ក្រសួងឧស្សាហកម្ម ផ្សព្វផ្សាយ គម្រោងការប្រឹក្សា និងដំណោះស្រាយបច្ចេកវិទ្យាមកពីប្រទេសកូរ៉េ ដល់ក្រុមហ៊ុនសហគ្រាសឯកជន ក្នុងខេត្តសៀមរាប
នៅខេត្តសៀមរាប នាថ្ងៃទី២៣ ខែវិច្ឆិកា ឆ្នាំ២០២០ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ សហការគាំទ្រដោយ វិទ្យាស្ថានស្រាវជ្រាវម្ហូបអាហារកូរ៉េ និងវិទ្យាស្ថានបច្ចេកវិទ្យាជាន់ខ្ពស់កូរ៉េ រួមនិង អគ្គនាយកដ្ឋានសហគ្រាសធុនតូចនិងមធ្យម និងសិប្បកម្មបានរៀបចំបើកសិក្ខាសាលាផ្សព្វផ្សាយ ស្តីពី “គម្រោងការប្រឹក្សានិងដំណោះស្រាយបច្ចេកវិទ្យាមកពីប្រទេសកូរ៉េ (TASK Program) និងសុវត្ថិភាពចំណី អាហារនៅកម្ពុជា ជូនដល់ ម្ចាស់ និងតំណាងក្រុមហ៊ុនសហគ្រាសឯកជន ក្នុងខេត្តសៀមរាប ប្រមាណជា៥០រូប។
ឯកឧត្តម ហ៊ត ផេង អគ្គនាយក នៃអគ្គនាយកដ្ឋានសហគ្រាសធុនតូច និងមធ្យម និងសិប្បកម្ម លើកឡើងថា សិក្ខាសាលាផ្សព្វផ្សាយនេះ មានគោលបំណង ពង្រឹងគុណភាព និងសុវត្ថិភាព ផលិតផលម្ហូបអាហារ របស់សហគ្រាសធុនតូច និងមធ្យម និងសិប្បកម្ម នៅកម្ពុជា ដើម្បីធានាបាននូវ ឧត្តមភាពប្រកួតប្រជែង ដែលមានចរិតជាយុទ្ធសាស្ត្រ តភ្ជាប់ទៅកាន់ខ្សែសង្វាក់តម្លៃតំបន់ និងសកលជាដើម។ សិក្ខាសាលានេះដែរ ជាផ្នែកមួយ របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ខិតខំផ្តល់នូវបច្ចេកទេស បច្ចេកវិទ្យាទំនើប គ្រឿងចក្រ-គ្រឿងម៉ាស៊ីនទំនើប និងវិធីសាស្រ្តផ្សេងៗ ដែលអាចជួយបង្កើនប្រសិទ្ធភាព គុណភាព និងអនាម័យ ស្របតាមបរិបទ ឧស្សាហកម្ម ៤.០ (Industry 4.0) និងទប់ស្កាត់អតិផរណាក្នុងស្រុក ព្រមទាំងកាត់បន្ថយឱនភាព ពាណិជ្ជកម្មផងដែរ។
ព័ត៌មានជាតិ ថ្មីៗ
ឯកឧត្តមអគ្គនាយក បញ្ជាក់ថា៖ គម្រោងប្រឹក្សាយោបល់ និងដំណោះស្រាយបច្ចេកវិទ្យាពីប្រទេសកូរ៉េ (TASK Program )នេះ បានចុះអនុស្សរណៈអនុវត្តន៍គម្រោង កាលពីថ្ងៃទី០៥ ខែឧសភា ឆ្នាំ២០១៨ ហើយគម្រោងជំហានទី១ មានសហគ្រាស -សិប្បកម្មចំនួន១១ នៅក្នុងរាជធានីភ្នំពេញ បានចូលរួមអនុវត្តន៍ និងទទួលបានជំនួយបច្ចេកទេសពីទីប្រឹក្សាកូរ៉េទៅលើការអភិវឌ្ឍផលិតផល ការវេចខ្ចប់ និងការរក្សាទុកប្រកបដោយ សុវត្ថិភាព និងអនាម័យខ្ពស់។ បន្ថែមពីនោះ ក៏មានការណែនាំផលិតផលម្ហូបអាហាររបស់ពួកគេ ទៅទីផ្សារប្រទេសកូរ៉េ តាមរយៈការតាំងពិពណ៌ ផលិតផលនៅប្រទេសកូរ៉េ។ ទន្ទឹមនោះ ខេត្តសៀមរាប និងបាត់ដំបង គឺជាគម្រោងជំហានទី២ ដើម្បីទទួលបានជំនួយបច្ចេកទេសពីភាគីកូរ៉េបន្តទៀត។
អត្ថបទ និង រូបភាព៖ មន្ទីព័ត៌មានខេត្តសៀមរាប
