កសិករវ័យ៦២ឆ្នាំខេត្តសៀមរាប រំពឹងទទួលបានចំណូលប្រមាណ៦០០លានរៀល ពីការដាំបន្លែសុវត្ថិភាព និងចិញ្ចឹមសត្វ
ទោះពិភពលោក ក៏ដូចប្រទេសកម្ពុជាស្ថិតក្នុងវិបត្តិកូវីដ-១៩ លោក ឈាវ ហុង វ័យ ៦២ឆ្នាំ រស់នៅភូមិសំរោង ឃុំសំរោង ស្រុកសូទ្រនិគម ខេត្តសៀមរាប នៅតែរំពឹងថា កសិដ្ឋានរបស់លោកនឹងទទួលបានចំណូលប្រមាណ៦០០លានរៀល ពីការដាំបន្លែសុវត្ថិភាព និងចិញ្ចឹមសត្វ នេះបើតាមប្រសាសន៍របសលោក នៅថ្ងៃទី០៦ ខែធ្នូ ឆ្នាំ២០២០នេះ។
ព័ត៌មានជាតិ ថ្មីៗ
កសិករគម្រូ ចំណាត់ថ្នាក់លេខ២ទូទាំងប្រទេសផ្នែកដំណាំបន្លែ កាលពីឆ្នាំ២០១៥រូបនេះ បង្ហាញថា នៅឆ្នាំ២០១៩ កសិដ្ឋានរបស់លោក ទទួលបានប្រាក់ចំណូល ប្រមាណ៤៣០លានរៀល លើផ្ទៃដី ៨ហិកតា។ ទោះបីលោក ចំណាយ រហូតដល់៧០ ទៅ៧៥ភាគរយ ទៅលើកម្លាំងពលកម្មមនុស្ស ១០នាក់ និងវត្ថុធាតុដើមផ្សេងៗក៏ដោយ ក៏លោកនៅតែបង្ហាញអារម្មណ៍រីករាយ និងហៅថាជាឆ្នាំ នៃមោទកភាពក្នុងនាមជាកសិកររបស់លោក។
លោក ឈាវ ហុង បញ្ជាក់ថា ជំហានដំបូងនៃការដាំតែបន្លែរបស់លោកលើផ្ទៃដី៣ហិកតា ពុំទទួលបានភាពជោគជ័យទេ រហូតលោកបានចូលទៅសិក្សាបច្ចេកទេសដាំដុះ ចិញ្ចឹមសត្វក្នុងសហគមន៍មួយក្នុងមូលដ្ឋានរបស់លោក ដែលមានអ្នកបច្ចេកទេស មកពីមន្ទីរកសិកម្មខេត្ត រួមនិងអង្គការ គ្រឹះស្ថានសិក្សាមួយចំនួនទៀត។ ការខិតខំដាំដុះ និងចិញ្ចឹមសត្វតែមួយមុខមិនគ្រប់គ្រាន់ប៉ុណ្ណោះទេ ការស្វែងរកទីផ្សារ និងកិច្ចសហការជាមួយមន្ទីរពាណិជ្ជកម្ម និងមន្ទីរកសិកម្មខេត្ត ក៏ជាកត្តាសំខាន់ផងដែរ។ បច្ចុប្បន្នលោកទទួលការបញ្ជាទិញបន្លែសាច់ពីអតិថិជនជារៀងរាល់ថ្ងៃ ទោះវិបត្តិជំងឺកូវីដ-១៩ នៅអូសបន្លាយក៏ដោយ។
លោក ប៉ែន ប៊ុនធឿន អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បង្ហាញថា ក្រៅពីការជួយជាបច្ចេកទេស ដល់កសិករ ក្រសួងកសិកម្ម រុក្ខាប្រមាញ់ និងនេសាទ បានស្វែងរកអង្គការកសិកម្មដៃគូ បង្កើតជាកម្មវិធីថ្នាក់ជាតិមួយទៀត ហៅកាត់ថា អាស្ប៉ាយ (Aspire) ដែលជា កម្មវិធីផ្សព្វផ្សាយបច្ចេកទេសកសិកម្មថ្មី ធន់នឹងការប្រែប្រួលអាកាសធាតុ សម្រាប់ជួយដល់សហគមន៍កសិកម្ម និងក្រុមបណ្តុំអាជីវកម្មកសិកម្ម ក្នុងខេត្ត២៤ ទៅលើបច្ចេកទេស និងគម្រោងមួយចំនួនទៀត ដែលជួយគាំទ្រ និងជំរុញដល់កសិករក្នុងវិស័យកសិកម្មនេះ ទទួលបានភាពជោគជ័យ។ សម្រាប់ខេត្តសៀមរាប កម្មវិធីនេះជួយដល់ឃុំ-សង្កាត់ចំនួន៤៤ នៃក្រុង-ស្រុកចំនួន១១ ក្នុងចំណោមក្រុងស្រុកសរុប១២ និងមានអ្នកទទួលផលជាង៣ពាន់គ្រួសារ។
គួរជម្រាបថា បន្ទាប់ពីលោក ឈាវ ហុង បានសិក្សា និងយល់ដឹងពីបច្ចេកទេសកសិកម្មទំនើប លោកបានប្រើប្រាស់ដីកសិដ្ឋានរបស់លោក ដាំដុះដាំដំណាំ ជាច្រើនមុខ និងចិញ្ចឹមសត្វ ដែលជាប្រព័ន្ឋកសិកម្មចម្រុះ រួមមាន ដំណាំបន្លែយកស្លឹក យកផ្លែ បន្លែក្នុងផ្ទះសំណាញ់ ដំណាំស្រូវ បណ្តុះផ្សិត និងចិញ្ចឹមសត្វ (ត្រី មាន់ និងគោ)។ បន្ថែមពីនោះ នៅឆ្នាំ២០២១ខាងមុខ លោកនឹងបង្កើនការដាំដុះក្នុងផ្ទះសំណាញ់ឲ្យបានពី៦ទៅ១០កន្លែង និងប្រែក្លាយបន្តិចម្តងៗ ឲ្យទៅជាតំបន់កសិ-ទេសចរណ៍។
អត្ថបទ និងរូបភាព៖ លោក យូ វង្ស
កែសម្រួលអត្ថបទ ៖ លោក សេង ផល្លី
