឆ្នាំមកនេះ ឯកឧត្តម អ៊ឹង ហឿន បានឆ្លងតាមដំណាក់កាលក្នុងការបំពេញភារកិច្ចបម្រើជាតិមាតុភូមិកម្ពុជា ជាថ្នាក់ដឹកនាំមួយដ៏ឆ្នើមមួយរូប ក្នុងការដឹកនាំមន្ត្រីរាជការបំពេញកាតព្វកិច្ចកសាងអភិវឌ្ឍន៍ជាតិមាតុភូមិ ដោយមានមនសិកាស្នេហាជាតិមាតុភូមិ និង ប្រជាជន បានធ្វើកាបូជានូវកម្លាំងកាយ គំនិតបញ្ញា ស្មារតី ក្នុងការចូលរួមកសាងជាតិមាតុភូមិកម្ពុជា ដែលទើបរំដោះរួចពីរបបប្រល័យពូជសាសន៍ ប៉ុល ពត នាថ្ងៃជ័យជម្នះ ៧មករា ១៩៧៩ និង កសាងការពារមាតុភូមិ កិច្ចអភិវឌ្ឍន៍ទៀតផង ។
សូមបញ្ជាក់ថា ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប បានទទួលមរណភាព នៅវេលាម៉ោង ២១និង២០នាទី នាថ្ងៃទី២៣ ខែ វិច្ឆិកា ឆ្នាំ២០២០ ក្នុងជន្មាយុ ៧២ ឆ្នាំ ដោយរោគាពាធ ហើយសពឯកឧត្តមប្រធានក្រុមប្រឹក្សាខេត្តសៀមរាប ត្រូវបានតម្កល់ទុកធ្វើបុណ្យនៅគេហដ្ឋាននៃសព ដើម្បីប្រារព្ធពិធីបុណ្យតាមគន្លងប្រពៃណីព្រះពុទ្ធសាសនា ក្នុងរយៈពេល៧ថ្ងៃ គឺចាប់ពីថ្ងៃទី២៣ រហូតដល់ថ្ងៃទី២៩ ខែវិច្ឆិកា ឆ្នាំ២០២០ ។
តាមកម្មវិធីនៃបុណ្យសពនេះ នៅថ្ងៃទី២៦ និង ថ្ងៃទី២៧ ខែវិច្ឆិកានេះ នឹងមានការអញ្ជើញចូលរួមគោរពវិញ្ញាណក្ខន្ធសពឯកឧត្តម អ៊ឹង ហឿន ពីសំណាក់ស្ថាប័នព្រឹទ្ធសភា រដ្ឋសភា ក្រសួង ខេត្តជិតខាង ក្រុមប្រឹក្សាខេត្តសៀមរាប គណៈអភិបាលខេត្ត មន្ទីរ អង្គភាពនានាក្នុងខេត្ត ក្រុមប្រឹក្សានិងគណៈអភិបាលក្រុងស្រុកទាំង១២ និង ស្ថាប័នឯកជនក្នុងខេត្តសៀមរាប ។
សពឯកឧត្តម អ៊ឹង ហឿន ត្រូវបានប្រារព្ធពិធីដង្ហែចេញពីគេហដ្ឋាន នៅវេលាម៉ោង៣និង៣០នាទីរសៀល នាថ្ងៃទី២៨ ខែវិច្ឆិកា ឆ្នាំ២០២០ ឆ្ពោះទៅប្រារព្ធពិធីបូជានៅវត្តពោធិ៍បន្ទាយជ័យ ស្ថិតក្នុងសង្កាត់សៀមរាប ហើយនៅវេលាម៉ោង០៦ល្ងាច សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប នឹងប្រទានភ្លើងបូជាសព ៕
