នៅរសៀលថ្ងៃទី ១៩ ខែ វិច្ឆិកា ឆ្នាំ២០២០ នៅសាលាខេត្តសៀមរាប មានរៀបចំបើកកិច្ចប្រជុំលើកទី៥ ស្ដីពីវឌ្ឍនភាពការងារ និង លទ្ធផលការងារ សិក្សារៀបចំ និង កំណត់និមិត្តសញ្ញា របស់រដ្ឋបាលក្រុង-ស្រុក ដែលមានការចូលរួមពី មន្ទីរជំនាញពាក់ព័ន្ធ អាជ្ញាធរស្រុកសូទ្រនិគម និង ស្រុកអង្គរធំ រួមនិងមេឃុំនៃស្រុកទាំងពីរផងដែរ។
គិតមកទល់ពេលនេះ ពង្រាងនិមិត្តសញ្ញា នៃក្រុង-ស្រុកទាំង១២ របស់ខេត្តសៀមរាប ត្រូវបានរដ្ឋបាលខេត្ត ប្រជុំពិនិត្យ និងពិភាក្សា យ៉ាងលិ្អតល្អន់ និងជាច្រើនលើក ធ្វើយ៉ាងណាឲ្យសាកសមទៅនឹង សក្តានុពល និង ជាជីវប្រវត្តិរបស់ក្រុង-ស្រុក សម្រាប់អ្នកជំនាន់ក្រោយបានដឹង។
លោក នាក់ ណេរ៉ុន អភិបាលរងខេត្តសៀមរាប បញ្ជាក់ថា ការបង្កើតនូវនិមិត្តសញ្ញានេះ គឺជាការបង្កភាពងាយស្រួលដល់សាធារណជន ភ្ញៀវជាតិ-អន្តរជាតិ បានស្គាល់កាន់តែច្បាស់ ពីសក្តានុពល ប្រពៃណី ទំនៀមទំលាប់ របស់ប្រជាពលរដ្ឋ នៅក្នុងមូលដ្ឋាននីមួយៗនៃក្រុង-ស្រុកទាំង១២នោះ។ រហូតមកដល់ពេលនេះ រដ្ឋបាលខេត្ត ពុំទាន់សម្រេចយកនិមិត្តសញ្ញារដ្ឋបាលក្រុង-ស្រុកណាមួយ ដើម្បីដាក់ឆ្លងក្រសួងមហាផ្ទៃ ពិនិត្យនិងសម្រេច ទទួលស្គាល់ជាផ្លូវការឡើយ។
គួរជម្រាបថា ការកំណត់និមិត្តសញ្ញា របស់រដ្ឋបាលក្រុង-ស្រុកនេះ ស្របតាមសេចក្ដីជូនដំណឹងរបស់ក្រសួងមហាផ្ទៃ ចុះថ្ងៃទី១៦ ខែមេសា ឆ្នាំ២០២០ ជាមួយនោះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ក៏បានណែនាំដល់រដ្ឋបាលរាជធានី-ខេត្ត ត្រូវជំរុញការសិក្សារៀបចំ និងកំណត់និមិត្ត សញ្ញារបស់ខ្លួនឲ្យបានរួចរាល់ យ៉ាងយូរនៅត្រឹមដំណាច់ ឆ្នាំ២០២០ នេះ។
អត្ថបទ និង រូបភាព៖ គឿន វ៉េត និង យូ វង្ស
កែសម្រួល៖ សេង ផល្លី
